Zabúr 74
74
Ásaf ká Mashkíl.
1Ai Ḳhudá, tú ne ham ko hamesha ke liye kyúṉ tark kar diyá?
Terí charágáh kí bheṛoṉ par terá qahr kyúṉ bhaṛak rahá hai?
2Apní jamá‘at ko jise tú ne qadím se ḳharídá hai,
Jis ká tú ne fidya diyá táki terí mírás ká qabíla ho,
Aur koh i Siyyún ko jis par tú ne sukúnat kí hai, yád kar.
3Apne qadam dáimí khanḍaroṉ kí taraf baṛhá,
Ya‘ní un sab ḳharábíoṉ kí taraf jo dushman ne maqdis meṉ kí haiṉ.
4Tere majma‘ meṉ tere muḳhálif garajte rahe haiṉ;
Nishán ke liye unhoṉ ne apne hí jhanḍe khaṛe kiye haiṉ.
5Wuh un ádmíoṉ kí mánind the,
Jo gunján daraḳhtoṉ par kulháṛe chaláte haiṉ.
6Aur ab wuh us kí sárí naqshkárí ko
Kulháṛí aur hathauṛoṉ se bi’lkull toṛe ḍálte haiṉ.
7Unhoṉ ne tere maqdis meṉ ág lagá dí hai,
Aur tere nám ke maskan ko zamín tak mismár karke nápák kiyá hai.
8Unhoṉ ne apne dil meṉ kahá hai,
Ham un ko bi’lkull wírán kar ḍáleṉ:
Unhoṉ ne is mulk meṉ Ḳhudá ke sab ‘ibádatḳhánoṉ ko jalá diyá hai.
9Hamáre nishán nazar nahíṉ áte:
Aur koí nabí nahíṉ rahá;
Aur ham meṉ koí nahíṉ jántá ki yih hál kab tak rahegá.
10Ai Ḳhudá, muḳhálif kab tak ta‘nazaní kartá rahegá?
Kyá dushman hamesha tere nám par kufr baktá rahegá?
11Tú apná háth kyúṉ roktá hai?
Apná dahiná háth bag̣al se nikál aur faná kar.
12Ḳhudá qadím se merá bádsháh hai,
Jo zamín par naját baḳhshtá hai.
13Tú ne apní qudrat se samundar ke do hisse kar diye:
Tú pání meṉ azhdaháoṉ ke sir kuchaltá hai.
14Tú ne lawiyátán ke sir ke ṭukṛe kiye,
Aur use biyábán ke rahnewáloṉ kí ḳhurák banáyá.
15Tú ne chashme aur sailáb járí kiye:
Tú ne baṛe baṛe daryáoṉ ko ḳhushk kar ḍálá.
16Din terá hai, rát bhí terí hí hai:
Núr aur áftáb ko tú hí ne taiyár kiyá.
17Zamín kí tamám hudúd tú hí ne ṭhahráí haiṉ:
Garmí aur sardí ke mausim tú hí ne banáe.
18Ai Ḳhudáwand, ise yád rakh, ki dushman ne ta‘nazaní kí hai;
Aur bewuqúf qaum ne tere nám kí takfír kí hai.
19Apní fáḳhta kí ján ko janglí jánwar ke hawále na kar;
Apne g̣aríboṉ kí ján ko hamesha ke liye bhúl na já.
20Apne ‘ahd ká ḳhayál farmá,
Kyúṉki zamín ke tárík maqám zulm ke maskanoṉ se bhare haiṉ.
21Mazlúm sharminda hokar na lauṭe:
G̣aríb aur muhtáj tere nám kí ta‘ríf kareṉ.
22Uṭh, ai Ḳhudá, áp hí apní wakálat kar:
Yád kar ki ahmaq din bhar tujh par kaisí ta‘nazaní kartá hai.
23Apne dushmanoṉ kí áwáz ko bhúl na já:
Tere muḳhálifoṉ ká hangáma barpá hotá rahtá hai.
Currently Selected:
Zabúr 74: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)