Ḳhurúj 40
40
1Aur Ḳhudáwand ne Músá se kahá, 2Pahle mahíne kí pahlí táríḳh ko tú ḳhaima e ijtimá‘ ke maskan ko khaṛá kar dená. 3Aur us meṉ shahádat ká sandúq rakhkar sandúq par bích ká parda kheṉch dená. 4Aur mez ko andar le jákar us par kí sab chízeṉ tartíb se sajá dená; aur sham‘adán ko andar karke us ke chirág̣ raushan kar dená. 5Aur baḳhúr jaláne kí zarrín qurbángáh ko shahádat ke sandúq ke sámne rakhná, aur maskan ke darwáze ká parda lagá dená, 6aur soḳhtaní qurbání ká mazbah ḳhaima e ijtimá‘ ke maskan ke darwáze ke sámne rakhná. 7Aur hauz ko ḳhaima e ijtimá‘ aur mazbah ke bích meṉ rakhkar us meṉ pání bhar dená. 8Aur sahn ko chároṉ taraf se gherkar sahn ke darwáze meṉ parda laṭká dená. 9Aur masah karne ká tel lekar maskan ko aur us ke andar kí sab chízoṉ ko masah karná; aur yúṉ use aur us ke sab zurúf ko muqaddas karná: tab wuh muqaddas ṭhahregá. 10Aur tú soḳhtaní qurbání ke mazbah aur us ke sab zurúf ko masah karke mazbah ko muqaddas karná: aur mazbah niháyat hí muqaddas ṭhahregá. 11Aur tú hauz aur us kí kursí ko bhí masah karke muqaddas karná. 12Aur Hárún aur us ke beṭoṉ ko ḳhaima e ijtimá‘ ke darwáze par lákar un ko pání se g̣usl diláná; 13aur Hárún ko muqaddas libás pahináná, aur use masah aur muqaddas karná, táki wuh mere liye káhin kí ḳhidmat ko anjám de. 14Aur us ke beṭoṉ ko lákar un ko kurte pahináná. 15Aur jaise un ke báp ko masah kare, waise hí un ko bhí masah karná, táki wuh mere liye káhin kí ḳhidmat ko anjám deṉ: aur un ká masah honá un ke liye nasl dar nasl abadí kahánat ká nishán hogá. 16Aur Músá ne sab kuchh, jaisá Ḳhudáwand ne us ko hukm kiyá thá, usí ke mutábiq kiyá.
17Aur dúsre sál ke pahle mahíne kí pahlí táríḳh ko maskan khaṛá kiyá gayá. 18Aur Músá ne maskan ko khaṛá kiyá, aur ḳhánoṉ ko dhar un meṉ taḳhte lagá un ke benḍe kheṉch diye, aur us ke sutúnoṉ ko khaṛá kar diyá; 19aur maskan ke úpar ḳhaime ko tán diyá, aur ḳhaime par us ká g̣iláf chaṛhá diyá, jaisá Ḳhudáwand ne Músá ko hukm kiyá thá; 20aur shahádatnáme ko lekar sandúq meṉ rakkhá, aur choboṉ ko sandúq meṉ lagákar sarposh ko sandúq ke úpar dhará; 21phir us sandúq ko maskan ke andar láyá, aur bích ká parda lagákar shahádat ke sandúq ko parde ke andar kiyá, jaisá Ḳhudáwand ne Músá ko hukm kiyá thá; 22aur mez ko us parde ke báhar maskan kí shimálí simt meṉ ḳhaima e ijtimá‘ ke andar rakkhá; 23aur us par Ḳhudáwand ke rúbarú roṭí sajákar rakkhí, jaisá Ḳhudáwand ne Músá ko hukm kiyá thá; 24aur ḳhaima e ijtimá‘ ke andar hí mez ke sámne maskan kí junúbí simt meṉ sham‘adán ko rakkhá; 25aur chirág̣ Ḳhudáwand ke rúbarú raushan kar diye, jaisá Ḳhudáwand ne Músá ko hukm kiyá thá; 26aur zarrín qurbángáh ko, ḳhaima e ijtimá‘ ke andar parde ke sámne rakkhá; 27aur us par ḳhushbúdár masálah ká baḳhúr jaláyá, jaisá Ḳhudáwand ne Músá ko hukm kiyá thá. 28Aur us ne maskan ke darwáze meṉ parda lagáyá; 29aur ḳhaima e ijtimá‘ ke maskan ke darwáze par soḳhtaní qurbání ká mazbah rakhkar us par soḳhtaní qurbání aur nazr kí qurbání chaṛháí, jaisá Ḳhudáwand ne Músá ko hukm kiyá thá. 30Aur us ne hauz ko ḳhaima e ijtimá‘ aur mazbah ke bích meṉ rakhkar us meṉ dhone ke liye pání bhar diyá. 31Aur Músá aur Hárún aur us ke beṭoṉ ne apne apne háth páṉw us meṉ dhoe. 32Jab jab wuh ḳhaima e ijtimá‘ ke andar dáḳhil hote, aur jab jab wuh mazbah ke nazdík játe, to apne áp ko dhokar játe the, jaisá Ḳhudáwand ne Músá ko hukm kiyá thá. 33Aur us ne maskan aur mazbah ke girdágird sahn ko gherkar sahn ke darwáze ká parda ḍál diyá. Yúṉ Músá ne us kám ko ḳhatm kiyá.
34Tab ḳhaima e ijtimá‘ par abr chhá gayá, aur maskan Ḳhudáwand ke jalál se ma‘múr ho gayá. 35Aur Músá ḳhaima e ijtimá‘ meṉ dáḳhil na ho saká, kyúṉki wuh abr us par ṭhahrá húá thá, aur maskan Ḳhudáwand ke jalál se ma‘múr thá. 36Aur baní Isráíl ke sáre safar meṉ yih hotá rahá, ki jab wuh abr maskan ke úpar se uṭh játá, to wuh áge baṛhte; 37par agar wuh abr na uṭhtá, to wuh us din tak safar nahíṉ karte the, jab tak wuh uṭh na játá. 38Kyúṉki Ḳhudáwand ká abr Isráíl ke sáre gharáne ke sámne, aur un ke sáre safar meṉ din ke waqt to maskan ke úpar ṭhahrá rahtá, aur rát ko us meṉ ág rahtí thí.
Currently Selected:
Ḳhurúj 40: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
