Ástar 6
6
1Us rát bádsháh ko níṉd na áí; so us ne tawáríḳh kí kitáboṉ ke láne ká hukm diyá; aur wuh bádsháh ke huzúr paṛhí gayíṉ. 2Aur yih likhá milá, ki Mardakí ne darbánoṉ meṉ se bádsháh ke do ḳhwájasaráoṉ Bigtáná aur Tarash kí muḳhbirí kí thí, jo Aḳhasúerus bádsháh par háth chaláná cháhte the. 3Bádsháh ne kahá, Is ke liye Mardakí kí kyá ‘izzat o hurmat kí gayí hai? Bádsháh ke mulázimoṉ ne jo us kí ḳhidmat karte the kahá, ki Us ke liye kuchh nahíṉ kiyá gayá. 4Aur bádsháh ne púchhá, ki Bárgáh meṉ kaun házir hai? Udhar Hámán sháhí mahall kí berúní bárgáh meṉ áyá húá thá, ki Mardakí ko us súlí par chaṛháne ke liye jo us ne us ke liye taiyár kí thí bádsháh se ‘arz kare. 5So bádsháh ke mulázimoṉ ne us se kahá, Huzúr, bárgáh meṉ Hámán khaṛá hai. Bádsháh ne farmáyá, Use andar áne do. 6So Hámán andar áyá, aur bádsháh ne us se kahá, Jis kí ta‘zím bádsháh karní cháhtá hai, us shaḳhs se kyá kiyá jáe? Hámán ne apne dil meṉ kahá, ki Mujh se ziyáda bádsháh kis kí ta‘zím karní cháhtá hogá? 7So Hámán ne bádsháh se kahá, ki Us shaḳhs ke liye jis kí ta‘zím bádsháh ko manzúr ho, 8sháhána libás jise bádsháh pahintá hai, aur wuh ghoṛá jo bádsháh kí sawárí ká hai, aur sháhí táj jo us ke sir par rakkhá játá hai láyá jáe; 9aur wuh libás aur wuh ghoṛá bádsháh ke sab se ‘álínasb umará meṉ se ek ke háth meṉ supurd hoṉ, táki us libás se us shaḳhs ko mulabbas kareṉ jis kí ta‘zím bádsháh ko manzúr hai, aur use us ghoṛe par sawár karke shahr ke shára‘ e ‘ámm meṉ phiráeṉ, aur us ke áge áge manádí kareṉ, ki Jis shaḳhs ki ta‘zím bádsháh karní cháhtá hai, us se aisá hí kiyá jáegá. 10Tab bádsháh ne Hámán se kahá, Jaldí kar, aur apne kahe ke mutábiq wuh libás aur ghoṛá le, aur Mardakí Yahúdí se jo bádsháh ke pháṭak par baiṭhtá hai aisá hí kar; jo kuchh tú ne kahá hai us meṉ kuchh bhí kamí na hone páe. 11So Hámán ne wuh libás aur ghoṛá liyá, aur Mardakí ko mulabbas karke ghoṛe par sawár shahr ke shára‘ e ‘ámm meṉ phiráyá, aur us ke áge áge manádí kartá gayá, ki Jis shaḳhs kí ta‘zím bádsháh karní cháhtá hai, us se aisá hí kiyá jáegá. 12Aur Mardakí to phir bádsháh ke pháṭak par lauṭ áyá: par Hámán ázurda aur sir ḍháṉke húe jaldí jaldí apne ghar gayá. 13Aur Hámán ne apní bíwí Zarish aur apne sab dostoṉ ko ek ek bát jo us par guzrí thí batáí. Tab us ke dánishmandoṉ aur us kí bíwí Zarish ne us se kahá, Agar Mardakí, jis ke áge tú past hone lagá hai, Yahúdí nasl meṉ se hai, to tú us par g̣álib na hogá, balki us ke áge zarúr past hotá jáegá. 14Wuh us se abhí báteṉ kar hí rahe the, ki bádsháh ke ḳhwájasará á gaye, aur Hámán ko us jashn meṉ le jáne kí jaldí kí jise Ástar ne taiyár kiyá thá.
Currently Selected:
Ástar 6: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
