Hizqíel 41
41
1Aur wuh mujhe haikal meṉ láyá, aur sutúnoṉ ko nápá, chha háth kí chauṛáí ek taraf, aur chha háth kí dúsrí taraf, yihí ḳhaime kí chauṛáí thí. 2Aur darwáze kí chauṛáí das háth, aur us ká ek pahlú páṉch háth ká, aur dúsrá bhí páṉch háth ká thá; aur us ne us kí lambáí chálís háth, aur chauṛáí bís háth nápí. 3Tab wuh andar gayá, aur darwáze ke har sutún ko do háth nápá, aur darwáze ko chha háth, aur darwáze kí chauṛáí sát háth thí. 4Aur us ne haikal ke sámne kí lambáí ko bís háth, aur chauṛáí ko bís háth nápá, aur mujh se kahá, ki Yihí páktarín maqám hai. 5Aur us ne maskan kí díwár chha háth nápí, aur pahlú ke ek hujre kí chauṛáí maskan ke girdágird chár háth thí. 6Aur pahlú ke hujre sihmanzila the, hujre ke úpar hujra, qatár meṉ tís; aur wuh us díwár meṉ, jo maskan ke girdágird ke hujroṉ ke liye thí, dáḳhil kiye gaye the, táki mazbút hoṉ, lekin wuh maskan kí díwár se mile húe na the. 7Aur wuh pahlú par ke hujre úpar tak, chároṉ taraf, ziyáda wasí‘ hote játe the; kyúṉki maskan girdágird se úṉchá hotá chalá játá thá; maskan kí chauṛáí úpar tak barábar thí, aur úpar ke hujroṉ ká rásta darmiyání hujroṉ ke bích se thá. 8Aur maiṉ ne maskan ke chároṉ taraf úṉchá chabútra dekhá; pahlú ke hujroṉ kí bunyád chha baṛe háth ke púre sarkanḍe kí thí. 9Aur pahlú ke hujroṉ kí berúní díwár kí chauṛáí páṉch háth thí; aur jo jagah báqí bachí, wuh maskan ke pahlú ke hujroṉ ke darmiyán thí. 10Aur hujroṉ ke darmiyán maskan kí chároṉ taraf girdágird bís háth ká fásila thá. 11Aur pahlú ke hujroṉ ke darwáze us ḳhálí jagah kí taraf the, ek darwáza shimál kí taraf, aur ek junúb kí taraf: aur ḳhálí jagah kí chauṛáí chároṉ taraf páṉch háth thí. 12Aur wuh ‘imárat, jo alag jagah ke sámne mag̣rib kí taraf thí, us kí chauṛáí sattar háth thí, aur us ‘imárat kí díwár chároṉ taraf páṉch háth moṭí, aur nauwe háth lambí thí. 13So us ne maskan ko sau háth lambá nápá, aur alag jagah aur ‘imárat us kí díwároṉ samet sau háth lambí thí. 14Níz maskan ke sámne kí aur us mashriqí jánib kí alag jagah kí chauṛáí sau háth thí.
15Aur alag jagah ke sámne kí ‘imárat kí lambáí jo us ke píchhe thí, aur us kí jánib ke barámade is taraf se aur us taraf se, aur andar kí taraf haikal ko, aur sahn ke ḍeoṛhiyoṉ ko, us ne sau háth nápá. 16Ástánoṉ aur jharokoṉ, aur girdágird barámadoṉ ko, jo sihmanzila aur ástánoṉ ke muqábil the, aur chároṉ taraf se lakṛí se maṛhe húe the: aur zamín se khiṛkiyoṉ tak, aur khiṛkiyáṉ bhí maṛhí húí thíṉ. 17Darwáze ke úpar tak aur andarúní ghar tak aur us ke báhar bhí chároṉ taraf kí tamám díwár tak ghar ke andar báhar, sab ṭhík andáze se the. 18Aur karúbí aur khajúr bane the, aur ek khajúr do karúbíoṉ ke bích meṉ thá, aur har ek karúbí ke do chihre the: 19chunáṉchi ek taraf insán ká chihra khajúr kí taraf thá, aur dúsrí taraf jawán sher i babar ká chihra bhí khajúr kí taraf thá: ghar kí chároṉ taraf isí tarah ká kám thá. 20Zamín se darwáze ke úpar tak, aur haikal kí díwár par karúbí aur khajúr bane the. 21Aur haikal ke darwáze ke sutún chhárgosha the, aur maqdis ke sámne kí súrat bhí isí tarah kí thí. 22Mazbah lakṛí ká thá, us kí úṉcháí tín háth aur lambáí do háth thí; aur us ke kone, aur us kí kursí, aur us kí díwáreṉ lakṛí kí thíṉ. Aur us ne mujh se kahá, Yih Ḳhudáwand ke huzúr kí mez hai. 23Aur haikal aur maqdis ke do do darwáze the; 24aur darwázoṉ ke do do palle the, jo muṛ sakte the, do palle ek darwáze ke liye, aur do dúsre ke liye. 25Aur un par, ya‘ní haikal ke darwázoṉ par, karúbí aur khajúr bane the, jaise ki díwaroṉ par bane the; aur báhar kí ḍeoṛhí ke ruḳh par taḳhtabandí thí. 26Aur ḍeoṛhí kí andarúní aur berúní jánib pahlú meṉ jharoke aur khajúr ke daraḳht bane the, aur haikal ke pahlú ke hujroṉ aur taḳhtabandí kí yihí súrat thí.
Currently Selected:
Hizqíel 41: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
