Galatiya 2

Paulo Eŋe Aposolo Natne Maratonge

1Boaŋ ŋado na gewe, koma 14 qoeki, eya wane ŋadino Barnabas weneŋ koso Yerusalem matko arikote. So na Titus weneŋ mawe ŋererop arikone. 2Kaisaleŋo arikalane ra sikan-nange, eya wane arikole. Ari more, Yerusalem matko doku tau tau magu wane ŋetne suwaine enŋene matko ŋenzeka bonep wa mere more, kisi maep don qelaŋ ŋei ŋerep natne eŋano ra suwawe paki edangole, yewa wane kine ra qelaŋane sikanongole, so na iwa yale detkole, na uratane alakan makole, so na uratane ukude koso iwa mamaile, yewa yemo yaup wele midaine mi okaniyake, eya namo detmaile. 3Titus narop gemaike, eŋe Grik ŋei, ŋo, eŋe korop don lewa lewaŋŋo solaine kitasi-kenane mi ramaike. 4Welekatne, ŋei natne kima isisine gemami, eŋe ŋenze keuzo sanka sari saket lewa lewaŋzo ge more, kineze ka detka okanmami, ŋei eya eŋe kisi qeqe so balip matiwan. Eŋe kineze kau, ŋene Yesu Kristoŋo borikino ŋine sora gerep so ra rokop dongo ŋine, siwot ŋone more, eŋino takot-ŋongi ŋene ululuŋ yauwine mulap midaine gemaine. Ŋei yewa edo koso borikine so ra rokop dongo bira ŋone more luk-ŋonikei wane okanmami. 5Ŋo ŋene eŋane donene dere more, Titus wane solaine kitasikei wane mi rakokmaine. Ŋene eŋane don enane bango mane mi siloŋ-maine. Ŋene kisi maep don wane don wele yewaŋo ŋinano naso baŋem payake, so koso solao-ken tanik mane misuk okaniyake. Pakimo, ŋine naso baŋem numa me urata koboboine mogare gekei.

6Ŋei natne eŋe ŋei suwaine, eŋetene doku tau tau magu wane ŋetne, naŋane wetko yemo eŋet korop me eŋet midaine, eya maine, yewaŋo wele mida. Kaisale eŋe ŋei eŋet eya wane zok mi det okanmaike, ŋei eya eŋet-enerop, eŋe naŋane kisi maep dongo koso manerop takotke more, don manemi ra okanmami. 7Midakaka togole! Eŋe mo detmami, na Kaisaleŋo kisi maep don ŋei magu natne qelaŋ eŋano rawakone edani‑kalane urata ninge. Kaisale eŋe Petoro yale waka Yuda eŋano urata don mange, eŋe kisi maep don ra wakone edaniyakane. 8Welekatne, Kaisale eŋe Petoro zonom sunka mange, yemo Yuda ŋei ŋerep eŋane keueno aposolo urata mayakane, rokop yalewaka Kaisale eŋe oŋomka qelaŋ ŋei ŋerep eŋane keueno aposolo urata maikalane, ra zonom sunka ninge. 9Yakop, Petoro so Yohane eŋe eŋetene ŋetne pakane, ŋei ŋerep doku tau tau magu eŋane ŋetne gekoi, Kaisaleŋo na urata kine mane ninge, yewa eŋe mo detkakoi, eya wane eŋe Barnabas so na ŋere metese ŋepuwi tati-ŋon wele yale okangone. Paki don auye wetze weku qeturage more, ŋere Barnabasrop qelaŋ ŋei ŋerep eŋane keueno urata maikete, ŋo eŋe Yuda ŋei ŋerep eŋane keuwo urata maikei wane rakone. 10Eŋe korop don weku iwa yaleka ra more ŋetangoi, ŋere ŋei ket qeqine, madu wanap, wesi aboŋene midaine doku tau tau magu keueno gemami, eya qesiŋ-oniketane, urata don yewa ra ŋepongoi. Kine kinemde yewa mo soginoka bakom kito makole, wane mo koso iwa togoleka maikalane urataine ma gemaile.

