Salmos 149
149
Ndiꞌi ñayiu ñuu maa ia Dios ka saꞌa kaꞌnu ña jin ya
1¡Kaꞌnu kuu Jitoꞌo!
Vi kata ni in yaa jaa nuu Jitoꞌo,
Vi saꞌa kaꞌnu ni ya nuu ka ndututu ni jin ñayiu maa ya.
2Vi kokusii ini maa ni, ñayiu Israel, nuu Dios, ia ni saꞌa ña jin ni.
Vi kokusii ini maa ni, ñayiu ñuu Sión, nuu ia kuu rey ni.
3Vi kata jaꞌa ni nuu ya ja ka saꞌa kaꞌnu ni sivi ya.
Vi kata ni yaa nuu ya jin nagua ka tee xtnuu kaxin vi jin pandero.
4Chi kusii ini Jitoꞌo jin ñayiu ñuu ya,
te kuñaꞌa ya jayiñuꞌu nuu ñayiu ka saꞌa ndaꞌu ka saꞌa kee mai,
nuu skaku niꞌnu ña ya.
5Vi kokusii ini maa ni ja ka kuu ni ñayiu maa ya,
ja yeꞌe tajan ya nuu ka oo ni,
te visi ka nduei ni nuu jito ni, te vi kata ni yaa ja ka kusii ini ni nuu ya.
6Te vi kana jaa ni ja ka saꞌa kaꞌnu ni ia Dios.
Te vi konee ni in yuchi kani ja xeen nduu jioo nuu,
7nagua ja vi ndaxtenaa ni ñayiu sava ka ñuu,
te vi tetniuu ni tnundoꞌo vi tnaꞌa ñayiu ja tu ka jini ia Dios.
8Saa te vi kuꞌni ni tee ka kuu rey jin cadena,
te vi kuꞌni ni tee inu ndakui jin yoꞌo guaꞌa ja kuu ninoꞌo kaa,
9nagua ja na skunkuu nagua yoso nuu tutu ii ja vi tnaꞌa de tnundoꞌo.
Te yun kokuu in jayiñuꞌu ndevaꞌa nuu ndiꞌi ñayiu maa ya.
¡Kaꞌnu kuu Jitoꞌo!
Currently Selected:
Salmos 149: xtnNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
