Míkáh 3
3
1Aur maiṉ ne kahá, Ai Ya‘qúb ke sardáro, aur baní Isráíl ke hákimo, suno; kyá munásib nahíṉ ki tum ‘adálat se wáqif ho? 2Tum nekí se ‘adáwat, aur badí se mahabbat rakhte ho; aur logoṉ kí khál utárte, aur un kí haḍḍiyoṉ par se gosht nochte ho; 3aur mere logoṉ ká gosht kháte ho, aur un kí khál utárte; aur un kí haḍḍiyoṉ ko toṛte, aur un ko ṭukṛe ṭukṛe karte ho, goyá wuh háṉḍí aur deg ke liye gosht haiṉ. 4Tab wuh Ḳhudáwand ko pukáreṉge, par wuh un kí na sunegá; háṉ, wuh us waqt un se muṉh pher legá, kyúṉki un ke a‘mál bure haiṉ. 5Un nabíoṉ ke haqq meṉ jo mere logoṉ ko gumráh karte haiṉ jo luqma pákar Salámatí, Salámatí, pukárte haiṉ, lekin agar koí kháne ko na de, to us se laṛne ko taiyár hote haiṉ, Ḳhudáwand yúṉ farmátá hai: 6ki Ab tum par rát ho jáegí jis meṉ royá na dekhoge; aur tum par táríkí chhá jáegí aur g̣aibbíní na kar sakoge; aur nabíoṉ par áftáb g̣urúb hogá, aur un ke liye din andherá ho jáegá. 7Tab g̣aibbín pashemán, aur fálgír sharminda hoṉge; balki sab log muṉh par háth rakkheṉge; kyúṉki Ḳhudá kí taraf se kuchh jawáb na hogá. 8Lekin maiṉ Ḳhudáwand kí rúh ke bá‘is quwwat o ‘adálat aur dilerí se ma‘múr húṉ, táki Ya‘qúb ko us ká gunáh, aur Isráíl ko us kí ḳhatá jatáúṉ. 9Ai baní Ya‘qúb ke sardáro, aur ai baní Isráíl ke hákimo, jo ‘adálat se ‘adáwat rakhte ho, aur sárí rástí ko maroṛte ho, is bát ko suno; 10tum jo Siyyún ko ḳhúnrezí se, aur Yarúshalem ko beinsáfí se ta‘mír karte ho. 11Us ke sardár rishwat lekar ‘adálat karte haiṉ; aur us ke káhin ujrat lekar ta‘lím dete haiṉ; aur us ke nabí rupaya lekar fálgírí karte haiṉ; taubhí wuh Ḳhudáwand par takiya karte haiṉ, aur kahte haiṉ, Kyá Ḳhudáwand hamáre darmiyán nahíṉ? pas ham par koí balá na áegí. 12Is liye Siyyún tumháre hí sabab se khet kí tarah jotá jáegá, aur Yarúshalem khanḍar ho jáegá, aur is ghar ká paháṛ jangal kí úṉchí jagahoṉ kí mánind hogá.
Currently Selected:
Míkáh 3: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
