Hizqíel 40
40
1Hamárí asírí ke pachchísweṉ baras ke shurú‘ meṉ, aur mahíne kí daswíṉ táríḳh ko, jo shahr kí tasḳhír ká chaudahwáṉ sál thá, usí din Ḳhudáwand ká háth mujh par thá, aur wuh mujhe waháṉ le gayá. 2Wuh mujhe Ḳhudá kí royatoṉ meṉ Isráíl ke mulk meṉ le gayá, aur us ne mujhe ek niháyat baland paháṛ par utárá; aur usí par junúb kí taraf, goyá ek shahr ká sá naqsha thá. 3Aur wuh mujhe waháṉ le gayá, to kyá dekhtá húṉ, ki ek shaḳhs hai, jis kí jhalak pítal kí sí hai, aur wuh san kí ḍorí aur paimáish ká sarkanḍá háth meṉ liye pháṭak par khaṛá hai. 4Aur us shaḳhs ne mujhe kahá, ki Ai ádamzád, apní áṉkhoṉ se dekh, aur kánoṉ se sun, aur jo kuchh maiṉ tujhe dikháúṉ us sab par ḳhúb g̣aur kar; kyúṉki tú isí liye yaháṉ pahuṉcháyá gayá hai, ki maiṉ yih sab kuchh tujhe dikháúṉ: pas jo kuchh tú dekhtá hai baní Isráíl se bayán kar.
5Aur kyá dekhtá húṉ, ki maskan ke girdágird díwár hai: aur us shaḳhs ke háth meṉ paimáish ká sarkanḍá hai, chha háth lambá, aur har ek háth púre háth se chár ungal baṛá thá; so us ne us díwár kí chauṛáí nápí, wuh ek sarkanḍá húí, aur úṉcháí ek sarkanḍá. 6Tab wuh mashriq rúya pháṭak par áyá, aur us kí síṛhí par chaṛhá, aur us pháṭak ke ástáne ko nápá jo ek sarkanḍá chauṛá thá: aur dúsre ástáne ká ‘arz bhí ek sarkanḍá thá. 7Aur har ek koṭhrí ek sarkanḍá lambí, aur ek sarkanḍá chauṛí thí; aur koṭhriyoṉ ke darmiyán páṉch páṉch háth ká fásila thá, aur pháṭak kí ḍeoṛhí ke pás andar kí taraf pháṭak ká ástána ek sarkanḍá thá. 8Aur us ne pháṭak kí ḍeoṛhí andar se ek sarkanḍá nápí. 9Tab us ne pháṭak kí ḍeoṛhí áṭh háth nápí, aur us ke sutún do háth; aur pháṭak kí ḍeoṛhí andar kí taraf thí. 10Aur mashriq rúya pháṭak kí koṭhriyáṉ tín idhar tín udhar thíṉ; yih tínoṉ paimáish meṉ barábar thíṉ; aur idhar udhar ke sutúnoṉ ká ek hí náp thá. 11Aur us ne pháṭak ke darwáze kí chauṛáí das háth, aur lambáí terah háth nápí; 12aur koṭhriyoṉ ke áge ká háshiya, háth bhar idhar aur háth bhar udhar thá, aur koṭhriyáṉ chha háth idhar aur chha háth udhar thíṉ. 13Tab us ne pháṭak ko ek koṭhrí kí chhat se dúsrí kí chhat tak pachchís háth chauṛá nápá, darwáze ke muqábil darwáza. 14Aur us ne sutún sáṭh háth nápe, aur sahn ke sutún darwáze ke girdágird the. 15Aur madḳhal ke pháṭak ke sámne se lekar andarúní pháṭak kí ḍeoṛhí tak pachás háth ká fásila thá. 16Aur koṭhriyoṉ meṉ aur un ke sutúnoṉ meṉ pháṭak ke andar girdágird jharoke the; waise hí ḍeoṛhí ke andar bhí girdágird jhaṛoke the, aur sutúnoṉ par khajúr kí súrateṉ thíṉ.
17Phir wuh mujhe báhar ke sahn meṉ le gayá, aur kyá dekhtá húṉ, ki hujre haiṉ, aur chároṉ taraf sahn meṉ farsh lagá thá, aur us farsh par tís hujre the. 18Aur wuh farsh, ya‘ní níche ká farsh, pháṭakoṉ ke sáth sáth barábar lagá thá. 19Tab us ne us kí chauṛáí, níche ke pháṭak ke sámne se andar ke sahn ke áge, mashriq aur shimál kí taraf báhar báhar, sau háth nápí. 20Phir us ne báhar ke sahn ke shimál rúya pháṭak kí lambáí aur chauṛáí nápí. 21Aur us kí koṭhriyáṉ tín is taraf aur tín us taraf thíṉ: aur us ke sutún aur mihráb pahle pháṭak ke náp ke mutábiq the: us kí lambáí pachás háth, aur chauṛáí pachchís háth thí. 22Aur us ke daríche aur ḍeoṛhí aur khajúr ke daraḳht mashriq rúya pháṭak ke náp ke mutábiq the, aur úpar jáne ke liye sát zíne the; us kí ḍeoṛhí un ke áge thí. 23Aur andar ke sahn ká pháṭak shimál rúya aur mashriq rúya pháṭakoṉ ke sámne thá: aur us ne pháṭak se pháṭak tak sau háth nápá. 24Aur wuh mujhe junúb kí ráh se le gayá, aur kyá dekhtá húṉ, ki junúb kí taraf ek pháṭak hai; aur us ne us ke sutúnoṉ ko aur us kí ḍeoṛhí ko in hí nápoṉ ke mutábiq nápá. 25Aur us meṉ us kí ḍeoṛhí meṉ irdgird un daríchoṉ kí mánind daríche the; lambáí pachás háth, aur chauṛáí pachchís háth. 26Aur us ke úpar jáne ke liye sát zíne the, aur us kí ḍeoṛhí un ke áge thí, aur us ke sutúnoṉ par khajúr kí súrateṉ thíṉ, ek is taraf aur ek us taraf. 27Aur junúb kí taraf andarúní sahn ká pháṭak thá; aur us ne junúb kí taraf pháṭak se pháṭak tak sau háth nápá.
