Bangec kisiu 20
20
Doku mi feec
1Isracelngicngac yeneac ngichabu hafoangoc yeni afo kpete mocgu imohai Tsin bangeckisiu Kades#20:1 Kades imoc bangec dokuya kpacfu dokudzohong mong feande. Wiac ifia kpara oasis deandimbe. Nga naso imohai ine doku yeneacsoc imohai mi feec. imohai kensikema ihai tacgec. Tacmagec Miryam imohai homeu tonggogec.
2Nga imohai doku ngichabu yeneacsoc mong mi feecac yeni Mose nga Aharon yereac ngaba amma yerearu hama kpedzucnegec. 3Kpedzucnema Mose ubakpekpeyoac yofi edegec, “Neni dacmunafocnina yeni Kebuac kicfu homegec isoc homebinggac! 4Ge nocac Kebuac habu neni nga ramaburumakafocnina bangec kisi yomohai homenideac wangecnunu hadang? 5Nga ge nocac Aigitabangecfunac hesicnunuma bangec mangana yomohai hadang? Bangec yomohai wit nga fig icac gbomea nga wainggbomea nga pommegranat icgbomea mi fede amma doku nenideac mong mi fede.”
Yoac edeec doku maude
6Ifi degec Mose nga Aharon yeri kpebung wayunuma Kebugoc ewacemeemeac kporucamaac naguyau kemma bangecfu kicmesungira hetutuckema feoc. Feec Kebuac kibikperagitoayango yerearu fingectegecma nerarangyuruec. 7Nerarangyurumanu Kebungo Mose yofi edeec, 8“Ge yasuga mema ngichabu hafoangoc kpedzucyununa. Ge nga dacga Aharon ngeri yeneac kicngina witiau hoc peperandzi yoac edeec doku maude. Ge ifi amma hoc peperandzi imohacnac doku meficgema yeni nga ramaburumakafocngina doku gumecyunudacnade.”
9Ifi dederecge ammiu Mose ye imoc modacma kemma Kebuac hoannunac yasuya meec. 10Mema Mose nga Aharon yeri kpebung hoc peperandzi wegenahau kpedzucyunudacma Mosengo yofi edeyunuec, “Here miac miac areng, ngeni yaguc negenggec, neri naric ngeneac doku hoc peperandzi yomohacnac meficgengemmedede me?” 11Ifi dema Mose ye maria miacma yasuyango hoc peperandzi naso yohockang kpeu imocac manaunac doku kunengngoc mau kpebung yeni nga ramaburumakafocngina yeni imoc negec.
Kpetiac anduae imoc mi negensidaoc
12Anu Kebungo Mose nga Aharon yofi edeyuruec, “Ngeri ni mi negensinnudaoc amma Isracelngicngac yeneac kicfu ni kpetiac anduae imoc mi negensidaoc amma mi negensinggedaoc. Imocac amma ngeri kpebung yomoc hesicyunuma bangec yemmebadeac deai, imocac manau naric mi enecde.”
13Anu doku imocac kpara Meriwa#20:13 Meriwa imocac titiha imoc modzotitiyoac. degec, imohai Isracelngicngac yeni Kebuac yoackpekpeyoac degec anu ye kpetiac, imoc botucnginau edzacyunuec.
Edombangec ferecgebeso anggec
14Anu Mose ye Kades bangecfunac yoac dedengic sueyunuma edomngictau yearu yoac yofi fau kenec, “Geac munaga Isracelngo yofi dede, nenearu ebic sasawa fingerec imoc ge negennec. 15Mangfocnina yeni Aigitabangecfu kemma ihai naso herea kefing. Kecmina aigitangicngac yeneng mangfocnina nga neni ebic hania hania meficgenemmegec. 16Ifi anggec neni Kebu numumini yeng yoacnina negenec. Negemma angeroya sueu yeng Aigitabangecfunac wangecnunuu hama yaguc geac bangec tegiau Kadestaong yomohai tacdimbe. 17Imocac negennemmemana bangecga toseau ferecgebeso dedimbe. Neni semeng uau me wain uanginau tima mi ferecgenide amma dokutengnginaunac doku mi nenide. Neni sing tegia foiubigeng me kanaubigeng mi kennide, neni ngictauac singtoaungoc kengkecma bangecga ferecgenideac dedimbe.”
Edom ye kpae heiyemmeec
18Ifi degec edomngictaungo yofi merengyemmeec, “Ngeni neac bangecfu sing mi ferecgegecde. Nga sifu kenggecdeu ine dzikac ngenigoc kpenideac dzikacac beannina mema ngunukporac angemmenide.”
19Ifi deu Isracel yeneng yoac yofi meremmigec, “Neni singtoasac modacma kennide. Nga neni nenang nga ramaburumakafocnina dokugedangga mong nenideu ine imocac buma fainide. Nga neni ine negennemmemana bangecga hanininango ferecgema kennideac dedimbe.”
20Ifi degec edomngictau ye monggoc yoac yofi merengyemmeec, “Kpac ngeni mi ferecgegecde.” Ifi dema wasaifora homac kucnginagoc meyunuu Isracel yenigoc dzikac kpegecdeac madacgec. 21Edomngic yeni ifi amma Isracel yeneng bangecngina ferecgegecdeac kpae heiyemmegecac Isracel yeni wama noboha monnusing kenggec.
Aharon homeec
22Anu Isracelngicngac yeneac kpebung hafoangoc yeni efaima yacma kporucamangina meickema Kades wama imohacnac kengkecma Hor tikiu sikedacgec. 23Sikema Hor tiki imohai Edombangec tegiau Kebungo Mose nga Aharon yofi edeyuruec, 24“Ngeri Meriwa dokuu yoac edenguruai imoc kpeocac amma Aharon ye yei homema arengfora yenigoc torokpeyunubeso. Ye Isracelngicngac bangec ngemmeai, imohai mi enude. 25Imocac ge Aharon nga medaha Elecadzar Hor tikiu hesicyuruma embesena. 26Emma Aharonggac uaac wambagedanga hesima medaha Elecadzar heimina kemebeso, nocac Aharon ye imohai homema arengfora yenigoc torokpeyunuude.”
27Anu Mose ye Kebungo yoac dederecge ammiec, ifi yombong amma kpebung hafoangoc yeneac kicfu hesicyuru Hor tikiu enggec. 28#Mke 29:29; Bki 33:38; Dser 10:6Engsikema Mose ye Aharonggac wambaya hesima medaha Elecadzar heimiu kemeec. Kemeu Aharon ye tikiac buma imohai homeec. Homeu Mose nga Elecadzar yeri tikiunac maoc. 29Maec Isracelkpebung hafoangoc yeni Aharon homeec, siduc ifi negemma Aharonggac kiac ubamangang amma kecmagec wenac 30 wisickeec.
Currently Selected:
Bangec kisiu 20: Ded
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
