Ahbár 1
1
1Aur Ḳhudáwand ne ḳhaima e ijtimá‘ meṉ se Músá ko bulákar us se kahá, 2Baní Isráíl se kah, ki Jab tum meṉ se koí Ḳhudáwand ke liye chaṛháwá chaṛháe, to tum chaupáyoṉ, ya‘ní gáe bail aur bheṛ bakrí ká chaṛháwá chaṛháná.
3Agar us ká chaṛháwá gáe bail kí soḳhtaní qurbání ho, to wuh be‘aib nar ko lákar use ḳhaima e ijtimá‘ ke darwáze par chaṛháe, táki wuh ḳhud Ḳhudáwand ke huzúr maqbúl ṭhahre. 4Aur wuh soḳhtaní qurbání ke jánwar ke sir par apná háth rakkhe, tab wuh us kí taraf se maqbúl hogá, táki us ke liye kaffára ho. 5Aur wuh us bachhṛe ko Ḳhudáwand ke huzúr zabh kare; aur Hárún ke beṭe, jo káhin haiṉ, ḳhún ko lákar use us mazbah par girdágird chhiṛkeṉ, jo ḳhaima e ijtimá‘ ke darwáze par hai. 6Tab wuh us soḳhtaní qurbání ke jánwar kí khál kheṉche, aur us ke ‘uzw ‘uzw ko káṭkar judá judá kare. 7Phir Hárún káhin ke beṭe mazbah par ág rakkheṉ, aur ág par lakṛiyáṉ tartíb se chun deṉ: 8aur Hárún ke beṭe, jo káhin haiṉ, us ke a‘zá ko aur sir aur charbí ko un lakṛiyoṉ par, jo mazbah kí ág par hoṉgí, tartíb se rakh deṉ: 9lekin wuh us kí antṛiyoṉ aur páyoṉ ko pání se dho le; tab káhin sab ko mazbah par jaláe, ki wuh soḳhtaní qurbání, ya‘ní Ḳhudáwand ke liye ráhatangez ḳhushbú kí átashín qurbání ho.
10Aur agar us ká chaṛháwá rewaṛ meṉ se bheṛ yá bakrí kí soḳhtaní qurbání ho, to wuh be‘aib nar ko láe. 11Aur wuh use mazbah kí shimálí simt meṉ Ḳhudáwand ke áge zabh kare, aur Hárún ke beṭe, jo káhin haiṉ, us ke ḳhún ko mazbah par girdágird chhiṛkeṉ. 12Phir wuh us ke ‘uzw ‘uzw ko aur sir aur charbí ko káṭkar judá judá kare, aur káhin un ko tartíb se un lakṛiyoṉ par, jo mazbah kí ág par hoṉgí, chun de; 13lekin wuh antṛiyoṉ aur páyoṉ ko pání se dho le; tab káhin sab ko lekar mazbah par jalá de. Wuh soḳhtaní qurbání, ya‘ní Ḳhudáwand ke liye ráhatangez ḳhushbú kí átashín qurbání hai.
14Aur agar us ká chaṛháwá Ḳhudáwand ke liye parandoṉ kí soḳhtaní qurbání ho, to wuh qumríoṉ yá kabútar ke bachchoṉ ká chaṛháwá chaṛháe. 15Aur káhin us ko mazbah par lákar us ká sir maroṛ ḍále, aur use mazbah par jalá de, aur us ká ḳhún mazbah ke pahlú par gir jáne de: 16aur us ke poṭe ko áláish samet le jákar mazbah kí mashriqí simt meṉ rákh kí jagah meṉ ḍál de: 17aur wuh us ke donoṉ bázúoṉ ko pakaṛkar use chíre, par alag alag na kare. Tab káhin use mazbah par un lakṛiyoṉ ke úpar rakhkar jo ág par hoṉgí jalá de. Wuh soḳhtaní qurbání, ya‘ní Ḳhudáwand ke liye ráhatangez ḳhushbú kí átashín qurbání hai.
Currently Selected:
Ahbár 1: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)