Ástar 7
7
1So bádsháh aur Hámán áe ki Ástar malika ke sáth kháeṉ píeṉ. 2Aur bádsháh ne dúsre din ziyáfat par mainoshí ke waqt Ástar se phir púchhá, Ástar malika, terá kyá suwál hai? wuh manzúr hogá; aur terí kyá darḳhwást hai? ádhí saltanat tak wuh púrí kí jáegí. 3Ástar malika ne jawáb diyá, Ai bádsháh, agar maiṉ terí nazar meṉ maqbúl húṉ, aur bádsháh ko manzúr ho, to mere suwál par merí jánbaḳhshí ho, aur merí darḳhwást par merí qaum mujhe mile: 4kyúṉki maiṉ aur mere log halák, aur qatl kiye jáe aur nest o nábúd hone ko bech diye gaye haiṉ. Agar ham log g̣ulám aur lauṉḍiyáṉ banne ke liye bech ḍále játe to maiṉ chup rahtí; agarchi us dushman ko bádsháh ke nuqsán ká mu‘áwaza dene ká maqdúr na hotá. 5Tab Aḳhasúerus bádsháh ne Ástar malika se kahá, Wuh kaun hai, aur kaháṉ hai jis ne apne dil meṉ aisá ḳhayál karne kí jur’at kí? 6Ástar ne kahá, Wuh muḳhálif aur wuh dushman yihí ḳhabís Hámán hai. Tab Hámán, bádsháh aur malika ke huzúr hirásán húá. 7Aur bádsháh g̣azabnák hokar mainoshí se uṭhá, aur mahall ke bág̣ meṉ chalá gayá: aur Hámán Ástar malika se apní jánbaḳhshí kí darḳhwást karne ko uṭh khaṛá húá; kyúṉki us ne dekhá ki bádsháh ne mere ḳhiláf badí kí ṭhán lí hai. 8Aur bádsháh mahall ke bág̣ se lauṭkar mainoshí kí jagah áyá; aur Hámán us taḳht ke úpar, jis par Ástar baiṭhí thí, paṛá thá. Tab bádsháh ne kahá, Kyá yih ghar hí meṉ mere sámne malika par jabr karná cháhtá hai? Is bát ká bádsháh ke muṉh se nikalná thá ki unhoṉ ne Hámán ká muṉh ḍháṉk diyá. 9Phir un ḳhwájasaráoṉ meṉ se jo ḳhidmat karte the, ek ḳhwájasará Ḳharbúnáh ne ‘arz kí, ki Huzúr, is ke ‘aláwa Hámán ke ghar meṉ wuh pachás háth úṉchí súlí khaṛí hai jis ko Hámán ne Mardakí ke liye taiyár kiyá jis ne bádsháh ke fáide kí bát batáí. Bádsháh ne farmáyá, ki Use us par ṭáṉg do. 10So unhoṉ ne Hámán ko usí súlí par, jo us ne Mardakí ke liye taiyár kí thí, ṭáṉg diyá. Tab bádsháh ká g̣ussa ṭhanḍá húá.
Currently Selected:
Ástar 7: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
