1 Kirinti 3

Ŋei Wela Ŋene Kaisale Wane Urata Ŋei

1Kimakopne, na ŋei Asurop eŋe don edangole, yale ŋine don mi ŋidangole, midakaka! Na don ŋidangole yemo ŋine kepe iwa wane ŋei Asu midaine eda edane yale ŋine Kristo wane ŋei ŋerep medep okanbi ŋidangole. 2Na ŋamuka gume ŋungole, ŋara togole mi ŋibongole, onoka wane, ŋine ŋara togole nekei wane rokop mi okangoi, so naso iwao yaleka ŋine ŋara togole nekei wane kop mi okanmami. 3Onoka wane ŋine kepe iwa wane ŋei yale, Asu midaine, wet dereret ŋine soginerop gemami, eya wane dere worik keu ŋino paki ŋine ŋidomka sori sorin okan nagumami, ŋine tanik yale okanbi, eyaŋo kine qe wakonmaike, yemo ŋine kepe iwa wane ŋei yauwine okane more eya wane zonom so dereret korop weneŋ ma gemami. 4Eya wane, ŋei mane eŋe ramaike, “Na Paulo wane ŋei,” eso mane eŋe ramaike, “Na Apolos wane ŋei,” Ŋine yale okanmami, wane kepeo ŋine ŋei yauwine yale gekei me?

Kaisaleŋo Mosopkaki Wele Wakonmaike, Eŋaneka Raikene

5Apolos eŋe ma? Ŋo Paulo na ma? Ŋere Kaisale wane qelit ŋeika, ŋeto kisi maep ŋidante ŋine detkoi, ŋere Kaisaleŋo urata ŋeponge eya wane rokop bonep bonep makote. 6Na waet ebotkole, ŋo Apolosŋo ŋara wele ware more doku qakonge, ŋo Kaisaleŋo mosop kaki wele wakonge. 7Eya wane waet ebotke eŋane, me ŋara wele ware more doku qakkake, eŋane mi raikene. Mosop kaki wele wakonmaike Kaisale weku eŋaneka raikene. 8Waet ebotmaike, ŋei yewa so ŋara wele ware more doku qak kamaike, ŋei yewa ere kine etne wekuka. Kaisaleŋo baŋ urata mama etnane rokopko lewine bonep bonep mapoke eponiyake. 9Ŋere urata mama ŋeiŋo Kaisale wane urata qeturage mamaite. Eso ŋine yemo Kaisale wane eu, so ŋine Kaisale wane mat, mo oŋom ma wakonŋunge.

Gerepŋo Urata Wane Kine Maki Wakoniyake

10Kaisaleŋo wet pesekinane urata more ninge, rokop na mat mama weleŋo simen bosiŋ birawe ketke. Pakimo ŋei maneŋo simen bosiŋ eya wane kutno takotke more mat mamaike. Ŋei eya wane kutno mat daleo maikei, eŋe kauluke detluk nagu more maikei. 11Kaisaleŋo simen bosiŋ weku Yesu Kristo, mo bira kaki ketke okoramaike, eya lokake bira more ŋei maneŋo koso bosiŋ pelekine mane musele biraki ket ket eya mo mi pamaike. 12Ŋei natneŋo baŋ gol, me silwa, me wesi lewine suwaineŋo bosiŋ eya wane kutno mat maikei, eya welerop, me natneŋo eki, me seqa, me rais setneŋo mat maikeiwo, eya wele midaine. 13Yemo ŋei mat mama eŋane kine baŋ ŋado Kristo wane Kaiwe Naso bomileki, kineze yewao didiwo wakongi kaikene. Kaiwe Naso yewa wane gerepŋo lawe more ŋei urata mama enane kine qe wakoniyake. Gerep yewaŋo baŋ urata eya liwekkaki paki eya wane weleine maine me mida yewa sikan ŋongi kaikene. 14Ŋei simen bosiŋ yewa wane kutno mat make eya gerepŋo ze ari yuwan-kaki mesiyakeo urata ŋei yewa eŋe baŋ gege togon so lewine mayake. 15Ŋo mane eŋe mat urataine make eya gerepŋo ze wareki midayakeo, eŋe urataine mo yewa mida leleyake. Ŋo ŋei eŋine yemo siluŋ baŋ sese kayake. Seseka more gerepko ŋine ŋei ebumami, yale makokka birakaki gege togon maratkayake, so baŋ gegeine mi siuke maniyake!

16Welekatne, ŋine Kaisale wane Bakom Urum, eya wane Kaisale wane Asuŋo eŋe mo ŋinane koto ŋino gemaike, eya ŋine mo detmami! 17Yalinane ŋei mane eŋe Kaisale wane Bakom Urum yewa matali-kamaikeo, eŋe baŋ Kaisaleŋo ŋei yewa eŋe yalewaka matali-kayake, onoka wane, ŋo yemo eŋe Kaisale wane Bakom Urum eŋe mo eŋine urum oŋom koboboine make. Ŋo urumba eya yemo ŋine, mo oŋom makane eŋe eya wane kotino mere wiye okanmaike.

Ŋei Mane Wane Eŋetine Ora Misuk Mawakaikene

18Ŋei mane oŋomka misuk isi naguyake, ŋei mane ŋinane keuwo ŋine eŋe kepe iwa wane tanik manik eya mogare geyake paki wetineŋo, “Na ŋei dereretne weneŋ,” yale wetkeyakeo, eŋe mikepka dereret eya qelige more ŋei qelaŋ okaniyake, yale okane more dereret wele marat kayake. 19Onoka wane, kepe iwa wane dereret eya mo Kaisale wane deino yemo qelaŋ masi okan okanmaike. Eya wane Kaisale wane ekapŋo iwa yale ramaike, “Waom eŋe ŋei masi borikinane dereret suwaine ma gemami, eya eŋe koso Waomŋo maingeki enŋene edot okanmaike.” 20So Kaisale wane ekapŋo mane iwa yale ramaike! “Waom eŋe kepe iwa wane ŋei dereret enerop eŋane wet dereretene detki wele midaine okan okanmaike.” 21Eya wane, mane eŋe ŋei mane misuk ora ma wakayake, midakaka! Ŋine ŋidanbe detpi menageyake, yeye kine kine kepo pamaike, eya korop mapit ŋune more Waomŋo motke. 22Iwa yale weneŋ, Paulo, me Apolos, me Petoro, me kepe iwa, me gege, me seuseu, me yeye kine kine iwa pamaike, me kine kine baŋ ŋado wakoniyake, yeye kine kine iwa korop ŋinane mali malip mapit kayakane biŋek Waomŋo motke. 23Eso ŋine yemo Kristo wane biŋek, ŋo Kristo eŋe Kaisale wane biŋek.

Currently Selected:

1 Kirinti 3: onsNT

Highlight

Copy