Míkáh 4
4
1Lekin áḳhirí dinoṉ meṉ yúṉ hogá, ki Ḳhudáwand ke ghar ká paháṛ paháṛoṉ kí choṭí par qáim kiyá jáegá, aur sab ṭíloṉ se baland hogá, aur ummateṉ waháṉ pahuṉcheṉgí. 2Aur bahut sí qaumeṉ áeṉgí, aur kaheṉgí, Áo, Ḳhudáwand ke paháṛ par chaṛheṉ, aur Ya‘qúb ke Ḳhudá ke ghar meṉ dáḳhil hoṉ, aur wuh apní ráheṉ ham ko batáegá; aur ham us ke rástoṉ par chaleṉge: kyúṉki sharí‘at Siyyún se, aur Ḳhudáwand ká kalám Yarúshalem se sádir hogá. 3Aur wuh bahut sí ummatoṉ ke darmiyán ‘adálat karegá, aur dúr kí zoráwar qaumoṉ ko ḍáṉṭegá; aur wuh apní talwároṉ ko toṛkar pháleṉ, aur apne bháloṉ ko haṉsúe baná ḍáleṉge; aur qaum qaum par talwár na chaláegí, aur wuh phir kabhí jang karná na síkheṉge. 4Tab har ek ádmí apní ták aur apne anjír ke daraḳht ke níche baiṭhegá, aur un ko koí na ḍaráegá: kyúṉki Rabb u’l afwáj ne apne muṉh se yih farmáyá hai. 5Kyúṉki sab ummateṉ apne apne ma‘búd ke nám se chaleṉgí, par ham abadu’l ábád tak Ḳhudáwand apne Ḳhudá ke nám se chaleṉge.
6 Ḳhudáwand farmátá hai, ki Maiṉ us roz laṉgṛoṉ ko jama‘ karúṉgá, aur jo háṉk diye gaye, aur jin ko maiṉ ne dukh diyá faráham karúṉgá. 7Aur laṉgṛoṉ ko baqiya, aur jiláwatanoṉ ko zoráwar qaum banáúṉgá; aur Ḳhudáwand koh i Siyyún par ab se abadu’l ábád tak un par saltanat karegá. 8Ai galle kí dídgáh, ai bint i Siyyún kí paháṛí, yih tere hí liye hai; qadím saltanat, ya‘ní duḳhtar i Yarúshalem kí bádsháhí tujhe milegí. 9Ab tú kyúṉ chillátí hai, goyá dard i zih meṉ mubtalá hai? kyá tujh meṉ koí bádsháh nahíṉ? kyá terá saláhkár nest ho gayá? 10Ai bint i Siyyún, zachche kí mánind taklíf uṭhá, aur dard i zih meṉ mubtalá ho: kyúṉki ab tú shahr se ḳhárij hokar maidán meṉ rahegí, aur Bábul tak jáegí; waháṉ tú riháí páegí; aur wahíṉ Ḳhudáwand tujh ko tere dushmanoṉ ke háth se chhuṛáegá. 11Ab bahut sí qaumeṉ tere ḳhiláf jama‘ húí haiṉ, aur kahtí haiṉ, Hamárí áṉkheṉ Siyyún kí ruswáí dekheṉ. 12Par wuh Ḳhudáwand kí tadábír se ágáh nahíṉ, aur us kí maslahat ko nahíṉ samajhtíṉ; kyúṉki wuh un ko khalíhán ke púloṉ kí tarah jama‘ karegá. 13Ai bint i Siyyún, uṭh, aur páemál kar; kyúṉki maiṉ tere síṉg ko lohá, aur tere khuroṉ ko pítal banáúṉgá, aur tú bahut sí ummatoṉ ko ṭukṛe ṭukṛe karegí; un ke zaḳhíre Ḳhudáwand kí nazr karegí, aur un ká mál Rabb u’l ‘álamín ke huzúr láegí.
Currently Selected:
Míkáh 4: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
