Bangec kisiu 21
21
Kenacan yenigoc ewegec
1 #
Bki 33:40
Aradac ngictau, ye kenacangngic Negewbangecfu kefec. Nga Isracel yeni Atarim sing hama kecdae, yeng siduc ifi negemma yacma yenigoc ewema Isracel goa meyunuma wangecyunu kenggec. 2Ifi fingeru Isracel yeni kebuaru yoacseria yofi deserigec, “Ge ngicngacareng imoc yeni neneac mariu faiyununadeu neni amatoangina sasawa kpembarackedacma hesisickeyunudacnide.” 3Ifi deu Kebungo Isracelac ubaudumenga negemma kenacanngic maringinau faiyunuu yeneng ngicngacfocngina kpetotieyunuma amatoangina fekenggec imoc kpembarackedacma hesisickedacgec. Nga bangec imocac kpara Horema#21:3 Horema imocac titiha imoc kpembarackede. kpacgec.
Boidzoc ongea aieng sacsacngo memea
4 #
Dser 2:1
Anu Isracelngicngac yeni efaima yacma kporucamangina meickema Hor tiki wama Edombangec yerecgema ferahagecdeac kondung sacsacfubigeng sing kengkecgec. Kengkecmagec ngicngac yeni singgac modzongina tiec. 5#1Kor 10:9Modzongina tiu Anutu nga Mose yereac ubakpekpeyoac yofi deyecmegec, “Ngeri nocac Aigitabangecfunac bangeckisiu homenideac wangecnunu hadape? Yomohai nenedoku mong mi fede nga yaka neandimbe imocac modzonina tiyombonggede.”
6Ifi degec Kebungo boidzoc mangana sueyunuu ngicngac botucnginau hama yinigec Isracelngicngac homacngo homegec. 7Homegec ngicngac yeni Mosearu hama yofi edegec, “Neni Kebugoc ngeri yoac dengecmema kopocsic meficgedinggac amma ge Kebungo nenearunac boidzoc sasawa meicyunuudeac numumibesena.” Ifi degec Mose ye ngicngac yeneac amma numuec.
8Numuu Kebungo Mose yofi edeec, “Ge boidzoc manganaac ongea mong mema ic hereau kpesorona nanu ngicngac sasawa boidzocngo yini yiniya yeni imoc hemma kekecnginagoc anggecde.” 9#2Ngt 18:4; Yoh 3:14Ifi edeu Mose ye aieng sacsacngo boidzoc ongea mema ichereau kpesorou nanu boidzocngo ngicngac yiniu boidzoc ongea imoc henggec, yeni ngereema kecgec.
Isracelngicngac yeni Mocawbangec yerecgegec
10Anu Isracelngicngac yeni efaima yacma kporucamangina meickema kengkecma Owot imohai kporucbedzongina kpedzigec enu guru mema tacyac anggec. 11Amma Owot imohacnac kengkecma Iye Awarim imohai kporucbedzongina kpedzigec enu guru mema tacyac anggec. Bangec kisi imoc Mocawac fanihau wenac ere ereaubigeng feec. 12Nga imohacnac kengkecma Dzered tumiatoa emu feec, imohai kporucbedzongina kpedzigec enu guru mema tacyac anggec. 13Amma imohacnac kengkecma Arnon doku noboc edibigengau kensikema imohai kporucbedzongina kpedzigec enu guru mema tacyac anggec. Imoc yofiac, Arnon doku imocngo amoringicngacareng yeneac bangecfunac hakecma bangeckisiu fede. Amma imocngo Mocaw nga amoringicngacareng yeneac botucnginau mangina ande. 14Imocac amma Kebuac dzikackibiu yoac yofi fede,
“Supa bangecac Wahew amma Arnon dokusing.
15Dokusing imocac fagang
noboc nga noboc fekengkecma
Ar amabangecfu kemma
Mocawbangecac maubigeng wisickede.”
16Anu yeni imohacnac kengkecma Beer dokuteng usu usuyau kensikegec, imohainoc Kebungo Mose yofi edeec, “Ngicngacareng kpedzucyununa ni doku yemmebade.”
17Anu naso imohai Isracel yeni yegec yofi heigec,
“Doku ge bangecfunac erena
yegec yofi heigenni.