Pauloŋo Petoro Antiok Matko Rawetkake

11Ŋo koso ŋado yemo, na Petoroŋo numa didiwo qeyau more tinkake, eŋe masi tanik mi oka okane okange, eya wane ra, eŋe Antiok matko sariki, na ŋei ŋerep eŋane kaiteno meinoka koboboine kito tileke olale more busu kakole. 12Yakop wane ŋeikoune natne eŋe yewa mi lotkekoi, naso yewao Petoro eŋe qelaŋ ŋei eŋerop mere ŋara nekoi. Ŋo baŋ ŋado koso Yakop ŋei-koune, eŋine tego sari lotkeu, naso yewao Petoro eŋe one more qelaŋ ŋei eŋerop koso mere ŋara weneŋ mi neke, onoka wane, eŋe ŋei natne edo qelaŋ ŋei yewa solaene kitasikei wane sorin gekei, eya wane kaet okange, eŋe yale okane more qelaŋ ŋei qeliŋone, eŋe eŋine kimakoune eŋano takotke more yaup deine wazaineŋoka onge. 13Pakiso, Yuda ŋei kimakoune natne eŋe weneŋ eŋerop masi isisine yewaka okangoi, so masi tanik isisine yewa okane more Barnabas wane wet dereretine warageu, eŋano ari makatakke. 14Pakimo, na kawe eŋe kisi maep don wele eya wane rokopko numa koboboine, tegoo mi gesoke arikoi, eya wane na ŋei eŋane kaiteno Petoro olale rakole, “Ge Yuda, ŋo ge siluŋ qelaŋ ŋei eŋane gege yale gine, Yuda eŋane gege tanik yale mida. Pakimo ge daleo qelaŋ ŋei sorin-onnom, eŋe Yuda eŋane gege yale gekei?”

Kaisaleŋo Yuda Ŋei So Qelaŋ Ŋei Mali Malipenane Ma Menaŋoniyake

15Welekatne, ŋene Yuda ŋei wele, ŋene Yuda tegoo ŋine wakongone, ŋene nabok eŋane ŋateno ŋine wakongone, ŋene qelaŋ ŋei borikine mama mida. 16Ŋo ŋene siluŋ iwa yale detmaine, Waom eŋeiwa yale mi detmaike, ŋei eŋe Mose wane ra rokop don mogasikei, kine eya wane maine ŋei eŋe koboboine okanikei, eya midakaka! Ŋo ŋei mane eŋe Yesu Kristo malip kayakeo, Kaisaleŋo ŋei yewa koboboine orayake, ŋene yalewaka, ŋene mo sogino Yesu Kristo malip kakone, eya wane Kaisaleŋo ŋene ŋei koboboine ŋedoramaike, onoka wane, ŋene numa eya mo detmaine, numa yewa waneka Kaisale eŋe ge koboboine gorayake. Ŋo ra rokop don wane ra, yemo midakaka! 17Pakimo, ŋene Kristo wano makatake more Kaisalerop sot turuŋ midaine gekenane ramaine, ŋo koso siluŋ borikine ma Yuda okanmaine, ŋene qelaŋ ŋei yale borikine mama tego, wane mo ŋene iwa yale maine raikene? Yewa mo Kristo oŋom maki suwa togole arimaike? Yale mida, ŋene yale mi raikene, so numaine yale mi pamaike! 18Ŋo, na rarokop don wane gege me tanik manik kine kine mane ra barakewe ketki ŋadek-kale, paki koso mawe wiyeki kiyeke, tego yewa okan-galeo, na noŋom ma wakone more, koso borikine mama okangale. 19Yuda wane ra rokop don togonŋo yemo mo seuseu wane numa so gegeo bira-nange paki, na ra rokop wane numao yemo na mo seuseune, na koso manerop don eya maine mi tewekkale, eya mo na Kaisalerop gege maine gekale, wawainene eya mo Kristorop qeu eŋane kibego seukke. 20Pakimo, gege musele iwa gemaile, so gege yewa, eya yemo noŋomka mida. Yemo Kristoŋo kotono ket gemaike, gege yewa na ukude gemaile, na malip malipneŋo Kaisale Suwainane Gipole malipka gemaile, oŋo naŋane ra more wet maep-inane gegeine qikkake. 21Na Kaisale wane wet maepine mosop bile eya mapap kawe, kine kine yauwine yale mi okaniyake, ŋene Mose wane ra rokop don togon teweke more, Kaisale wane deino ŋei koboboine, sot midaine oka okane mane pakirap, yemo Kristo eŋe yaup kine midaine naŋenka seukke okangi rap.

Currently Selected:

Galatiya 2: onsNT

Highlight

Copy