Nahamiyáh 4
4
1Lekin aisá húá, ki jab Sanballat ne suná, ki ham shahrpanáh baná rahe haiṉ, to wuh jal gayá, aur bahut g̣usse húá, aur Yahúdíoṉ ko ṭhaṭṭhoṉ meṉ uṛáne lagá. 2Aur wuh apne bháiyoṉ aur Sámariya ke lashkar ke áge yúṉ kahne lagá, ki Yih kamzor Yahúdí kyá kar rahe haiṉ? Kyá yih apne gird morchabandí kareṉge? kyá wuh qurbání chaṛháeṉge? kyá wuh ek hí din meṉ sab kuchh kar chukeṉge? kyá wuh jale húe pattharoṉ ko kúṛe ke ḍheroṉ meṉ se nikálkar phir naye kar deṉge? 3Aur Túbiyáh ‘Ammoní us ke pás khaṛá thá, so wuh kahne lagá, Jo kuchh wuh baná rahe haiṉ, agar us par lomṛí chaṛh jáe, to wuh un kí patthar kí shahrpanáh ko girá degí. 4Sun le, ai hamáre Ḳhudá, kyúṉki hamárí hiqárat hotí hai, aur un kí malámat un hí ke sir par ḍál, aur asírí ke mulk meṉ un ko g̣áratgaroṉ ke hawála kar de: 5aur un kí badí ko na ḍháṉk, aur un kí ḳhatá tere huzúr se miṭáí na jáe: kyúṉki unhoṉ ne mi‘mároṉ ke sámne tujhe g̣ussa diláyá hai. 6G̣araz ham díwár banáte rahe, aur sárí díwár ádhí balandí tak joṛí gayí; kyúṉki log dil lagákar kám karte the.
7Par jab Sanballat, aur Túbiyáh, aur ‘Araboṉ, aur ‘Ammoníoṉ aur Ashdúdíoṉ ne suná, ki Yarúshalem kí fasíl marammat hotí játí hai, aur daráṛeṉ band hone lagíṉ, to wuh jal gaye. 8Aur sabhoṉ ne milkar bandish báṉdhí, ki ákar Yarúshalem se laṛeṉ, aur waháṉ pareshání paidá kar deṉ. 9Par ham ne apne Ḳhudá se du‘á kí, aur un ke sabab se din aur rát un ke muqábale meṉ pahrá biṭháe rakkhá. 10Aur Yahúdáh kahne lagá, kí Bojh uṭhánewáloṉ ká zor ghaṭ gayá, aur malba bahut hai; so ham díwár nahíṉ baná sakte haiṉ. 11Aur hamáre dushman kahne lage, ki Jab tak ham un ke bích pahuṉchkar un ko qatl na kar ḍáleṉ, aur kám mauqúf na kar deṉ, tab tak un ko na ma‘lúm hogá, na wuh dekheṉge. 12Aur jab wuh Yahúdí jo un ke ás pás rahte the áe, to unhoṉ ne sab jagahoṉ se das bár âkar ham se kahá, ki Tum ko hamáre pás lauṭ áná zarúr hai; 13is liye maiṉ ne shahrpanáh ke píchhe kí jagah ke sab se níche hissoṉ meṉ jaháṉ jaháṉ khulá thá logoṉ ko apní apní talwáreṉ aur barchhiyáṉ aur kamáneṉ liye húe un ke gharánoṉ ke mutábiq biṭhá diyá. 14Tab maiṉ dekhkar uṭhá, aur amíroṉ aur hákimoṉ, aur báqí logoṉ se kahá, ki Tum un se mat ḍaro: Ḳhudáwand ko jo buzurg aur muhíb hai yád karo, aur apne bháiyoṉ, aur beṭe beṭiyoṉ, aur apní bíwiyoṉ, aur gharoṉ ke liye laṛo. 15Aur jab hamáre dushmanoṉ ne suná, ki yih bát ham ko ma‘lúm ho gayí, aur Ḳhudá ne un ká mansúba bátil kar diyá, to ham sab ke sab shahrpanáh ko apne apne kám par lauṭe. 16Aur aisá húá, ki us din se mere ádhe naukar kám meṉ lag játe, aur ádhe barchhiyáṉ aur ḍháleṉ aur kamáneṉ liye aur baktar pahine rahte the: aur wuh jo hákim the Yahúdáh ke sáre ḳhándán ke píchhe maujúd rahte the. 17So jo log díwár banáte the, aur jo bojh uṭháte aur ḍhote the, har ek apne ek hath se kám kartá thá, aur dúsre meṉ apná hathyár liye rahtá thá. 18Aur mi‘mároṉ meṉ se har ek ádmí apní talwár apní kamar se báṉdhe húe kám kartá thá. Aur wuh jo narsingá phúṉktá thá, mere pás rahtá thá. 19Aur maiṉ ne amíroṉ, aur hákimoṉ, aur báqí logoṉ se kahá, ki Kám to baṛá aur phailá húá hai, aur ham díwár par alag alag ek dúsre se dúr rahte haiṉ: 20so jidhar se narsingá tum ko sunáí de, udhar hí tum hamáre pás chale áná; hamárá Ḳhudá hamáre liye laṛegá. 21Yúṉ ham kám karte rahe; aur un meṉ se ádhe log pau phaṭne ke waqt se tároṉ ke dikháí dene tak barchhiyáṉ liye rahte the. 22Aur maiṉ ne usí mauqa‘ par logoṉ se yih bhí kah diyá thá, ki Har shaḳhs apne naukar ko lekar Yarúshalem meṉ rát káṭá kare, táki rát ko wuh hamáre liye pahrá diyá kareṉ, aur din ko kam kareṉ. 23So na to maiṉ, na mere bháí, na mere naukar, aur na pahre ke log jo mere pairau the, kabhí apne kapṛe utárte the, balki har shaḳhs hathyár liye húe pání ke pás játá thá.
Currently Selected:
Nahamiyáh 4: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
