Zabúr 17
17
Dáúd kí Du‘á.
1Ai Ḳhudáwand, haqq ko sun, merí faryád par tawajjuh kar;
Merí du‘á par jo beriyá laboṉ se nikaltí hai kán lagá.
2Merá faisala tere huzúr se sádir ho:
Terí áṉkheṉ rástí ko dekheṉ.
3Tú ne mere dil ko ázmá liyá hai; tú ne rát ko merí nigrání kí;
Tú ne mujhe parkhá aur kuchh khoṭ na páyá;
Maiṉ ne ṭhán liyá hai ki merá muṉh ḳhatá na kare.
4Insání kámoṉ meṉ tere laboṉ ke kalám kí madad se
Maiṉ zálimoṉ kí ráhoṉ se báz rahá húṉ.
5Mere qadam tere rástoṉ par qáim rahe haiṉ,
Mere páṉw phisale nahíṉ.
6Ai Ḳhudá, maiṉ ne tujh se du‘á kí hai, kyúṉki tú mujhe jawáb degá:
Merí taraf kán jhuká aur merí ‘arz sun le.
7Tú jo apne dahine háth se apne tawakkul karnewáloṉ ko
Un ke muḳhálifoṉ se bachátá hai, apní ‘ajíb shafaqat dikhá.
8Mujhe áṉkh kí putlí kí tarah mahfúz rakh,
Mujhe apne paroṉ ke sáye meṉ chhipá le.
9Un sharíroṉ se jo mujh par zulm karte haiṉ.
Mere jání dushmanoṉ se jo mujhe ghere húe haiṉ.
10Unhoṉ ne apne diloṉ ko saḳht kiyá hai,
Wuh apne muṉh se baṛa bol bolte haiṉ.
11Unhoṉ ne qadam qadam par ham ko gherá hai:
Wuh ták lagáe haiṉ ki ham ko zamín par paṭak deṉ.
12Wuh us babar kí mánind hai jo pháṛne par harís ho:
Wuh goyá jawán babar hai jo poshída jagahoṉ meṉ dabká húá hai.
13Uṭh, ai Ḳhudáwand;
Us ká sámná kar, use paṭak de:
Apní talwár se merí ján ko sharír se bachá le;
14Apne háth se, ai Ḳhudáwand, mujhe logoṉ se bachá,
Ya‘ní dunyá ke logoṉ se jin ká baḳhra isí zindagí meṉ hai,
Aur jin ká peṭ tú apne zaḳhíre se bhartá hai:
Un kí aulád bhí hasb i murád hai;
Wuh apná báqí mál apne bachchoṉ ke liye chhoṛ játe haiṉ.
15Par maiṉ to sadáqat meṉ terá dídár hásil karúṉgá:
Maiṉ jab jágúṉgá to terí shabáhat se ser húṉgá.
Currently Selected:
Zabúr 17: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
