Proverbios 16
16
1Ndakani ini maa ñayiu jin anui nagua kuu ja saꞌi.
Su maa Jitoꞌo guaa kachi ya nagua kuu ja saꞌi.
2Ndiꞌi ni ja ka saꞌa maa ñayiu, ka jini ja guaꞌa ka saꞌi.
Su maa Jitoꞌo guaa sandaa ya a ka ndakani vaꞌa ini axi ka ndakani kueꞌe ini.
3Xndendoo ni nagua saꞌa ni nuu ndaꞌa maa Jitoꞌo,
te kee guaꞌa ni jin nagua ndakani ini ni ja saꞌa ni.
4Ndiꞌi ni saꞌa Jitoꞌo ja vi kunukuechi nuu ya,
te vi ndee ñayiu kueꞌe ni saꞌa ya nagua ja kiꞌinkuei vi kai kiuu sandaa ya kuechi.
5Skexiko ña Jitoꞌo jin ñayiu ka saꞌa teyii mai,
te jandaa ja ma yaꞌa, chi vi tniuyaꞌui ja ka saꞌi.
6Nuu ka kundaꞌu ini tnaꞌa ñayiu vi ka saꞌa ndai, te jakaꞌnu ini ia Dios yika kuechi,
te ja yuꞌu niꞌnu ñayiu Jitoꞌo, kuu ja kujioi nuu jakueꞌe.
7Nuu jinkuaan ini Jitoꞌo ichi ka jika ñayiu,
te vi ndee ñayiu ka kaꞌan uꞌu ña saꞌa ya ja vi koo mani jin.
8Guaꞌa ka kuu ja joo ni niꞌo, su saꞌa ndao,
masu ja niꞌi kuaꞌo jin jakueꞌe saꞌo.
9Ndakani ini maa ñayiu jin anui na ichi kakai.
Su maa Jitoꞌo kuu ia ndeka ña jin nuu ichi jikai.
10Ka kaꞌan rey tnoꞌo ja vaji nuu maa ia Dios,
te tu ka kaꞌan kueꞌe de nuu ka sandaa de kuechi.
11Taka ja chikuaꞌa ndaa kuu kuenta maa Jitoꞌo,
chi maa ya ni saꞌa ndiꞌi ja chikuaꞌa.
12Ka skexiko rey ja vi saꞌa ñayiu jakueꞌe,
chi koo guaꞌa nuu tatnuni de nuu ja vi saꞌa ndaa ñayiu.
13Ka junkuaan ini ña rey jin ñayiu tu ka kaꞌan tnoꞌo,
te ka kutoo de ñayiu ka kaꞌan ndaa.
14Ja kiti ini rey kuu na kuinio ñayiu kaxtnoꞌo ja kaꞌni ña.
Su ñayiu ndichi, chi ndukui ja yaꞌa ini de jin ja kiti ini yun.
15Te nuu osii ini rey xneꞌe ja vi koteku ñayiu,
te javaꞌa saꞌa de kuu na kuinio viko ja kuun sau neꞌe.
16Guaꞌa ka kuu ja niꞌo tnoꞌo ndichi, masu ja niꞌo oro vii ndevaꞌa.
Te guaꞌa ka kuu ja niꞌo tnoꞌo ja jinkuiꞌnu inio, masu ja niꞌo kaa kuu plata.
17Ñayiu jika ichi ndaa, chi kujioi nuu jakueꞌe.
Te na in jito na ichi jikai, te tavaꞌi mai.
18Nuu kuu vixin ñayiu, te skunaa ña jin.
Te nuu saꞌa teyii mai, te kanakaui nuu jakueꞌe.
19Guaꞌa ka kuu ja saꞌa ndaꞌuo mao jin ñayiu ka kuu ndaꞌu,
masu ja vi ndakaꞌndeo nagua ni ka kindeo jin ñayiu ka saꞌa teyii mai.
20Ñayiu tanuu tnoꞌo kaꞌan ia Dios, chi kee vaꞌi.
Te na taꞌu na ndetu ñayiu kukanu ini Jitoꞌo.
21Ñayiu ndichi ini, chi konani ñayiu jinkuiꞌnu ini,
te tnoꞌo luu ja kaꞌin saꞌa ja ka jinkuiꞌnu guaꞌa ka ini ñayiu.
22Ñayiu nevaꞌa tnoꞌo ja jinkuiꞌnu ini kuu na kuinio nuu kee ndute ja jiñaꞌa ja tekui.
Su yaꞌu ja niꞌi ñayiu vasa yun kuu tniuu vasa ja saꞌi.
23Ñayiu ndichi ini, chi jini na tnoꞌo kaꞌin,
te tnoꞌo kaꞌin yun saꞌa ja jino ini inka ñayiu.
24Chi tnoꞌo vii ja kaꞌin yun kuu na kuinio jioo nduxi,
te kuu asin ini anu ñayiu, te ndasaꞌa yiki kuñui.
25Ka oo ichi ja ka ndakani ini maa ñayiu ja ichi ndaa kuu,
su sandiꞌi, te jaka ña ichi yun ja vi kui.
26Ja kokin ñayiu kuu ja satniui ja jaꞌa mai,
chi ja kokin yun tenini ña ja satniui.
27Ñayiu kueꞌe, chi jate kunu ja skanakau inka ñayiu,
te tnoꞌo ja kaꞌin kuu na kuinio ñuꞌu ja teñuꞌu ña jin inka ñayiu.
28Ñayiu kueꞌe, chi ndakoi ja tetnaꞌi,
te ñayiu tnoꞌo, chi saꞌa siin ñayiu ndeka tnaꞌa guaꞌa ka jin.
29Ñayiu niꞌi ini, chi xndaꞌui tnaꞌa kuikin,
te jakai ñayiu nuu ichi kueꞌe.
30Ndakuene ñayiu nuu ndakani kueꞌe ini,
te nuu ndakayiꞌi ñii yuꞌi, te ja ni saꞌi jakueꞌe.
31Te vixi kuu in jayiñuꞌu ja ni ndukutu xini ñayiu,
ja ni niꞌi nuu jikai nuu ichi ndaa.
32Guaꞌa ka ñayiu kuu ñayiu kuekuee kiti ini, saa ñayiu ndakui.
Te guaꞌa ka kuu jin ñayiu jaꞌnu niꞌnu mai saa ñayiu kundee tatnuni nuu in ñuu kaꞌnu.
33Ka skunta ñayiu nuu jiti ja ka jitotnuni.
Su maa Jitoꞌo guaa chikuaꞌa ya naxa kokuu jin ja ka jitotnuni yun.
Currently Selected:
Proverbios 16: xtnNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
