Húsí‘a 10
10
1Isráíl lahlahátí ták hai, jis meṉ phal lagá; jis ne apne phal kí kasrat ke mutábiq bahut sí qurbángáheṉ ta‘mír kíṉ, aur apní zamín kí ḳhúbí ke mutábiq achchhe achchhe sutún banáe. 2Un ká dil dag̣ábáz hai; ab wuh mujrim ṭhahreṉge; wuh un ke mazbahoṉ ko ḍháegá, aur un ke sutúnoṉ ko toṛegá. 3Yaqínan ab wuh kaheṉge, Hamárá koí bádsháh nahíṉ; kyúṉki jab ham Ḳhudáwand se nahíṉ ḍarte, to bádsháh hamáre liye kyá kar saktá hai? 4Un kí báteṉ bátil haiṉ; wuh ‘ahd o paimán meṉ jhúṭhí qasam kháte haiṉ; is liye balá aisí phúṭ niklegí, jaise khet kí regháriyoṉ meṉ indráyan. 5Bait Áwan kí bachhiyoṉ ke sabab se Sámariya ke báshinde ḳhaufzada hoṉge; kyúṉki waháṉ ke log us par mátam kareṉge, aur waháṉ ke káhin bhí, jo us kí guzashta shaukat ke sabab se shádmán the. 6Is ko bhí Asúr meṉ le jákar us muḳhálif bádsháh kí nazr kareṉge: Ifráím nidámat uṭháegá, aur Isráíl apní mashwarat se ḳhajil hogá. 7Sámariya ká bádsháh kaṭ gayá hai; wuh pání par tairtí sháḳh kí mánind hai. 8Aur Áwan ke úṉche maqám, jo Isráíl ká gunáh haiṉ, barbád kiye jáeṉge: aur un ke mazbahoṉ par káṉṭe aur úṉṭkaṭáre ugeṉge; aur wuh paháṛoṉ se kaheṉge, Ham ko chhipá lo, aur ṭíloṉ se kaheṉge, Ham par á giro. 9Ai baní Isráíl, tum Jibi‘ah ke aiyám se gunáh karte áe: wuh wahíṉ ṭhahre rahe, táki laṛáí Jibi‘ah meṉ badkirdároṉ kí nasl tak na pahuṉche. 10Maiṉ jab cháhúṉ un ko sazá dúṉgá; aur jab maiṉ un ke do gunáhoṉ kí sazá dúṉgá, to log un par hujúm kareṉge. 11Ifráím sadháí húí bachhiyá hai, jo dáoná pasand kartí hai; aur maiṉ ne us kí ḳhushnumá gardan ko dareg̣ kiyá; lekin maiṉ Ifráím par sawár biṭháúṉgá; Yahúdáh hal chaláegá, aur Ya‘qúb ḍhele toṛegá. 12Apne liye sadáqat se tuḳhmrezí karo, shafaqat se fasl káṭo, aur apní uftáda zamín meṉ hal chaláo; kyúṉki ab mauqa‘ hai ki tum Ḳhudáwand ke tálib ho, táki wuh áe, aur rástí ko tum par barsáe. 13Tum ne sharárat ká hal chaláyá, badkirdárí kí fasl káṭí, aur jhúṭh ká phal kháyá: kyúṉki tú ne apní rawish meṉ apne baháduroṉ ke amboh par takiya kiyá. 14Is liye tere logoṉ ke ḳhiláf hangáma barpá hogá, aur tere sab qil‘e mismár kiye jáeṉge, jis tarah Shalman ne laṛáí ke din Bait Arbel ko mismár kiyá thá, jab ki máṉ apne bachchoṉ samet ṭukṛe ṭukṛe ho gayí. 15Tumhárí beniháyat sharárat ke sabab se Baitel meṉ tumhárá yihí hál hogá; sháh i Isráíl ‘alá’s sabáh bi’lkull faná ho jáegá.
Currently Selected:
Húsí‘a 10: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
