Yasa‘iyáh 27
27
1Us waqt Ḳhudáwand apní saḳht aur baṛí aur mazbút talwár se azhdahá ya‘ní tezrau sáṉp ko aur azhdahá ya‘ní pechída sáṉp ko sazá degá; aur daryáí azhdahá ko qatl karegá.
2Us waqt tum ḳhushnumá tákistán ká gít gáná. 3Maiṉ Ḳhudáwand us kí hifázat kartá húṉ; maiṉ use har dam síṉchtá rahúṉgá: maiṉ din rát us kí nigahbání karúṉgá, ki use nuqsán na pahuṉche. 4Mujh meṉ qahr nahíṉ, taubhí, kash ki janggáh meṉ jháṛiyáṉ aur káṉṭe mere ḳhiláf hote; maiṉ un par ḳhurúj kartá, aur un ko bi’lkull jalá detá. 5Par agar koí merí tawánáí ká dáman pakṛe, to mujh se sulh kare: háṉ, wuh mujh se sulh kare. 6Ab áyanda aiyám meṉ Ya‘qúb jaṛ pakṛegá; aur Isráíl panpegá aur phúlegá: aur rú e zamín ko mewoṉ se málámál karegá.
7Kyá us ne use márá, jis tarah us ne us ke márnewáloṉ ko márá hai? yá kyá wuh qatl húá, jis tarah us ke qátil qatl húe? 8Tú ne ‘adl ke sáth us ko nikálte waqt us se hujjat kí: us ne mashriqí hawá ke din apne saḳht túfán se us ko nikál diyá. 9Is liye is se Ya‘qúb ke gunáh ká kaffára hogá, aur us ká gunáh dúr karne ká kull natíja yihí hai; jis waqt wuh mazbah ke sab pattharoṉ ko ṭúṭe kaṉkaroṉ kí mánind ṭukṛe ṭukṛe kare, ki Yasírateṉ aur súraj ke but phir qáim na hoṉ. 10Kyúṉki fasíldár shahr wírán hai, aur wuh bastí ujáṛ aur biyábán kí manínd ḳhálí hai; waháṉ bachhṛá charegá, aur wahíṉ leṭ rahegá, aur us kí ḍáliyáṉ bi’lkull káṭ kháegá. 11Jab us kí sháḳheṉ murjhá jáeṉgí, to toṛí jáeṉgí; ‘aurateṉ áeṉgí, aur un ko jaláeṉgí; kyúṉki log dánish se ḳhálí haiṉ; is liye un ká ḳháliq un par rahm nahíṉ karegá, aur un ká banánewálá un par tars nahíṉ kháegá.
12Aur us waqt yúṉ hogá, ki Ḳhudáwand daryá e Furát kí guzargáh se Rúd i Misr tak jháṛ ḍálegá; aur tum, ai baní Isráíl, ek ek karke jama‘ kiye jáoge.
13Aur us waqt yúṉ hogá, ki baṛá narsingá phúṉká jáegá, aur wuh jo Asúr ke mulk meṉ qaríbu’l maut the, aur wuh jo mulk i Misr meṉ jiláwatan the, áeṉge, aur Yarúshalem ke muqaddas paháṛ par Ḳhudáwand kí parastish kareṉge.
Currently Selected:
Yasa‘iyáh 27: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
