Galatiya 4

Kristo Wane Ra More Ŋene Kaisale Wane Ŋerep Medep Okanmaine

1Na koso donne takotke ramaile, yemo iwa yale, medep nigatne mane eŋe eŋineka wekuku, eŋe boaŋ magainane aboŋ kine kine mete zamot yewa mayake, eŋe medep nigatne gemaikane, eŋe magainane qelit medep yale okaniyake, ŋo kine kine korop eya wane welaine yemo welekatne oŋom okanmaike. 2Eŋe medep nigatneka metkimo, wawerekoune me ŋeso-koune edo medep eŋineso mete zamot kine kineine, yewa weneŋ wareka ge mageu medep suwaki magaineŋo naso motke, yewao wamo, mo eya medep metino kine kine eya korop mosikei. 3Ŋenze rokop eŋe yalewaka pamaike, ŋene moka aso ŋabo-kopze eŋane masi tanik mayakatne pamaike, yewaŋo teba-ŋongi, ŋene medep nigatne gege so dereret ge more, eya wane qelit qe gekone. 4Ge mageŋem Kaisaleŋo naso koboboine motke, yewa bomileki eŋine gipole birakaki ketke, ketki paki, ŋei ŋenze wako wakon wane rokopko Mariya wano wakone, Yuda ŋei eŋane ra rokop don wane bango waket tamge geke. 5Eyamo ra rokop don wane mulapko ŋine siwot-ŋongi, Kaisale wane ŋerep medep okange-nane yale okange.

6Pakimo, ŋine ukude Kaisale wane ŋerep medep okanmami, wane mo Kaisaleŋo Gipolane Asu kotozo bira-kaki ket more, Asuŋo iwa yale qebin-ŋone eŋano boka okanmaike, “Magak, naŋane magane.” 7Yali-nane mo, ŋine koso qelit ŋeikoune yauwine mida, ŋine mo dokoine okanmami, ŋine Kaisale wane ŋerep medep geu paki, iwa yale desikei, ŋene Kaisaleŋo mete zamotine korop dokoine eŋane magemaike, yewa boaŋ ŋeboniyake.

Pauloŋo Galatiya Ŋei Ŋerep Eŋane Dere Mezet Okange

8Welekatne, ŋine sogino Kaisale mi detka more lopio, Waom isisine, yewa eŋane qelitene qe qelit medep yauwine yale gekoi. 9Ŋo, ukude iwa yemo ŋine Kaisale mo detkamami me na iwa yale maine raikale, Kaisaleŋo ŋine modet-ŋunmaike, eya wane mo ŋine onoka wane Kaisale ŋadek-ka more, asu isisine wet borikinerop zonomine midaine eŋano arimami? Eŋe maine mi mapit-ŋunikei, ŋine onoka wane koso eŋane qelit medep yauwine okane more manerop eŋane qelit qekei wane okanmami? 10Pakimo, ŋine eya wane ra rokop donine pamaike, eya mogare more peyadaine kaiwe maneo, me meso maneo, me koma muselo met okanmami. 11Na ŋinane tanik manik ŋine, yewa eya wane dere kaet nanmaike, na uratane ŋinane keu ŋino makole, yewa mo, gemage wele midaine okaniyake.

12O kimakopne, na ŋinane togogoleka ramaile, na ŋinane rokop okangolane, ŋine na yale okanikei. Na Yuda eŋane ra rokop don qeliŋka more ŋine yale okangole. Pakimo, ŋine naso yewao masi tanik mane mi oka okane, eya naŋano mi okangoi, ŋine nae yale okane so aso ŋabo-kopŋine eŋane masi tanik manik, eya qeliŋ-kaikei. 13Ŋine mo manerop detmami me? Na onoka wane mikepka kisi maep don ra wakone kiyeke ŋidangole, eya mo zoma kine mane zok okan nange, naso eyao, ŋo ŋido na masi qotkoine mane mi okan-nangoi. 14Na set pele pelek zok manerop okan-nangi, ŋine siluŋ naŋane bauŋine mi wake, ŋine dere umat okane more mi ŋadek nangoi, so naŋane bauŋine mi wake, midakaka, ŋine nanbi, na Kaisale wane aŋelo mane yale okanbe, mawaluk-nangoi, ŋine nanbi na Kristo Yesu yale okangi, ma waluk-nangoi. 15Ŋine oi bakom okane qom menaŋ zok okan-nangoi, pakimo oi bakom yewa mo diyao qeligeu arike? Na noŋom masi tanik ŋine mayakatne eya wane welekatne ŋidanbe. Ŋine naso yewao deŋine woune yewa maine qe potau saketki rap. Qe potau saketki mo na ninbi rap. 16Me daleo? Na don iwa welekatne ŋidanbe paki, na ŋinane ŋabaŋine okanmaile me?

