Gintí 9
9
1Baní Isráíl ke mulk i Misr se nikalne ke dúsre baras ke pahle mahíne meṉ Ḳhudáwand ne dasht i Síná meṉ Músá se kahá, ki 2Baní Isráíl ‘íd i fasah us ke mu‘aiyan waqt par manáeṉ. 3Isí mahíne kí chaudahwíṉ táríḳh kí shám ko tum waqt i mu‘aiyan par yih ‘íd manáná, aur jitne us ke áín aur rusúm haiṉ, un sabhoṉ ke mutábiq use manáná. 4So Músá ne baní Isráíl ko hukm kiyá, ki ‘íd i fasah kareṉ. 5Aur unhoṉ ne pahle mahíne kí chaudahwíṉ táríḳh kí shám ko dasht i Síná meṉ ‘íd i fasah kí; aur baní Isráíl ne sab par, jo Ḳhudáwand ne Músá ko hukm diyá thá, ‘amal kiyá. 6Aur kaí ádmí aise the jo kisí lásh ke sabab se nápák ho gaye the, wuh us roz fasah na kar sake; so wuh usí din Músá aur Hárún ke pás áe, 7aur Músá se kahne lage, ki Ham ek lásh ke sabab se nápák ho rahe haiṉ, phir bhí ham âur Isráílíoṉ ke sáth waqt i mu‘aiyan par Ḳhudáwand kí qurbání guzránne se kyúṉ roke jáeṉ? 8Músá ne un se kahá, Ṭhahar jáo: maiṉ zará sun lúṉ, ki Ḳhudáwand tumháre haqq meṉ kyá hukm kartá hai.
9Aur Ḳhudáwand ne Músá se kahá, 10Baní Isráíl se kah, ki Agar koí tum meṉ se, yá tumhárí nasl meṉ se, kisí lásh ke sabab se nápák ho jáe, yá wuh kahíṉ dúr safar meṉ ho, taubhí wuh Ḳhudáwand ke liye ‘íd i fasah kare. 11Wuh dúsre mahíne kí chaudahwíṉ táríḳh kí shám ko yih ‘íd manáeṉ aur qurbání ke gosht ko beḳhamírí roṭiyoṉ aur kaṛwí tarkáríoṉ ke sáth kháeṉ. 12Wuh us meṉ se kuchh bhí subh ke liye báqí na chhoṛeṉ, aur na us kí koí haḍḍí toṛeṉ, aur fasah ko us ke sáre áín ke mutábiq máneṉ. 13Lekin jo ádmí pák ho, aur safar meṉ bhí na ho, agar wuh fasah karne se báz rahe, to wuh ádmí apní qaum meṉ se káṭ ḍálá jáegá; kyúṉki us ne mu‘aiyan waqt par Ḳhudáwand kí qurbání nahíṉ guzrání; so us ádmí ká gunáh usí ke sir lagegá. 14Aur agar koí pardesí tum meṉ búd o básh kartá ho, aur wuh Ḳhudáwand ke liye fasah karná cháhe, to wuh fasah ke áín aur rusúm ke mutábiq use máne: tum desí aur pardesí donoṉ ke liye ek hí áín rakhná.
15Aur jis din maskan, ya‘ní ḳhaima e shahádat, nasb húá, usí din abr us par chhá gayá, aur shám ko wuh maskan par ág sá dikháí diyá, aur subh tak waisá hí rahá. 16Aur hamesha aisá hí húá kartá thá, ki abr us par chháyá rahtá aur rát ko ág dikháí detí thí. 17Aur jab maskan par se wuh abr uṭh játá, to baní Isráíl kúch karte the, aur jis jagah wuh abr jákar ṭhahar játá, wahíṉ baní Isráíl ḳhaime lagáte the. 18Ḳhudáwand ke hukm se baní Isráíl kúch karte, aur Ḳhudáwand hí ke hukm se wuh ḳhaime lagáte the: aur jab tak abr maskan par ṭhahrá rahtá, wuh apne ḍere ḍále paṛe rahte the. 19Aur jab abr maskan par bahut dinoṉ tak ṭhahrá rahtá, to baní Isráíl Ḳhudáwand ke hukm ko mánte, aur kúch nahín karte the. 20Aur kabhí kabhí wuh abr chand dinoṉ tak maskan par rahtá, aur tab bhí wuh Ḳhudáwand ke hukm se ḍere ḍále rahte, aur Ḳhudáwand hí ke hukm se wuh kúch karte the. 21Phir kabhí kabhí wuh abr shám se subh tak hí rahtá, to jab wuh subh ko uṭh játá, tab wuh kúch karte the: aur agar wuh rát din barábar rahtá, to jab wuh uṭh játá, tab hí wuh kúch karte the. 22Aur jab tak wuh abr maskan par ṭhahrá rahtá, ḳhwáh do din, yá ek mahína, yá ek baras ho, tab tak baní Isráíl apne ḳhaimoṉ meṉ muqím rahte, aur kúch nahíṉ karte the: par jab wuh uṭh játá, to wuh kúch karte the. 23G̣araz wuh Ḳhudáwand ke hukm se maqám karte, aur Ḳhudáwand hí ke hukm se kúch karte the: aur jo hukm Ḳhudáwand Músá kí ma‘rifat detá, wuh Ḳhudáwand ke us hukm ko máná karte the.
Currently Selected:
Gintí 9: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)