Yarmiyáh 3
3
1Kahte haiṉ, ki Agar koí mard apní bíwí ko taláq de de, aur wuh us ke háṉ se jákar kisí dúsre mard kí ho jáe, to kyá wuh pahlá phir us ke pás jáegá? kyá wuh zamín niháyat nápák na hogí? Lekin tú ne to bahut se yároṉ ke sáth badkárí kí hai; kyá ab bhí tú merí taraf phiregí? Ḳhudáwand farmátá hai. 2Paháṛoṉ kí taraf apní áṉkheṉ uṭhá, aur dekh; kaun sí jagah hai jaháṉ tú ne badkárí nahíṉ kí? Tú ráh meṉ un ke liye is tarah baiṭhí, jis tarah biyábán meṉ ‘Arab: tú ne apní badkárí aur sharárat se zamín ko nápák kiyá. 3Is liye bárish nahíṉ hotí, aur áḳhirí barsát nahíṉ húí; terí peshání fáhisha kí hai, aur tujh ko sharm nahíṉ átí. 4Kyá tú ab se mujhe pukárkar na kahegí, Ai mere báp, tú merí jawání ká rahbar thá? 5Kyá us ká qahr hamesha rahegá? kyá wuh use abad tak rakh chhoṛegá? Dekh, tú aisí báteṉ to kah chukí, lekin jaháṉ tak tujh se ho saká, tú ne bure kám kiye.
6Aur Yúsiyáh bádsháh ke aiyám meṉ Ḳhudáwand ne mujh se farmáyá, Kyá tú ne dekhá bargashta Isráíl ne kyá kiyá hai? wuh har ek úṉche paháṛ par aur har ek hare daraḳht ke níche gayí, aur waháṉ badkárí kí. 7Aur jab wuh yih sab kuchh kar chukí, to maiṉ ne kahá, Wuh merí taraf wápas áegí; par wuh na áí: aur us kí bewafá bahin Yahúdáh ne yih hál dekhá. 8Phir maiṉ ne dekhá, ki jab bargashta Isráíl kí zinákárí ke sabab se maiṉ ne us ko taláq de dí, aur use taláqnáma likh diyá, taubhí us kí bewafá bahin Yahúdáh na ḍarí; balki us ne bhí jákar badkárí kí. 9Aur aisá húá, ki us ne apní badkárí kí buráí se zamín ko nápák kiyá, aur patthar aur lakṛí ke sáth zinákárí kí. 10Aur Ḳhudáwand farmátá hai, ki Báwujúd is sab ke us kí bewafá bahin Yahúdáh sachche dil se merí taraf na phirí, balki riyákárí se. 11Aur Ḳhudáwand ne mujh se farmáyá, Bargashta Isráíl ne bewafá Yahúdáh se ziyáda apne áp ko sádiq sábit kiyá hai. 12Já, aur shimál kí taraf yih bát pukárkar kah de, ki Ḳhudáwand farmátá hai, Ai bargashta Isráíl, wápas á; maiṉ tujh par qahr kí nazar nahíṉ karúṉgá; kyúṉki Ḳhudáwand farmátá hai, maiṉ rahím húṉ, merá qahr dáimí nahíṉ. 13Sirf apní badkirdárí ká iqrár kar, ki tú Ḳhudáwand apne Ḳhudá se ‘ásí ho gayí, aur har ek hare daraḳht ke níche g̣airoṉ ke sáth idhar udhar áwára phirí: Ḳhudáwand farmátá hai, tum merí áwáz ke shanawá na húe. 14Ḳhudáwand farmátá hai, Ai bargashta bachcho, wápas áo; kyúṉki maiṉ ḳhud tumhárá málik húṉ: aur maiṉ tum ko har ek shahr meṉ se ek, aur har ek gharáne meṉ se do lekar Siyyún meṉ láúṉgá: 15aur maiṉ tum ko apne ḳhátirḳhwáh charwáhe dúṉgá, aur wuh tum ko dánáí aur ‘aqlmandí se charáeṉge 16Aur yúṉ hogá, Ḳhudáwand farmátá hai, ki jab un aiyám meṉ tum mulk meṉ baṛhoge, aur bahut hoge, tab wuh phir na kaheṉge, ki Ḳhudáwand ke ‘ahd ká sandúq; us ká ḳhayál bhí kabhí un ke dil meṉ na áegá: wuh hargiz use yád na kareṉge, aur us kí ziyárat ko na jáeṉge, aur us kí marammat na hogí. 17Us waqt Yarúshalem Ḳhudáwand ká taḳht kahláegá; aur us meṉ, ya‘ní Yarúshalem meṉ, sab qaumeṉ Ḳhudáwand ke nám se jama‘ hoṉgí: aur wuh phir apne bure dil kí saḳhtí kí pairawí na kareṉge. 18Un aiyám meṉ Yahúdáh ká gharáná Isráíl ke gharáne ke sáth chalegá; wuh milkar shimál ke mulk meṉ se us mulk meṉ jise maiṉ ne tumháre bápdádá ko mírás meṉ diyá, áeṉge. 19Áh, maiṉ ne to kahá thá, Maiṉ tujh ko farzandoṉ meṉ shámil karke ḳhushnumá mulk ya‘ní qaumoṉ kí nafís mírás tujhe dúṉgá; aur tú mujhe Báp kahkar pukáregí, aur tú phir mujh se bargashta na hogí. 20Lekin Ḳhudáwand farmátá hai, Ai Isráíl ke gharáne, jis tarah bíwí bewafáí se apne shauhar ko chhoṛ detí hai, usí tarah tú ne mujh se bewafáí kí hai. 21Paháṛoṉ par baní Isráíl kí girya o zárí aur minnat kí áwáz sunáí detí hai; kyúṉki unhoṉ ne apní ráh ṭeṛhí kí, aur Ḳhudáwand apne Ḳhudá ko bhúl gaye. 22Ai bargashta farzando, wápas áo; maiṉ tumhárí bargashtagí ká chára karúṉgá. Dekh, ham tere pás áte haiṉ; kyúṉki tú hí, ai Ḳhudáwand, hamárá Ḳhudá hai. 23Fi’lhaqíqat ṭíloṉ aur paháṛoṉ par ke hujúm se kuchh ummed rakhná befáida hai: Yaqínan Ḳhudáwand hamáre Ḳhudá hí meṉ Isráíl kí naját hai. 24Lekin is ruswáí ke bá‘is ne hamárí jawání ke waqt se hamáre bápdádá ke mál ko, aur un kí bheṛoṉ, aur un ke bailoṉ, aur un ke beṭe aur beṭiyoṉ ko nigal liyá hai. 25Ham apní sharm meṉ leṭeṉ, aur ruswáí ham ko chhipá le: kyúṉki ham aur hamáre bápdádá apní jawání ke waqt se áj tak Ḳhudáwand apne Ḳhudá ke ḳhatákár haiṉ: aur ham Ḳhudáwand apne Ḳhudá kí áwáz ke shanawá nahíṉ húe.
Currently Selected:
Yarmiyáh 3: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