28Aur wuh junúbí pháṭak kí ráh se mujhe andarúní sahn meṉ láyá: aur in hí nápoṉ ke mutábiq us ne junúbí pháṭak ko nápá. 29Aur us kí koṭhriyoṉ, aur us ke sutúnoṉ, aur us kí ḍeoṛhí ko in hí nápoṉ ke mutábiq páyá: aur us meṉ aur us kí ḍeoṛhí meṉ irdgird daríche the, lambáí pachás háth, aur chauṛáí pachchís háth thí. 30Aur ḍeoṛhí irdgird pachchís háth lambí, aur páṉch háth chauṛí thí. 31Us kí ḍeoṛhí berúní sahn kí taraf thí, aur us ke sutún par khajúr kí súrateṉ thíṉ, aur úpar jáne ke liye áṭh zíne the. 32Aur wuh mujhe mashriq kí taraf andarúní sahn meṉ láyá, aur in hí nápoṉ ke mutábiq pháṭak ko páyá. 33Aur us kí kothṛiyoṉ, aur sutún, aur ḍeoṛhí ko in hí nápoṉ ke mutábiq páyá: aur us meṉ aur us kí ḍeoṛhí meṉ irdgird daríche the; lambáí pachás háth, aur chauṛáí pachchís háth thí. 34Aur us kí ḍeoṛhí berúní sahn kí taraf thí, aur us ke sutúnoṉ par idhar udhar khajúr kí súrateṉ thíṉ, aur úpar jáne ke liye áṭh zíne the. 35Aur wuh mujhe shimálí pháṭak kí taraf le gayá, aur in hí nápoṉ ke mutábiq use páyá; 36us kí koṭhriyoṉ, aur us ke sutúnoṉ, aur us kí ḍeoṛhí ko, jin meṉ irdgird daríche the; lambáí pachás háth, aur chauṛáí pachchís háth thí. 37Aur us ke sutún berúní sahn kí taraf the, aur us ke sutúnoṉ par, idhar udhar, khajúr kí súrateṉ thíṉ, aur úpar jáne ke liye áṭh zíne the.
38Aur pháṭakoṉ ke sutúnoṉ ke pás darwázadár hujra thá, jaháṉ soḳhtaní qurbáníáṉ dhote the. 39Aur pháṭak kí ḍeoṛhí meṉ do mezeṉ is taraf, aur do us taraf thíṉ, kí un par soḳhtaní qurbání aur ḳhatá kí qurbání aur jurm kí qurbání zabh kareṉ. 40Aur báhar kí taraf shimálí pháṭak ke madḳhal ke pás do mezeṉ thíṉ, aur pháṭak kí ḍeoṛhí kí dúsrí taraf do mezeṉ. 41Pháṭak ke pás chár mezeṉ is taraf, aur chár us taraf thíṉ, ya‘ní áṭh mezeṉ, jin par zabh kareṉ. 42Soḳhtaní qurbání ke liye taráshe húe pattharoṉ kí chár mezeṉ thíṉ, jo ḍeṛh háth lambí aur ḍeṛh háth chauṛí, aur ek háth úṉchí thíṉ, jin par wuh soḳhtaní qurbání aur zabíhe ko zabh karne ke hathyár rakhte the. 43Aur us ke andar chároṉ taraf chár ungal lambí ankṛiyáṉ lagí thíṉ, aur qurbání ká gosht mezoṉ par thá. 44Aur andarúní pháṭak se báhar andarúní sahn meṉ, jo shimálí pháṭak kí jánib thá, gánewáloṉ ke hujre the, aur un ká ruḳh junúb kí taraf thá: aur ek mashriqí pháṭak kí jánib thá, jis ká ruḳh shimál kí taraf thá. 45Aur us ne mujh se kahá, ki Yih hujra, jis ká ruḳh junúb kí taraf hai, un káhinoṉ ke liye hai jo maskan kí nigahbání karte haiṉ. 46Aur wuh hujra, jis ká ruḳh shimál kí taraf hai, un káhinoṉ ke liye hai jo mazbah kí muháfazat meṉ házir haiṉ: yih baní Sadoq haiṉ, jo baní Láwí meṉ se Ḳhudáwand ke huzúr áte haiṉ ki us kí ḳhidmat kareṉ. 47Aur us ne sahn ko sau háth lambá aur sau háth chauṛá murabba‘ nápá: aur mazbah maskan ke sámne thá.
48Phir wuh mujhe maskan kí ḍeoṛhí meṉ láyá, aur ḍeoṛhí ko nápá, páṉch háth idhar aur páṉch háth udhar: aur pháṭak kí chauṛáí tín háth is taraf thí aur tín háth us taraf. 49Ḍeoṛhí kí lambáí bís háth, aur chauṛáí gyárah háth thí; aur síṛhí ke zíne, jin se us par chaṛhte the: aur sutúnoṉ ke pás pílpáye the, ek is taraf aur ek us taraf.
Currently Selected:
Hizqíel 40: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
