Galatiya 5

Ŋene Siwotŋongane Ululuŋ Gekene

1Eya wane mulap midaine gekenane, Kristoŋo Yuda eŋane ra rokop don wane mulapko ŋine siwot-ŋonge! Eya wane ŋine ululuŋ gesoke togole okorakei, so ŋidomka misuk eweke more, Yuda eŋane ra rokop don wane qelit qeqe okanikei.

2Na Pauloŋo don iwa ŋidanbe, ŋine ket more detpi! Ŋine solaŋine kitasikei wane ŋidom rakokkeiwo, yemo Kristo wane urataŋo ŋine mi qesiŋ-ŋuniyake. 3Na koso manerop girem ŋidanbe detpi. Ŋei mane eŋe solaine kitasikei wane wae naguyakeo, eŋe Yuda eŋane ra rokop don yewa weneŋ koropka tewek wareyake. 4Ra rokop don teweke more sot midaine koboboine gekei wane ramami, ŋine Kristorop tako rakot-ŋine yewa mo ŋidom kitat-nagumami. Pakimo, ŋine Kaisale wane mosop eya bira-ŋungi, ŋine ŋadino gekei. 5Ŋo Kaisale wane Asuŋo yemo mali malipze ma wakongi, mali malip-zane ra more, ŋene sot midaine koboboine geŋem, Kaisaleŋo ŋebu more eŋino bira-ŋoniyakane dereret gemaine. 6Ŋene Kristo Yesu wano geŋem paki solaze kitasikene, eya wele midaine okaniyake, me ŋene solaze mi kitasikene, eya eŋe yalewaka wele midaine okaniyake, ŋo mali malipŋo yemo ŋei ŋedomka wet maep okan-nagu okan-nagu wane desikenane qomze ma ewek okanmaike, yewaŋo yemo wele, eya wane, ŋene Kaisale wane wet maep ŋei ŋerep natne sikan-onikene, yewaŋo yemo wele raikene.

7Ŋine alakanka numa maine gesoke arikoi. Pakimo maŋo koso numa leŋ-ŋungi mo ŋine don wele yewa koso manerop mi mogare arimami? 8Ŋine numa me dereret yewa mogatmami, yewa mo Waom wano ŋine mida, me oŋo mi qebin-ŋunge, eya midakaka! 9“Yis nigagatne yewaŋo maine maki kasap eya piwiwige suwa wiye okanmaike, eya ŋine mo detmami,” Ŋine yale ra okanmami, eya wane don borikitneŋo ŋine mo matali-ŋunge. 10Ŋo na siluŋ ŋinane dere wetkemaile, yemo tako rakotze Waom wane pamaike, eya wane qesiŋ-ŋungi, ŋine naŋane don yewa misuk ŋadekkaikei. Ŋo, ŋei yewaŋo me yewaŋo wet masiuk mi okanŋuniyake, ŋo eŋe okan-ŋuniyakeo yemo sot yewa wane ra more, turuŋine Kaisaleŋo baŋ ŋei yewa mainge maniyake.

11O, Kimakopne, na welekatne ŋei solaene kitasikei wane donene maine qesiŋka edangole ra, yemo daleo Yuda edo mane nekuwirap? Na don yaline sola kitasikei wane welekatne edanbe rap, yemo na Kristo wane kibeŋ wane don edangole, yewaŋo dere worik mi ma wakongi rap. 12Na wetkemaile, yemo ŋeiŋo wet qeqe okanŋune more, edomka esop nagu more, doku tau tau maguwo ŋine qei ŋadino kesikei.

