Nahamiyáh 5
5
1Phir logoṉ aur un kí bíwiyoṉ kí taraf se un ke Yahúdí bháiyoṉ par baṛí shikáyat húí. 2Kyúṉki kaí aise the jo kahte the, ki Ham aur hamáre beṭe beṭiyáṉ bahut haiṉ: so ham anáj le leṉ, táki khákar jíte raheṉ. 3Aur ba‘z aise bhí the jo kahte the, ki Ham apne khetoṉ, aur angúristánoṉ, aur makánoṉ ko girau rakhte haiṉ, táki ham kál meṉ anáj le leṉ. 4Aur kitne kahte the, ki Ham ne apne khetoṉ aur angúristánoṉ par bádsháh ke ḳhiráj ke liye rupiya qarz liyá hai. 5Par hamáre jism to hamáre bháiyoṉ ke jism kí tarah haiṉ, aur hamáre bálbachche aise haiṉ, jaise un ke bálbachche: aur dekho, ham apne beṭe beṭiyoṉ ko naukar hone ke liye g̣ulámí ke supurd karte haiṉ, aur hamári beṭiyoṉ meṉ se ba‘z lauṉḍiyáṉ ban chukí haiṉ, aur hamárá kuchh bas nahíṉ chaltá, kyúṉki hamáre khet aur angúristán auroṉ ke qabze meṉ haiṉ. 6Jab maiṉ ne un kí faryád aur yih báteṉ suníṉ, to maiṉ bahut g̣ussa húá. 7Aur maiṉ ne apne dil meṉ sochá, aur amíroṉ aur hákimoṉ ko malámat karke un se kahá, Tum meṉ se har ek apne bháí se súd letá hai. Aur maiṉ ne ek baṛí jamá‘at ko un ke ḳhiláf jama‘ kiyá. 8Aur maiṉ ne un se kahá, ki Ham ne apne maqdúr ke muwáfiq apne Yahúdí bháiyoṉ ko jo âur qaumoṉ ke háth bech diye gaye the dám dekar chhuṛáyá; so kyá tum apne hí bháiyoṉ ko bechoge? aur kyá wuh hamáre hí háth meṉ beche jáeṉge? Tab wuh chup rahe, aur un ko kuchh jawáb na sújhá. 9Aur maiṉ ne yih bhí kahá, ki Yih kám jo tum karte ho, ṭhík nahíṉ: kyá âur qaumoṉ kí malámat ke sabab se, jo hamárí dushman haiṉ, tum ko Ḳhudá ke ḳhauf meṉ chalná lázim nahíṉ? 10Maiṉ bhí, aur mere bháí aur mere naukar bhí un ko rupiya aur g̣alla súd par dete haiṉ; par maiṉ tumhárí minnat kartá húṉ ki ham sab súd lená chhoṛ deṉ. 11Maiṉ tumhárí minnat kartá húṉ ki áj hí ke din un ke khetoṉ aur angúristánoṉ aur zaitún ke bág̣oṉ aur gharoṉ ko aur us rupaye, aur anáj, aur mai, aur tel ke sauweṉ hisse ko jo tum un se jabran lete ho, un ko wápas kar do. 12Tab unhoṉ ne kahá, ki Ham in ko wápas kar deṉge, aur un se kuchh na máṉgeṉge; jaisá tú kahtá hai, ham waisá hí kareṉge. Phir maiṉ ne káhinoṉ ko buláyá, aur un se qasam lí, ki wuh isí wa‘de ke mutábiq kareṉge. 13Phir maiṉ ne apná dáman jháṛá aur kahá, ki Isí tarah se Ḳhudá har shaḳhs ko, jo apne is wa‘de par ‘amal na kare, us ke ghar se aur us ke károbár se jháṛ ḍále; wuh isí tarah jháṛ diyá aur nikál pheṉká jáe. Tab sárí jamá‘at ne kahá, Ámín, aur Ḳhudáwand kí hamd kí. Aur logoṉ ne is wa‘de ke mutábiq kám kiyá. 14‘Aláwa is ke, jis waqt se maiṉ Yahúdáh ke mulk meṉ hákim muqarrar húá, ya‘ní Artaḳhshashatá bádsháh ke bísweṉ baras se battísweṉ baras tak, g̣araz bárah baras, maiṉ ne aur mere bháiyoṉ ne hákim hone kí roṭí na kháí. 15Lekin agle hákim jo mujh se pahle the ra‘íyat par ek bár the, aur ‘aláwa chálís misqál chándí ke roṭí aur mai un se lete the; balki un ke naukar bhí logoṉ par hukúmat jatáte the: lekin maiṉ ne Ḳhudá ke ḳhauf ke sabab se aisá na kiyá. 16Balki maiṉ is shahrpanáh ke kám meṉ barábar mashg̣úl rahá; aur ham ne kuchh zamín bhí nahíṉ ḳharídí; aur mere sab naukar waháṉ kám ke liye ikaṭṭhe rahte the. 17Is ke siwá un logoṉ ke ‘aláwa, jo hamáre ás pás kí qaumoṉ meṉ se hamáre pás áte the, Yahúdíoṉ aur sardároṉ meṉ se ḍeṛh sau ádmí mere dastarḳhwán par hote the. 18Aur ek bail, aur chha moṭí moṭí bheṛeṉ ek din ke liye taiyár hotí thíṉ; murg̣íáṉ bhí mere liye taiyár kí játí thíṉ; aur das das din ke ba‘d har qism kí mai ká zaḳhíra taiyár hotá thá: báwujúd is sab ke, maiṉ ne hákim hone kí roṭí talab na kí, kyúṉki in logoṉ par g̣ulámí girán thí. 19Ai mere Ḳhudá, jo kuchh maiṉ ne in logoṉ ke liye kiyá hai use tú mere haqq meṉ bhaláí ke liye yád rakh.
Currently Selected:
Nahamiyáh 5: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
