Galatiya 3

Ŋene Ra Rokop Don Togon Mogatkene Me Mali Malip Don Mogatkene

1O Galatiya ŋei ŋerep qelaŋine! Ŋene Yesu Kristo mo sikan-ŋunŋem ŋinŋine deŋineŋo kau mo kibego seuke rasike ket okorake, pakimo maŋo dereret ŋine maki koso qelaŋanine wakonmaike? 2Na kine kinemde weku iwa waneka qeson-ŋunbe ŋine nolatpi detpe, ŋine Kaisale wane Asu Koboboine makoi, yewa mo ma numao okora makoi? Yewa Yuda ŋei eŋane ra rokop don togon teweke more makoi, me kisi maep don dere more wet mali malip-ŋineŋo malipka more makoi? 3Ŋine onoka wane wet qelaŋ okanmami! Ŋine numaŋine mikep kiyeke ma arikoi, yemo Kaisale wane Asurop kiyeke urata ma arikoi, ŋo koso iwamo ŋine ŋinŋine zonomgo urata makei wane okanmami me? 4Alakan umat suwaine ŋinano wakonge, eya mo yaup naŋen-ka tewekkoi me? Welekatne na wetkemaile, ŋine kinerop tewekkoi! 5Kaisale eŋe onoka wane, Asu ŋibone more masi togogole eya keu ŋino ma okanmaike? Ŋine ra rokop don togon tewek okanmami, eya wane me kisi maep dere more wet mali malip-ŋineŋo malipka okan okanmami, eya wane ŋibon okanmaike?

6Iwa mo Kaisale wane ekapŋo Abraham wane ramaike, “Abraham eŋe wet mali malipineŋo Kaisale malipkake, eya wane Kaisaleŋo mali malip-inane ra more, eŋe ŋei koboboine orake.” 7Eya wane ŋine yalewa desikei, ŋei ŋerep korop eŋe kisi maep yewa malipka luluk-keiwo, eŋe Abraham wane ŋosa ŋabokoune wele okanikei 8Mokaka Kaisale oŋomka qelaŋ ŋei ŋerep eŋane detke, eŋe boaŋ ŋado kisi maep detpi, wet mali malip-enane ebu eŋinerop biraongi gekei, eya wane dere more, mokaka Kaisale wane ekapko Abraham wane kisi maep don raki iwa yale qekoi, Kaisale-zeŋo rake, “Abraham geŋane ra more kepeo ŋei ŋerep korop mosop-onwarekale.” 9Eya wane, Abraham eŋe wetneŋo Kaisale malip kaki, eŋe mosop-kake, eya wane ŋei ŋerep korop eŋe weteneŋo Kaisale malip-kaikei, eŋe yale waka weneŋ Abraham wane rokopka mosop-oniyake.

10Ŋo ŋei korop eŋe baŋ Kaisaleŋo sowa kuteno mosiyake, yemo eŋe edom iwa yale wetke ramami, ŋene ra rokop don togon yewa mogare ariŋem mo yewaŋo raki, ŋene baŋ Kaisale wane kaitko maine oŋom koboboine ŋedorayake. Onoka wane, ŋo Kaisale wane ekapŋo eŋe yale ra wakonmaike, “Ŋo ŋei mane eŋe ra rokop don korop pa waremaike, eya maine mi mogasiyake, sisinimde qe-yauyake, eŋe Kaisaleŋo sowak-ka more matali kayake.” 11Pakimo yewa wane kine eya mo ra qelaŋangi, ukude didiwo wakonmaike, ra rokop don togon wane ra more Kaisalerop sot midaine koboboine gege eya mo mi pamaike, onoka wane, Kaisale wane ekapŋo yale ramaike, “Ŋei mane eŋe wetino Kaisale malip kayakeo, ŋei eya Kaisaleŋo koboboine orayake paki, eŋe maine gege marat-kayake.” 12Ŋo ra rokop dongo numa, eyaŋo yemo mali malip wane mane mi ramaike, eya mo midakaka, eya eŋe eŋineka mane mo Kaisale wane ekapŋo turuŋine iwa yale ramaike, “Ŋei mane eŋe ra rokop donŋo gege nigatne nigatne yewa korop tewek wareyake paki, eŋe yale waka gege togon ge ariyake.”

13Ŋo ra rokop donŋo yemo iwa yale ramaile, ŋene korop ra rokop don maine mi mogat ware-keneo, ŋene mo sowa wane biŋek, pakimo, qesiŋ-ŋoniyakane yemo Kristo, pakimo, Kristo oŋom qesiŋ-one more, eŋet yewa “Ŋine mo sowa wane biŋek,” eya make. So mataliki siukke paki mo qole-ŋone more ŋenane sowa yewa maki, eŋine kutno wake, onoka wane, Kaisale wane ekapŋo yale ramaike, “Ŋei korop ŋine mo kibego ŋingu ŋigune,” yemo Kaisaleŋo ongi, ŋei korop mo sowak-oniyakane rokop okan-warekoi, “wane don yewa rake.” 14Kristo eŋe masi yewa okange, yemo iwa yale wane, Kaisaleŋo mokaka mosop eya Abraham ra togole mange, yewa mo koso Yesu Kristoŋo qelaŋ ŋei maine eboniyake, ŋo ŋene wa eya mo mali malip-zane ra more, maine Kaisaleŋo mokaka ra togoleke, eya wane Asu maikene.