18Ngicenara yeni dokuteng imoc usugec,
ngicngacareng yeneac engenafocngina
uaac kpacnginagoc
yeneng ngictauyasunginango
dokuteng usumengere anggec
yeni yasunginango
dokuteng usumengere anggec.”
Anu yeni bangec kisi imoc wama kengkecma Mattana imohai kensikegec. 19Nga Mattana imohacnac Nahalicel kenggec, nga Nahalicel imohacnac Bamot kenggec. 20Nga Bamot imohacnac yacma kengkecma ine Mocawbangecac tumiatoa emu feec imohai Pisga tikibuma hanahema fekende, nga buma ihai namma bangec kisi henggecde.
Emoringic yeneac ngictau Sihon
21Anu Isracel yeni Amoringic yeneac ngictau Sihon yearu yoac dedengic sueyunugec kemma yofi degec, 22“Neni bangecnginau sing ferecgema kennideac naric debesena. Neni sing tegiaubigeng semeng ua me waing uau mi kemma tinide amma dokutengngina usu usuya imohacnac doku mi nema eng ngictauac singtoaungoc kengkecma bangecgaac ma ferecgenide.”
23Ifi degec Sihong ye Isracel yeneng bangehausing ferecgegecdeac waec. Wama wasaingicfora sasawa kpedzucyunuu yacma isracel meficyunugecdeac bangeckisiu Yahets imohai sikema Isracel yenigoc ewegec. 24Ewema isracelngic yeneng serima wasaibeangnginango yunuma bangecngina Arnon dokuunac hanahema kengkecma doku ferec ferecge kpara Yabbok, imohai kensikema ammongngic yeneac bangecfu wisickede, imoc medacgec. Nga ammonngic yeni bangecnginaac ma imoc meserima kucgoc garenggegecac ihai wisickeec. 25Nga Isracel yeni Hesbon nga ama bisic bisiha sasawa mema mingina andacgec. Amma yeni emoringicngac yeneac taongtoangina sasawa mema imohai tacyac anggec. 26Imoc yofiac, Hesbon imoc Amoringictau Sihonggac taongtoa anec. Imoc yofiac Sihong ye warac Mocaw ngictaugoc dzikac kpema bangeha hafoangoc wangecma mekengkefu Arnon dokuu wisickeec.
27-28 #
Yer 48:45-46
Imocac amma yegecheiheingic yeneng yofi heikecgec,
“Gerec Hesbon imohai fingerec,
Sihonggac taonnu
gerecborang fingecma dzema kengkefec.
Ye Mocawbangec Ar dzedacma
Arnonggac ickate sifec
imoc momoc dzedarecac yofi degec,
ngeni Hesbon amau hama
Sihonggac taontoa odaya meserima mebisia.
29Mocaw ge ebictoa fingecgendac!
Kemosac ngicngacareng ngeni kpac andae!
Ye medacfora dafi ayemmeu
bangecngina wama
ebicfunac worama kuric kecdae,
nga naroangfora yeni
Sihonggac witicngac andae.
30Neni wedecyunudaring.
Neni firang amma meyunuing
imoc Hesbonnac hanahema meyunu
kengkecma Diwon amma Nofac kemma
Medewa wegenahau wisickede.”
31Anu Isracel yeni ifi amma emoringicngac yeneac bangecfu kecgec.
32Kecma Mose ye ngic goa Yacedzer amabangec sufu sufu hennegeng anggecdeac sueyunuu kenggec. Kemma yeni yeneac bagenginau amangina fekenggec imoc meyunuma emoringicngac imohai kecgecmoc kisangyunugec worama kenggec. 33Anu yeni ifi amma tegiaubigeng kemma Basan sinnubigeng enggec. Enggec Basan ngictau Og nga wasaingicfora sasawa meyunuma Edereci imohai meficyunuma ewegec.
34Kenggec Kebungo Mose yofi edeec, “Ni ngictau nga ngicngacfora sasawa amma bangeha imoc geac mariu faiyunudacduaeac ge yeac mi kengecgubeso. Ge Amoringic yeneac ngictau Sihon Hesbon amau kefec ye faka amminecmoc ifi isocngoc Og ammibesena.”
35Ifi deu yeni Og nga medacfora amma ngicngacfora sasawa yenigoc ewema firang amma yunuhomedacgec monnec mong mi kecgec. Ifi amma bangecngina imoc yeneac anudeac megec.
Currently Selected:
Bangec kisiu 21: Ded
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