13Ŋo, kimakopne, ŋine yemo Kaisaleŋo ululuŋ gekei wane ŋidora newan-ŋunmaike, so Yuda wane ra rokop don wane mulap midaine ululuŋ geu pakimo, sola wane masi tanik qotkoine gege sogine, eya maikei wane misuk desikei. Kaisaleŋo ŋine wet maep ŋei kimakop ŋine eŋerop ŋidomka qelit qeqe okan-nagukei wane newan-ŋunge. 14Yuda wane ra rokop don korop, eya mo don weku iwaŋo qepot kemaike, “Ŋinŋine wet maep okan-nagumami, yale-waka ŋei ŋerep korop eŋe wet maep okan-onikei.” 15Ŋo, ŋine osom zuba eŋane masi okane more, ŋidomka ŋaba nagu more yaku kito misuk okanikei, yemo kauluke, diyamŋine ma gekei, ŋidomka boaŋ yaku matali qetali okannagu wareu paki, ŋinŋinarek siuke mida lelekei.

Asu Wane Masi So Ŋei Wane Masi Kineetne Etke Okanmamik

16Na iwa yale takotke ramaile, ŋine Asuŋo numa manbi sikan-ŋungi, eŋano kito more gekei. Ŋine yale okangei, eya mo sola wane tanik manik qotkoine yewa mi mogasikei. 17Wet dereretze gege soginane simileŋo Asu maket biraka okanmaike, ŋo, Asuŋo wet sogine yewa ma ket biraka okanmaike. Asu wane masi so sola wane masi ere etkeŋo ŋaba ŋaba okanbik, eya wane ŋine kine kine okangei wane ra more eweke oka okan, eya ŋine maine mi okanmami. 18Ŋo ŋine Asuŋo numa alakane ŋibon-iyakeo, yemo ŋine Yuda eŋane ra rokop donŋo ŋei waom okan-ŋungi, eŋane qelit qeqe eya maine mi okanikei.

19Wet soginane urata yemo siu siuko mi pamaike, yemo iwa yale wakon okanmaike. Bailalaŋ ŋei ŋerep wenip yau yaup, matali qetali ebu ebu, masi borikine madoŋ madoŋine, borikine kine kine natne oka okan wane qom riwe riwe, 20eŋe Waom isisine eŋetene edoramami, suŋa qare ma okanmami, bailalaŋ wetŋo qole qole, ŋaba qepok okanmami, kawali don ra okanmami, liwek-nagumami, busu lele okanmami, ŋei ŋerep eŋe enŋenane ka simile det okanmami, ŋei ŋerep qepok mapok okane more ŋabade aeke ge okanmami. 21Eŋe ra waizit okanmami, doku togole ne more qelaŋ urata ma okanmami, kiki eŋet borikine kito more masi tanik yaline natne okanmami, kine kine yalinane mo alakanka girem don ŋidangole, ŋo koso manerop iwa ŋidanbe, ŋei korop masi tanik yaline okan okanmami, ŋei yalineŋo Kaisale wane qeli ewe zonom kotino mi wakesikei.

22Ŋo, Asuŋo yemo kine kine maine, wele iwa yale ma wakon okanmaike, wet maep, wet menaŋ, peyam, wet pesek, qom ewek, qom pesek, kima gege, 23weteneŋo ketkele, wetŋo sawe gege. Masi tanik iwaŋo korop Asu wane wele, yewaŋo ra rokop doninerop korop mane mi pamaike. 24Ŋei ŋerep korop Kristo Yesu wane biŋek gemami, eŋe gege mageene sogine, bailalaŋ so boriki-nane simile-inerop mo kibego qeu seukki, mida leleke. 25Asuŋo gege togon ŋebongi ge okanmaine, eŋe yalewa okan-on okanmaike, eya wane ŋene gegeze manŋem warekaki, ŋene Asu eŋine numaoka gesoke arikene. 26Ŋene eŋetze yaup wane misuk mawa-nagukene. Ŋene kimakopze eŋerop kawali wane sot litok misuk okan nagukene. Ŋene kima natne eŋane kine kine wane wetŋo qole qole bailalaŋ misuk okanikene, so misuk yalinane ra-nagukene.

Currently Selected:

Galatiya 5: onsNT

Highlight

Copy