Gintí 10
10
1Aur Ḳhudáwand ne Músá se kahá, ki 2Apne liye chándí ke do narsinge banwá: wuh donoṉ ghaṛke banáe jáeṉ: tú un ko jamá‘at ke buláne aur lashkaroṉ ke kúch ke liye, kám meṉ láná. 3Aur jab wuh donoṉ narsinge phúṉkeṉ, to sárí jamá‘at ḳhaima e ijtimá‘ ke darwáze par tere pás ikaṭṭhí ho jáe. 4Aur agar ek hí phúṉkeṉ, to wuh raís jo hazároṉ Isráílíoṉ ke sardár haiṉ tere pás jama‘ hoṉ. 5Aur jab tum sáṉs báṉdhkar zor se phúṉko to wuh lashkar jo mashriq kí taraf haiṉ kúch kareṉ. 6Jab tum dobára sáṉs báṉdhkar zor se phúṉko, to un lashkaroṉ ká, jo junúb kí taraf haiṉ, kúch ho: so kúch ke liye sáṉs báṉdhkar zor se narsingá phúṉká kareṉ. 7Lekin jab jamá‘at ko jama‘ karná ho, tab bhí phúṉkná, par sáṉs báṉdhkar zor se na phúṉkná. 8Aur Hárún ke beṭe jo káhin haiṉ wuh narsinge phúṉká kareṉ: yihí áín sadá tumhárí nasl dar nasl qáim rahe. 9Aur jab tum apne mulk meṉ aise dushman se jo tum ko satátá ho laṛne ko niklo, to tum narsingoṉ ko sáṉs báṉdhkar zor se phúṉkná; is hál meṉ Ḳhudáwand tumháre Ḳhudá ke huzúr tumhárí yád hogí, aur tum apne dushmanoṉ se naját páoge. 10Aur tum apní ḳhushí ke din, aur apní muqarrara ‘ídoṉ ke din, aur apne mahínoṉ ke shurú‘ meṉ, apní soḳhtaní qurbáníoṉ aur salámatí kí qurbáníoṉ ke waqt narsinge phúṉkná, táki un se tumháre Ḳhudá ke huzúr tumhárí yádgárí ho. Maiṉ Ḳhudáwand tumhárá Ḳhudá húṉ.
11Aur dúsre sál ke dúsre mahíne kí bíswíṉ táríḳh ko wuh abr shahádat ke maskan par se uṭh gayá. 12Tab baní Isráíl dasht i Síná se kúch karke nikle, aur wuh abr dasht i Fárán meṉ ṭhahar gayá. 13So Ḳhudáwand ke us hukm ke mutábiq, jo us ne Músá kí ma‘rifat diyá thá, un ká pahlá kúch húá. 14Aur sab se pahle baní Yahúdáh ke lashkar ká hanḍá rawána húá, aur wuh apne daloṉ ke mutábiq chale: un ke lashkar ká sardár ‘Ammínadáb ká beṭá Nahson thá. 15Aur Ishkár ke qabíle ke lashkar ká sardár Zug̣r ká beṭá Nataníel thá. 16Aur Zabúlún ke qabíle ke lashkar ká sardár Helon ká beṭá Ilíáb thá. 17Phir maskan utárá gayá, aur baní Jairson aur baní Mirárí, jo maskan ko uṭháte the, rawána húe. 18Phir Rúbin ke lashkar ká jhanḍá áge baṛhá, aur wuh apne daloṉ ke mutábiq chale: Shadíúr ká beṭá Ilísúr un ke lashkar ká sardár thá. 19Aur Shama‘ún ke qabíle ke lashkar ká sardár Súríshaddaí ká beṭá Salúmíel thá. 20Aur Jadd ke qabíle ke lashkar ká sardár Da‘úel ká beṭá Ilyásaf thá. 21Phir Qihátíoṉ ne jo maqdis ko uṭháte the kúch kiyá: aur un ke pahuṉchne tak maskan khaṛá kar diyá játá thá. 22Phir baní Ifráím ke lashkar ká jhanḍá niklá, aur wuh apne daloṉ ke mutábiq chale: un ke lashkar ká sardár ‘Ammíhúd ká beṭá Ilísama‘ thá. 23Aur Munassí ke qabíle ke lashkar ká sardár Fadáhsúr ká beṭá Jamlíel thá. 24Aur Binyamín ke qabíle ke lashkar ká sardár Jida‘úní ká beṭá Abidán thá. 25Aur baní Dán ke lashkar ká jhanḍá un ke sab lashkaroṉ ke píchhe píchhe rawána húá, aur wuh apne daloṉ ke mutábiq chale: un ke lashkar ká sardár ‘Ammíshaddaí ká beṭá Aḳhí‘azar thá. 26Aur Áshar ke qabíle ke lashkar ká sardár ‘Akrán ká beṭá Faja‘íel thá. 27Aur Naftálí ke qabíle ke lashkar ká sardár ‘Enán ká beṭá Aḳhíra‘ thá. 28So baní Isráíl isí tarah apne daloṉ ke mutábiq kúch karte aur áge rawána hote the.
29So Músá ne apne ḳhusar Ra‘úel Midyání ke beṭe Hobáb se kahá, ki Ham us jagah já rahe haiṉ, jis kí bábat Ḳhudáwand ne kahá hai, ki Maiṉ use tum ko dúṉgá: so tú bhí sáth chal, aur ham tere sáth nekí kareṉge; kyúṉki Ḳhudáwand ne baní Isráíl se nekí ká wa‘da kiyá hai. 30Us ne use jawáb diyá, ki Maiṉ nahíṉ chaltá, balki maiṉ apne watan ko aur apne rishtadároṉ meṉ lauṭkar jáúṉgá. 31Tab Músá ne kahá, ki Ham ko chhoṛ mat, kyúṉki yih tujh ko ma‘lúm hai, ki ham ko biyábán meṉ kis tarah ḳhaimazan honá cháhiye; so tú hamáre liye áṉkhoṉ ká kám degá, 32aur agar tú hamáre sáth chale, to itní bát zarúr hogí, ki jo nekí Ḳhudáwand ham se kare, wuhí ham tujh se kareṉge.
33Phir wuh Ḳhudáwand ke paháṛ se safar karke tín din kí ráh chale, aur tínoṉ din ke safar meṉ Ḳhudáwand ke ‘ahd ká sandúq un ke liye árámgáh talásh kartá húá un ke áge áge chaltá rahá. 34Aur jab wuh lashkargáh se kúch karte, to Ḳhudáwand ká abr din bhar un ke úpar chháyá rahtá thá.
35Aur sandúq ke kúch ke waqt Músá yih kahá kartá, Uṭh, ai Ḳhudáwand, tere dushman paráganda ho jáeṉ, aur jo tujh se kína rakhte haiṉ, wuh tere áge se bhágeṉ; 36aur jab wuh ṭhahar játá, to wuh yih kahtá thá, ki Ai Ḳhudáwand, hazároṉ hazár Isráílíoṉ meṉ lauṭkar á já.
Currently Selected:
Gintí 10: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
