Aiyúb 24
24
1Qádir i mutlaq ne waqt kyúṉ nahíṉ ṭhahráe?
Aur jo use jánte haiṉ wuh us ke dinoṉ ko kyúṉ nahíṉ dekhte?
2Aise log bhí haiṉ jo zamín kí haddoṉ ko sarká dete haiṉ;
Wuh rewaṛoṉ ko zabardastí le játe, aur unheṉ charáte haiṉ.
3Wuh yatím ke gadhe ko háṉk le játe haiṉ,
Wuh bewa ke bail ko girau lete haiṉ.
4Wuh muhtáj ko ráste se haṭá dete haiṉ;
Zamín ke g̣aríb ikaṭṭhe chhipte haiṉ.
5Dekho, wuh biyábán ke gorḳharoṉ kí tarah apne kám ko játe,
Aur mashaqqat uṭhákar ḳhurák ḍhúṉḍhte haiṉ;
Biyábán un ke bachchoṉ ke liye ḳhurák baham pahuṉchátá hai.
6Wuh khet meṉ apná chárá káṭte haiṉ;
Aur sharíroṉ ke angúr kí ḳhoshachíní karte haiṉ.
7Wuh sárí rát bekapṛe naṉge paṛe rahte haiṉ,
Aur jáṛoṉ meṉ un ke pás koí oṛhná nahíṉ hotá.
8Wuh paháṛoṉ kí bárish se bhíge rahte haiṉ,
Aur kisí áṛ ke na hone se chaṭán se lipaṭ játe haiṉ.
9Aise log bhí haiṉ jo yatím ko chhátí par se haṭá lete haiṉ,
Aur g̣aríboṉ se girau lete haiṉ.
10So wuh bekapṛe naṉge phirte,
Aur bhúk ke máre púliyáṉ ḍhote haiṉ;
11Wuh in logoṉ ke ihátoṉ meṉ tel nikálte haiṉ;
Wuh un ke kuṉḍoṉ meṉ aṉgúr rauṉdte, aur piyáse rahte haiṉ.
12Ábád shahr meṉ se nikalkar log karáhte haiṉ,
Aur zaḳhmíoṉ kí ján faryád kartí hai:
Taubhí Ḳhudá is hamáqat ká ḳhayál nahíṉ kartá.
13Yih un meṉ se haiṉ, jo núr se bag̣áwat karte haiṉ;
Wuh us kí ráhoṉ ko nahíṉ jánte,
Na us ke rástoṉ par qáim rahte haiṉ.
14Ḳhúní raushní hote hí uṭhtá hai,
Wuh g̣aríboṉ aur muhtájoṉ ko már ḍáltá hai;
Aur rát ko wuh chor kí mánind hai.
15Zání kí áṉkh bhí shám kí muntazir rahtí hai,
Wuh kahtá hai, Kisí kí nazar mujh par na paṛegí;
Aur wuh apná muṉh ḍháṉk letá hai.
16Andhere meṉ wuh gharoṉ meṉ seṉdh márte haiṉ:
Wuh din ke waqt chhipe rahte haiṉ;
Wuh núr ko nahíṉ jánte.
17Kyúṉki subh un sabhoṉ ke liye aisí hai, jaise maut ká sáya;
Is liye ki unheṉ maut ke sáye kí dahshat ma‘lúm hai.
18Wuh pání kí sath par tezrau hai;
Zamín par un ká baḳhra mal‘ún hai:
Wuh tákistánoṉ kí ráh par nahíṉ chalte.
19Ḳhushkí aur garmí barfání pání ke náloṉ ko sukhá detí haiṉ:
Aisá hí qabr gunahgároṉ ke sáth kartí hai.
20Rihm use bhúl jáegá;
Kíṛá use maze se kháegá;
Us kí yád phir na hogí:
Nárástí daraḳht kí tarah toṛ dí jáegí.
21Wuh báṉjh ko, jo jantí nahíṉ, nigal játá hai;
Aur bewa ke sáth bhaláí nahíṉ kartá.
22Ḳhudá apní quwwat se zabardastoṉ ko bhí kheṉch letá hai:
Wuh uṭhtá hai, aur kisí ko zindagí ká yaqín nahíṉ rahtá.
23Ḳhudá unheṉ amn baḳhshtá hai, aur wuh usí meṉ qáim rahte haiṉ;
Aur us kí áṉkheṉ un kí ráhoṉ par lagí rahtí haiṉ.
24Wuh sarfaráz to hote haiṉ, par thoṛe hí der meṉ játe rahte haiṉ;
Balki wuh past kiye játe haiṉ; aur sab dúsroṉ kí tarah ráste se uṭhá liye játe,
Aur anáj kí báloṉ kí tarah káṭ ḍále játe haiṉ.
25Aur agar yih yúṉ hí nahíṉ hai, to kaun mujhe jhúṭhá sábit karegá,
Aur merí taqrír ko náchíz ṭhahráegá?
Currently Selected:
Aiyúb 24: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
