Proverbios 15
15
1Nuu ndajioneꞌe in ñayiu tnoꞌo vii tnoꞌo vaꞌa, te jinkani ja kiti ini inka ñayiu.
Su tnoꞌo xeen ja ndajioneꞌe in ñayiu skiti ini ka ña jin inka ñayiu.
2Ñayiu ndichi, chi luu ndevaꞌa kaꞌin tnoꞌo ndichi.
Su ñayiu vasa, chi ninoꞌo tnoꞌo tu jiniuꞌu kaꞌin.
3Ndiꞌi ni nuu oo Jitoꞌo ndiaꞌa ya,
ndiaꞌa ya ñayiu guaꞌa vi ñayiu kueꞌe.
4Ñayiu kaꞌan tnoꞌo vii tnoꞌo vaꞌa kuu na kuinio in yutnu taa ja teku.
Su ñayiu kaꞌan tnoꞌo kueꞌe, saꞌa ja kusuchi ini inka ñayiu.
5Tee vasa, chi skexiko de tnoꞌo ja xteku ña tata de.
Su tee jantaꞌu tnoꞌo ja ka xteku ña jin de, chi xneꞌe de maa de ja tee jinkuiꞌnu ini kuu de.
6Veꞌe ñayiu ndaa, chi oo kuaꞌa ndevaꞌa.
Su ñayiu kueꞌe, chi tu nagua niꞌi jin seꞌe xuꞌin, chi ninoꞌo ni tnundoꞌo jinkuntnaꞌa jin.
7Ñayiu ndichi, chi xtutenui tnoꞌo ndichi.
Su ñayiu vasa, chi masu saa ndakani ini.
8Skexiko Jitoꞌo ja ka soko ñayiu kueꞌe,
su junkuaan ini ya nuu ka ndakuatu ñayiu ndaa.
9Te skexiko Jitoꞌo ichi ka jika ñayiu kueꞌe,
su kutoo ya ñayiu ka saꞌa ndaa.
10Nuu kujioo ñayiu nuu ichi guaꞌa, te kiti ini nuu ka kuxeen nui,
te na ñayiu skexiko tnoꞌo ja ka kuxeen nui, te na kui.
11Te nuu ja yau ñaña vi andeya ka oo nuu ndaꞌa maa Jitoꞌo,
te viꞌi ka tu anu ñayiu.
12Ñayiu kuasun ini, chi tu jinkuaan ini ja vi kuxeen nui,
te ni tu ka ndeka tnaꞌi jin ñayiu ndichi ja vi kaxtnoꞌo nui.
13Ñayiu osii ini, chi luu ndii nui.
Su nuu kusuchi ini ñayiu, te ndandaꞌu ni ndii nui.
14Ñayiu jinkuiꞌnu ini, chi ndukui tnoꞌo ndichi.
Su ñayiu tu jinkuiꞌnu ini, chi ndimaa tnoꞌo vasa ndukui.
15Ñayiu kusuchi ini, chi ndiꞌi ni kiuu kuu kiuu kueꞌe.
Su ñayiu osii ini, chi siun ni kuu kiuu viko.
16Guaꞌa ka kuu ja joo ni konevaꞌo, te koyuꞌu niꞌnuo Jitoꞌo,
masu ja konevaꞌa kuaꞌo, te kokusuchi inio.
17Guaꞌa ka kuu ja yuku kuii ni kokao, te kokaꞌan too tnaꞌo,
masu ja vi in isndiki ndatnu, te kokaꞌan uꞌu tnaꞌo.
18Ñayiu kiti ini ndevaꞌa, chi ndukui ja vi kaxin tnaꞌi.
Su ñayiu kuekuee kiti ini, chi jaꞌnu niꞌnu ñai ja ma vi kaxin tnaꞌa.
19Ichi jika ñayiu kuꞌndu, chi oo kuaꞌa iñu ja kuu ninoꞌo ni tnundoꞌo.
Su ichi jika ñayiu ndaa, chi in ichi jite kuu, te oo guaꞌa.
20Seꞌe ndichi, chi kusii ini tatai jin.
Su seꞌe vasa, chi skexikoi nanai.
21Ñayiu tu jinkuiꞌnu ini, chi kusii ini jin tniuu vasa ja saꞌi.
Su ñayiu jinkuiꞌnu ini, chi jika ndai nuu ichi.
22Nuu tu na in xteku ña jin ñayiu, te skunai jin nagua ndakani ini ja saꞌi.
Su nuu kuaꞌa ñayiu ka xteku ña, te kee guaꞌi jin ja saꞌi.
23Guaꞌa ndevaꞌa kuu ja niꞌo tnoꞌo kaꞌon nuu ka jikan tnoꞌo ña jion,
su guaꞌa ka kuu nuu ja vi mamaa ore niꞌo tnoꞌo kaꞌon.
24Ñayiu ndichi, chi kuaꞌin ichi makaa ndee sukun ja kotekui,
nagua ja kujioi ñuu jiꞌi ja oo ndee ndiꞌi yaꞌa.
25Xnani Jitoꞌo veꞌe ñayiu inu teyii,
su jito guaꞌa ya ñundeꞌi ñaꞌa ni ndondaꞌu.
26Skexiko Jitoꞌo ja ka ndakani ini ñayiu kueꞌe,
su junkuaan ini ya tnoꞌo vii tnoꞌo vaꞌa ka kaꞌan ñayiu ndaa.
27Ñayiu jioꞌo ndevaꞌa ja konevaꞌa kuaꞌi, chi xndendoo kueꞌi ñayiu veꞌi.
Su ñayiu skexiko ja niꞌi uin xuꞌun, te kotekui.
28Ñayiu ndaa, chi ndakani guaꞌa ini na tnoꞌo kuu ja ndajioneꞌi.
Su ñayiu kueꞌe, chi ñama kaꞌin tnoꞌo neꞌe tnoꞌo yichi.
29Jika oo Jitoꞌo nuu ñayiu ka saꞌa jakueꞌe.
Su nini ya tnoꞌo ka kaꞌan ñayiu ndaa nuu ka ndakuatui.
30Ja yeꞌe nduchi nuu ñayiu ndasaꞌa sii ini ña jin inka ñayiu,
te tnoꞌo vii tnoꞌo vaꞌa ja ka ndakani, ndataa jandakuio.
31Ñayiu nini tnoꞌo ja ka ndakani ndaa ña jin ja kotekui,
te koi neꞌu ñayiu ndichi.
32Ñayiu tu nini tnoꞌo ja ka xteku ña jin, te skexikoi mai.
Su ñayiu nini tnoꞌo ja ka ndakani ndaa ña jin, te niꞌi ja jinkuiꞌnu ini.
33Ja yuꞌu niꞌnuo Jitoꞌo kuu ja kutuaꞌo ja kuu ndichio,
te ja saꞌa ndaꞌu saꞌa keo mao kuu ja niꞌo jayiñuꞌu.
Currently Selected:
Proverbios 15: xtnNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