Kaisale Wane Ra Rokop Donineŋo Rara Togon Donine Yewa Maine Mi Esopkayake

15Kimakopne, na naso baŋem ŋei ŋedom okan okanmaine, yewa wane rokop kito more rawe, ŋei etke ere kine kine mane wane ra togole more, wetetne weku waki kibiwo mosikeik. Pakimo ŋei maneŋo erane don yewa mi mapap kaki paki, koso oŋo don mane takot-keyake. 16Ŋo iwa yemo Kaisaleŋo kine kine bile baŋ wakon-iyakane rake, rara togon donine Abraham eŋine ŋosaine so ŋaboine eponge, Kaisale wane ekapko iwa yale mi ramaike, “Geŋone so ŋosa ŋabo-kopŋone ŋei ŋerep korop loutne.” Eŋe ramaike, “Geŋane ŋaboŋone”, eŋe ŋei weku Yesu Kristo waneka ramaike. 17Na ramaile, yemo kine iwa yale, Kaisale eŋe mokaka Abraham tako rakot kibi make, so ware kayakane ra togoleke, paki koma 430 qoeki, ŋado ra rokop don qekoi, yewaŋo tako rakot kibi yewa maine mi qekat-kayake, so Kaisale wane rara togon don mi saukeyake so esop-kayake. 18Ŋo, ŋene Yuda ŋei eŋane ra rokop don tewek-ŋem paki, mete zamot yewa makone ra, yemo Kaisale wane rara togon don yewa wele midaine okangi rap, onoka wane, Kaisale eŋine rara togon-inane raki paki, mete zamotine lewine midaine yewa Abraham wane biŋek qeke.

19Pakimo, ra rokop don togon wane kine eya mo daleo pamaike? Yemo iwa yale, Kaisaleŋo borikinane kine didiwo wakon-iyakane raki paki, ra rokop don yewa koso rara togon wane ŋado takotkeke, wane, ra rokop don yewa eŋe pa mageki, Abraham wane ŋaboine Kristo sariyakane Kaisaleŋo rara togon don rake, naso yewao midayake. Ra rokop don iwa mo aŋelo eŋane piwo ŋine birakau ket more qeturaŋ ŋei, Mose, eŋane metino wake. 20Ŋo Kaisaleŋo yemo aŋaineŋoka Abraham rara togon donine koboboine mikepka mo olatke, eya wane ukude weneŋ aŋelo me pris mane, ŋei qeturaŋ mi gemami, mida, Kaisale ŋoka gemaike, eŋe qeturaŋ ŋonmaike.

Ra Rokop Don Wane Kine

21Ra rokop donŋo Kaisale wane rara togon don yewa esop kayake me dale? Yale midakaka! Eŋe ra rokop don baŋ ebonge, yewaŋo teba kaki ŋeiŋo wisikae more, gege eya maine wakon girap, yemo gege kobobine maine yewa ra rokop donŋo Kaisale wano bira-ŋongi rap. 22Ŋo siluŋ Kaisale wane ekapko ra rokop don eya wane ra more rake, “Kepe baŋem ŋei ŋerep korop eŋe borikinane mulap urumgo waket gemami,” paki, eya wane lewine yemo ŋene mali malipŋo Yesu Kristo malip-kamore kine kine yewa Kaisaleŋo ŋei kisi maep mali malipene koropŋo maikei wane ra togole ebonge, yewa maine eboniyake.

23Alakan mali malip wane numa mi wakonge, naso yewao ra rokop wane donŋo mulap ŋei yale madet leŋ-ŋongi, mulap urumgo ge mageŋem, mali malip wane naso yewa didiwo wakonge. 24Paki, ra rokop donŋo ware wareze okane ware-ŋongi ge mageŋem, Kristo lotkeke. Yewa mo ŋene mali malip-zane ra more, Kaisale wane Kaitko sot midaine kisi maeprop koboboine gekenane yalewa okanŋonge. 25Pakimo, ukude yemo mali malip wane naso eya wane ra rokop donŋo koso manerop mi ware-ŋoniyake.

26Ŋine korop mo mali malip-ŋineŋo Yesu Kristo malipka more eŋerop tako rakot ŋine wakonmaike, eya wane ŋine mo Kaisale wane dokoine okanmami. 27Ŋine doku tau-ŋune more, Kristo wano takot-ŋunge, paki ŋine korop Kristo wane tanik manik koboboine, eyaŋo takotŋine kiroine yale kitou ketke. 28Pakimo, ŋine Yesu Kristo wane tego, eya wane Yuda ŋei so Grik ŋei, wawaine so ketkele, ŋei me ŋerep, keu ŋino mapo mapokŋine mane mi pamaike, ŋine mo koropŋo Yesu Kristo wano takotke more kop weku okangoi. 29So ŋine Kristo wane biŋek okangoi-wo, yemo mo Abraham wane doko ŋosa ŋabokoune wele okane gekei, wane boaŋ Kaisale rara togoninane rokopko mete zamotine Abraham dokoine eboniyakane rake, yewa mo ŋido magekei.

Currently Selected:

Galatiya 3: onsNT

Highlight

Copy