Proverbios 14
14
1Ñasiꞌi ndichi, chi saꞌa maa ña veꞌe ña.
Su ñaꞌa vasa, chi vi jin ndaꞌa maa ña xnani ña veꞌe ña.
2Ñayiu jika ndaa, chi yuꞌu niꞌnui Jitoꞌo.
Su ñayiu jika ichi kueꞌe, chi skexikoi ya.
3Yuꞌu ñayiu vasa kana tnoꞌo teyii ja saꞌa kueꞌe ña jin.
Su yuꞌu ñayiu ndichi kana tnoꞌo ja jitoi mai.
4Nuu tu na isndiki ka oo, te tu na triu ñuꞌu nuu saka.
Su nuu oo ja ndakui isndiki, te koo kuaꞌa ja kao yun.
5Testiu ndaa, chi ma kaꞌan tnoꞌo de.
Su testiu tnoꞌo, chi ninoꞌo ni tnoꞌo tnoꞌo kaꞌan de.
6Ñayiu kuasun ini, chi ndukui tnoꞌo ndichi, su tu niꞌi.
Su ñayiu jinkuiꞌnu ini, chi masu vijin kuu ja niꞌi tnoꞌo ndichi yun.
7Kujioo jika ni nuu oo ñayiu vasa,
chi ma niꞌi ni tnoꞌo ndichi nui.
8Chi tnoꞌo ndichi ñayiu niꞌnu ini kuu ja jinkuiꞌnu inio ichi jikai.
Su ñayiu vasa, chi tu jini nagua saꞌi, te xndaꞌu ña jin mai.
9Ñayiu vasa, chi ka saꞌa kuasuin yika kuechi ka saꞌi.
Su neꞌu ñayiu ndaa, chi oo jamani.
10Te in in maa ñayiu, chi ka jini tnoꞌo suchi ini ka tnaꞌi nuu anui,
te ma kuu vi kuñaꞌi jasii ini ka oo jin nuu inka ñayiu.
11Te veꞌe ñayiu kueꞌe, chi naa.
Su veꞌe saꞌun nuu oo ñayiu ndaa, chi koo guaꞌa.
12Ka oo ichi ja ka ndakani ini maa ñayiu ja ichi ndaa kuu.
Su sandiꞌi, te jaka ña ichi yun ja vi kui.
13Te vi ndee ja jaku sii ñayiu uꞌu anui,
te sandiꞌi ja kusii ini ñayiu, te kenta tnoꞌo suchi ini.
14Ñayiu vasa, chi kusii ini jin nagua saꞌi,
te ñayiu guaꞌa, chi suni kusii ini jin nagua saꞌi.
15Ñayiu tu jini nagua kuu, chi ndiꞌi ni tnoꞌo ka kaꞌan ñayiu kandijai.
Su ñayiu jinkuiꞌnu ini, chi ndiaꞌa guaꞌi nuu jikai.
16Ñayiu ndichi, chi yuꞌu niꞌnui ia Dios, te kujioi nuu jakueꞌe.
Su ñayiu vasa, chi saꞌa teyii, te tu nagua ndiꞌni saꞌuin.
17Ñayiu ñama kiti ini, chi nani guaa kuu ja tu jiniuꞌu saꞌi.
Te ñayiu kueꞌe ndevaꞌa, chi ka skexiko ña jin.
18Ñayiu tu ka jini nagua kuu, chi ka saꞌa jajin tniuu vasa.
Su ñayiu jinkuiꞌnu ini, chi ka ndukutui jin tnoꞌo ndichi.
19Te ñayiu kueꞌe, chi ka jaꞌnu jiti nuu ñayiu guaꞌa.
Te ñayiu kueꞌe ndevaꞌa, chi vi kokakan taꞌui yuyeꞌe ñayiu ndaa ja vi chituu ña jin.
20Te ñayiu kundaꞌu, chi vi ndee ñayiu ndeka tnaꞌa guaꞌa ka jin skexiko ña.
Su ñayiu kuika, chi kuakuaꞌa ñayiu ka kaꞌan too ña jin.
21Ñayiu skexiko tnaꞌa kuikin, te saꞌi yika kuechi.
Su na taꞌu na ndetu ñayiu kundaꞌu ini ñayiu kundaꞌu.
22Naa ndoñuꞌu ñayiu ndakani ini ja saꞌi jakueꞌe.
Su ñayiu ndakani ini ja saꞌa guaꞌi, chi niꞌi ja kundaꞌu ini ña inka ñayiu vi tnoꞌo ndaa.
23Nuu satniuu ndee ñayiu, te niꞌi guaꞌi.
Su nuu ja maa ni kaꞌin, te tu saꞌi, te kendoo ndaꞌui.
24Ñayiu ndichi, chi ja kuika nevaꞌi kuu na kuinio in jayiñuꞌu ja ni ndukutui.
Te ñayiu vasa, chi ni ndukutui jin ja tu jiniuꞌu ja saꞌi.
25Testiu ndaa, chi skaku niꞌnu de ñayiu.
Su testiu tnoꞌo, chi ninoꞌo ni xndaꞌu ña de.
26Nuu yuꞌu niꞌnuo Jitoꞌo, te kukanu ndaa inio ja oo guaꞌo,
vi oo guaꞌa seꞌo.
27Nuu ka yuꞌu niꞌnuo Jitoꞌo, te taa ja vi kotekuo,
nagua ja vi kaku niꞌnuo nuu ndaꞌa ja jaꞌni ña.
28Nuu tatnuni in rey nuu kuaꞌa ñayiu, te oo jayiñuꞌu nuu de.
Su nuu joo ni ñayiu oo nuu in tee tatnuni, te skunaa de.
29Ñayiu kuekuee kiti ini, chi jinkuiꞌnu guaꞌa ndevaꞌa ini.
Su ñayiu yachi ndevaꞌa ini, chi xneꞌi ja ñayiu vasa kui.
30In ñayiu osii ini, chi ovaꞌi jin yiki kuñui.
Su tnoꞌo kuasun kuu na kuinio in kueꞌe ja xteꞌi nuu yiki.
31Na ñayiu saꞌa ndevaꞌa ña jin ñayiu kundaꞌu, te jiñaꞌi ja kanoo ia ni saꞌa ña jin.
Su ñayiu kundaꞌu ini ña jin ñayiu kundaꞌu yun, te jiñaꞌi jayiñuꞌu nuu ya.
32Ñayiu kueꞌe, chi kanakaui nuu maa jakueꞌe saꞌi yun.
Su ñayiu ndaa, chi visi jiꞌi, su kukanu ini ia Dios.
33Nuu anu ñayiu jinkuiꞌnu ini oo tnoꞌo ndichi.
Su neꞌu ñayiu vasa, chi ni ja tu ka jini tnoꞌo ndichi yun.
34Ñayiu saꞌa ndaa, chi ka saꞌa kaꞌnui ñuu kaꞌnu mai.
Su ñayiu saꞌa yika kuechi, chi ka jiñaꞌi ja kanoo nuu ñui.
35Tee jinokuechi ja jinkuiꞌnu ini, chi kaꞌan ndaꞌu kaꞌan kee ña rey jin de.
Su kiti ini rey yun siki tee jiñaꞌa ja kanoo de.
Currently Selected:
Proverbios 14: xtnNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
