Húsí‘a 13
13
1Ifráím ke kalám meṉ haibat thí; wuh Isráíl ke darmiyán sarfaráz kiyá gayá; lekin Ba‘l ke sabab se gunahgár hokar faná ho gayá. 2Aur ab wuh gunáh par gunáh karte haiṉ; unhoṉ ne apne liye chándí kí ḍhálí húí múrateṉ banáíṉ, aur apní fahmíd ke mutábiq but taiyár kiye, jo sab ke sab kárígaroṉ ká kám haiṉ; wuh un kí bábat kahte haiṉ, Jo log qurbání guzránte haiṉ, bachhṛoṉ ko chúmeṉ. 3Is liye wuh subh ke bádal aur shabnam kí mánind jald játe raheṉge, aur bhúsí kí mánind, jis ko bagolá khalíhán par se uṛá le játá hai, aur us dhuweṉ kí mánind jo dúdkash se nikaltá hai. 4Lekin maiṉ mulk i Misr hí se Ḳhudáwand Ḳhudá húṉ; aur mere siwá tú kisí ma‘búd ko nahíṉ jántá thá, kyúṉki mere siwá koí âur naját denewálá nahíṉ hai. 5Maiṉ ne biyábán meṉ ya‘ní ḳhushk zamín meṉ terí ḳhabargírí kí. 6Wuh apní charágáhoṉ meṉ ser húe; aur ser hokar un ke dil meṉ ghamanḍ samáyá, aur mujhe bhúl gaye. 7Is liye maiṉ un ke liye sher i babar kí mánind húá; chíte kí mánind ráh meṉ un kí ghát meṉ baiṭhúṉgá. 8Maiṉ us ríchhní kí mánind, jis ke bachche chhíne gaye hoṉ, un se dochár húṉgá, aur un ke dil ká parda chák karke sher i babar kí tarah un ko wahíṉ nigal jáúṉgá; dashtí darande un ko pháṛ ḍáleṉge. 9Ai Isráíl, yihí terí halákat hai, ki tú merá ya‘ní apne madadgár ká muḳhálif baná. 10Ab terá bádsháh kaháṉ hai, ki tujhe tere sab shahroṉ meṉ bacháe? aur tere qází kaháṉ haiṉ, jin kí bábat tú kahtá thá, ki Mujhe bádsháh aur umará ‘ináyat kar? 11Maiṉ ne apne qahr meṉ tujhe bádsháh diyá, aur g̣azab se use uṭhá liyá. 12Ifráím kí badkirdarí báṉdh rakkhí gayí, aur us ke gunáh zaḳhíre meṉ jama‘ kiye gaye. 13Wuh goyá dard i zih meṉ mubtalá hogá; wuh bedánish farzand hai; ab munásib hai ki wiládatgáh meṉ der na kare. 14Maiṉ un ko pátál ke qábú se naját dúṉgá; maiṉ un ko maut se chhuṛáúṉgá: ai maut, terí wabá kaháṉ hai? ai pátál, terí halákat kaháṉ hai? maiṉ hargiz rahm na karúṉgá. 15Agarchi wuh apne bháiyoṉ meṉ baromand ho, taubhí púrabí hawá áegí, Ḳhudáwand ká dam biyábán se áegá, aur us ká sotá súkh jáegá; aur us ká chashma ḳhushk ho jáegá; wuh sab marg̣úb zurúf ká ḳhazána lúṭ legá. 16Sámariya apne jurm kí sazá páegá; kyúṉki us ne apne Ḳhudá se bag̣áwat kí hai; wuh talwár se gir jáeṉge; un ke bachche pára pára hoṉge, aur bárdároṉ ke peṭ chák kiye jáeṉge.
Currently Selected:
Húsí‘a 13: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