17Welekatne detpi, ŋei natne eŋe ŋinane simile on-okanmaike. Ŋo, don kelok so isieneŋo yemo zok qotkoine. Eŋe korop yewa okanmami, yemo ŋine mapok-ŋunbi, na qeliŋnane more eŋane eŋetene ma wakone more qesiŋ onikei wane yale okanmami. 18Kine kine mainane ra more kima natne eŋano masi tanik bile oka okan, eya wane simile manerop desikei-wo, eya mo maine. Yewa yemo welekatne, naso baŋem maine okane gekei. Ŋo, weku na ŋineropka gewe yewaka mida. Na ŋinerop mi gewe ŋine masi maine yewa misuk qeliŋgei. 19O gipon boraso-kopne! Ŋerep maneŋo medep mayakane gae maki wikile det okanmaike, rokop yale waka na ŋinane wikile koso manerop dere ari magewe, ŋine Kaisale wane ŋerep medep Kristo wane kait toqaine so ewe zonomineŋo ŋinane koto ŋino wakoniyake. 20Na naso iwao ŋinerop gekalane nanmaike, paki, na don iwa qelige more kima don ŋidanikale, na ŋinane zok dere mezet okanmaile, so na mi detmaile, na daleo qesiŋ-ŋunikale.

Hagaŋo Sara Erane Rokop Don

21Yuda ŋei eŋane ra rokop don wane qelitine qe okanmami, na qeson-ŋunbe nolatpi, ŋine ra rokop donŋo ramaike, yewa dapore mi det okanmami me? 22Eyaŋo don yalewa ramaike, Abraham eŋe gipoletkine etke, mane qelit ŋerep yauwine Haga wano ŋine wakonge, ŋo mane yemo eŋine ŋanomine Sara wano ŋine wakonge. 23Gipole qelit ŋerep wano ŋine, eya mo ŋei ŋerep wako wakon-zane rokopko yauwine wakonge, ŋo, gipole Isak eŋine ŋanom-inano ŋine, eŋe yemo Kaisale rara togon don-inane rokopko wakonge. 24Don yewa wane nat paromine iwa yale pamaike, ŋerep etke yewa ere Kaisale don-inane tako rakot etke, eya wane rokopko okangoik. Kaisaleŋo Yuda ŋeiŋerep eŋane ra rokop don, Sainai bonagao motki sarike. Haga qelit ŋerep so eŋane doko ŋosa ŋabo-koune eŋe qelit qeqe okangoi, tego yewa eŋe ra rokop don eya wane rokop okangoi. 25Haga yewa eŋe Sainai bonaga, Arabiya kepeo metmaike, ŋo Yerusalem mat yemo Sainai bonaga-rop rokopetne weku okanmamik. Ŋo eya wane, ŋei ŋerewekoune Yuda eŋe korop qelit qeqe ka okanmami. 26Ŋo Yerusalem mat mane weti qeliwo metmaike, mat eya wane ŋei ŋerep eŋe qeka makaine midaine, ululuŋ ari sari gemami, eya yemo eŋe Sara wane rokop. Oŋo Abraham wane ŋanomine koboine, eŋe nagaze okanmaike. 27Kaisale wane ekapŋo Sara wane ra more ramaike,

“Ŋerep qaton medep mi ebu ebune, ge wet pesek desikene! Medepŋo gae mi geuki, wikile mi det okanmaine, ge medepŋone wakongi, boka more aroke, oi bakom kitokene! Ŋerep ŋaunerop eŋe doko ŋosa ŋabo-etne etkemde wakonikei, ŋo ŋerep qaton doko ŋosa ŋaboine eŋe manerop wakonikei.”

28Kimakopne, ŋine yemo Isak yale Kaisale wane dokoine, ŋine eŋine rara togon don-inane rokopko eŋine dokoine okanmami. 29Naso yewao medep-pa zonom yauwine ŋeiwako wakon-zane rokopko wakonge, oŋo Asu wane zonomgo ŋine medep wakonge, eŋe ŋabakake, rokop yalewaka naso iwao weneŋ pamaike. 30Ŋo Kaisale wane ekapŋo iwa yale ramaike, “Qelit ŋerep eŋine so gipole esop otnom ariuk, qelit ŋerep wane gipoleŋo ŋanominane gipolerop magak wane mete zamot yewa misuk mayake.” 31Eya wane kimakopne ŋene detŋem, ŋene qelit ŋerep wane dokoine midakaka! Ŋene eŋine ŋanominane dokoine.

Currently Selected:

Galatiya 4: onsNT

Highlight

Copy