Salmos 51
51
Vi ndatnaꞌu inio nuu yika kuechio
Yaa ni tee David nuu ni xtuu ña Natán, tee ni ndakani tnoꞌo ia Dios, ja ni chitnaꞌa David jin Betsabé
1Kundaꞌu ini ña ni, vi Dios, nagua kutoo ni ñayiu,
chi ia ndaꞌu ndevaꞌa ini kuu maa ni,
te kindee ni jakueꞌe saꞌa san.
2Ndakate ña ni in kiuu in kiuu ka nuu ndiꞌi jakueꞌe saꞌa san,
te kindee ni yika kuechi san.
3Chi ndakuni san jakueꞌe saꞌa san,
te tu kuu ja ndunaa ini san yika kuechi san.
4Nuu maa ni, ni saꞌa san yika kuechi, maintnoꞌo ni nuu maa ni.
Te ni saꞌa san jakueꞌe nuu ni, yun guaa saꞌa ndaa maa ni nuu kaꞌan ni nuu san,
te vatuka ka saꞌa ni nuu sandaa ni kuechi san.
5Chi jandaa ja ñayiu kueꞌe kuu san ndee nuu ni kaku san,
te vi ja tavi kuechi san ndee chii siꞌi san.
6Te jandaa ja kutoo ni ñayiu oo tnoꞌo ndaa ini anui,
te yun guaa ndee ini anu san kaxtnoꞌo ni tnoꞌo ndichi nuu san.
7Ndasavii ña ni jin ndaꞌa tnu hisopo, te na nduvii san.
Ndakate ña ni, te na nduyaa ka san saa ti iñu nuu kuun.
8Ndataa ni tnoꞌo sii ini, te na ndusii ini tuku san,
visi ndee yiki kaji san ni kusuchi ini jin tnundoꞌo ni tetniuu ni siki san.
9Ma kondiaꞌa ni yika kuechi san,
te kindee ni ndiꞌi jakueꞌe saꞌa san.
10Ndataa ni in anu vii nuu san, vi Dios.
Ndasajaa ña ni ja na kokuu san in ñayiu ndaa nuu ni.
11Ma xtajioo ña ni jin san nuu oo ni,
te ni ma kindee ni espíritu ni ja oo jin san.
12Ndataa ni tnoꞌo sii ini, ja skaku niꞌnu ña ni,
te kindaꞌa tnuu ña ni ja na kuantnoꞌo guaꞌa san nuu ni.
13Saa te saa kaxtnoꞌo san ichi maa ni nuu ñayiu ka saꞌa jakueꞌe,
te na vi kiunduu ñayiu ka saꞌa yika kuechi yun nuu maa ni.
14Skaku ña ni ja ma kaꞌni ka san ndiyi, vi Dios,
chi maa ni kuu ia skaku niꞌnu ña jin san,
te na kata san yaa ja ia sandaa kuu maa ni.
15Kune ni yuꞌu san, vi Jitoꞌo san,
te na kata san yaa ja saꞌa kaꞌnu ña san.
16Chi tu junkuaan ini ni ja soko san nuu ni,
te ni kiti ja teñuꞌu san nuu ni,
chi kuu taa san nuu siun, su masu yun junkuaan ini ni.
17Chi ja junkuaan ini ni ja vi soko nuu ni kuu ja vi kusuchi ini ñayiu jin jakueꞌe ka saꞌi.
Chi ma skexiko maa ni, vi Dios, in ñayiu ja vi kukueli ja ndatnaꞌu ini.
18Saꞌa ni javii javaꞌa jin ñuu Sión,
chi ia ndaꞌu ini kuu maa ni,
te ndasaꞌa ni muro ja ndesi ñuu yaꞌa ja kuu Jerusalén.
19Yun te saa junkuaan ini ni ja vi soko ndaa san nuu ni,
kiti vi ndiꞌi ja ka soko san vi ja ka teñuꞌu ndiꞌi san nuu ni.
Yun te saa vi soko san chikeru nuu altar ni.
Currently Selected:
Salmos 51: xtnNTplus
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
