1 Kirinti 4

Waom Eŋe Kisi Mayakatne Rara Eŋane Kine Mawakoniyake

1Ŋine ŋerane, na so Apolos detpi Kristo wane urata ŋei, so Kaisale wane don Sane Wele eya wane ware wareine okanikete. 2Ware ware eŋe koboboine geki paki suwaine inane urata wele ka more kauluk qeuluk mayakane ra mange. 3Na, nae wane yemo iwa yale, ŋido me ŋei magu natneŋo naŋane gegenane kine rau na eya detpe wele mi okaniyake. So na noŋom kinene yaleka maine mi rakale. 4Na wetne ululuŋ pamaike, sotne mane mi paki detmaile, ŋo siluŋ na yale rawe eyaŋo na welekatne sotne midaine, eya wane kine mi qe wakonmaike, na noŋom “sotne midaine,” yale rawe mi kopkeyake. Waom oŋom naŋane kinene ma wakoniyake. 5Eya wane ŋine nasoine mi bomileki kine ma wakon ma wakon wane kukka mi okanikei. Ŋine siluŋ kine ma wakon ma wakon weleine Waom tomaka mageu sariyake. Sari more Waom oŋom yeye kine kine sane korop panaman koto siuke pa waremaike, yewa baŋ qe wirikki didiwo wakon wareyake. So ŋei eŋane kotoeno kine kine siuke san pamaike, yewa korop maki wakon wareyake. Pakimo, Kaisaleŋo ŋei korop rokopene detongi paki eya wane kop baŋ ŋei bonep bonep mawa one more bakomene kitoyake.

Korinti Ŋei Eŋe Wawaine Zok Okangoi

6Kimakopne, na ŋinane dereret qesiŋka more nae so Apolos ŋetsane koso takotke more don iwa yale ramaile, ŋine ŋerane kine kau paki detluke more Kisi Mayakatnane “Gege wane numa mayakatne kisi maep don sogine raraine,” kop eya misuk yuwane more wawaine okane ŋei mane wane detpi waki mawa kaikei, eso mane wane detpi ketki ma ket birakaikei. 7Ge maŋo, ŋei yuwanone more suwaine gekenane ra biragange? Ge yeye kine kine korop ma gemaine, yewa Kaisaleŋo mi ginge me? Ŋo ge Kaisale wano ŋine kine kine mane wele eya welekatne makoneo, mo ge onoka wane detnom mi ginge yale okangi mo mawa nagumaine me?

8Ŋine wetŋineŋo mawa nagu more ramami, “Ŋene yeye kine kine mayakatnane mi ŋaŋaemaine, eya mo korop ma ge waremaine! Ŋene mo aboŋ moriyan gorop okan waremaine! Ŋene mo ŋei waomka okan waremaine, ŋo aposolo, ŋine yemo mida! Maine, ŋene welekatne ŋei waom ka okan waremaine.” Na yaleka ramaile eya welekatne ŋene ŋinerop weneŋ ŋei waom okanŋem rap me? 9Yale mida! Na kamaile, Kaisaleŋo Aposolo Ŋene ŋei sinoine yaline qelaŋ ŋei qeiŋadino gemami, eŋane keuwo biraŋonge yale okanmaike, ŋene ŋei yauwine seuseu wane biŋek ra bira onmami, yaline, biraŋonge, pakimo, kepe baŋem ŋei korop, so aŋelo eŋane deeno ŋenguwi seukkenane ra okanmaine. 10Ŋine wetŋineŋo mawa nagu more ramami, Kristo wane ra more ŋine, aposolo magu, yemo ŋine ŋei qelaŋine okanmami, ŋo ŋene Kristo wano takot-keŋem paki, dereretzerop korop okanmaine. Ŋine setŋine pelelekatne, so ŋine numa qeyau more matalimami, ŋo ŋenze yemo zonomze togogole! Ŋene eŋet biŋekzerop, so ŋedo numa detmaine so urata wele mamaine ŋo ŋine, aposolo, yemo ket qeqine. 11Ŋene ŋara zane seukkone ŋo seuke gemaine, so doku zane qomze sererekkeŋo sererekmaike, Ŋene takot laplap midaine gemaine, ŋengu matali qetali okan ŋonmami, mat urumze midaine lobo lobo gekone so gemaine. 12Ŋene ŋenze qesiŋ nagukenane metezeŋo urata togole ma okanmaine. Eŋe mabaik ŋonbi ŋene qesiŋone more mosopon okanmaine. Eŋe matali qetali okanŋonbi ŋene turuŋene qeliŋ okanmaine. 13Eŋe don borikine ŋedanbi, ŋene kimao don pelekine edan okanmaine. Ŋene kepe baŋem eŋane sino yale okangone gemaine. Ŋene ŋei korop eŋane kaitko yale okane, ge sakone ge sari mageŋem, ukude naso iwa okanmaike.

14Na don iwa ŋinane qemaile, eya mo detpi gamu ŋuniyakane midakaka! ŋine naŋane medep maepkopne okanikei wane wetŋine kito wirike ŋidanmaile. 15Eya wane welekatne ŋine diyam gege kop ŋine aŋelo 10,000 mane ge more gege ŋine warekau Kristo wano payakeo, yemo siluŋ ŋine maga ŋine yale waka weku geyake. Ŋo siluŋ ŋine magakopŋine loutne midaka. Eya wane mo ŋinane gege ŋineŋo Yesu wano pamaike. Na Kisi Mayakatne ŋinano ma sari ŋidangole, yewao na ŋinane magaŋine okangole gemaile. 16Pakimo noŋo numa gesoke okangole, yewaka mogare okanikei wane qebin ŋunmaile. 17Eya wane rawe paki na Timoti birakawe ŋinano uke. Naŋane medep maepne, na eŋane zok nan okanmaike so eŋe Waom wane urata maine mauluke ma okanmaike. Oŋo baŋ wetŋine qe wirike more noŋo Kristo Yesu wane numa eya mogare ari doku tau tau magu korop mat baŋem ra edan okan okanmaile, eya wane numaine ŋidangi desikei.

18Ŋinano ŋine natne wawainenerop eŋe Paulo mi sari ŋoniyake naŋane yale rau paki raki ra okangoi. 19Na yemo welekatne Waomŋo detki mi azoŋgi ŋinano ukale, numaze raki ra okan okanmami, eŋe don ra okanmami eya mida, zonomene eya wane deneŋoka kine ma wakonikale. 20Kaisale wano ŋine numa eya wane kine yemo donŋoka raki ra wane biŋek, eya midakaka. Eŋe zonom so togole togoleo kine wakon okanmaike. 21Pakimo ŋine naŋane daleo ramami? Na ŋinano kumunam gorop ukale me momoine wet menago pesekine ukalane ramami?

Currently Selected:

1 Kirinti 4: onsNT

Highlight

Copy