Dáníel 6
6
1Dárá ko pasand áyá ki mamlukat par ek sau bís názim muqarrar kare, jo tamám mamlukat par hukúmat kareṉ; 2aur un par tín wazír hoṉ, jin meṉ se ek Dáníel thá, táki názim un ko hisáb deṉ, aur bádsháh ḳhasárat na uṭháe. 3Aur chúṉki Dáníel meṉ fázil rúh thí, is liye wuh un wazíroṉ aur názimoṉ par sabqat le gayá, aur bádsháh ne cháhá ki use tamám mulk par muḳhtár ṭhahráe. 4Tab un wazíroṉ aur názimoṉ ne cháhá, ki mulkdárí meṉ Dáníel par qusúr sábit kareṉ, lekin wuh koí mauqa‘ yá qusúr na pá sake, kyúṉki wuh diyánatdár thá, aur us meṉ koí ḳhatá yá taqsír na thí. 5Tab unhoṉ ne kahá, ki Ham is Dáníel ko us ke Ḳhudá kí sharí‘at ke siwá kisí âur bát meṉ qusúrwár na páeṉge. 6Pas yih wazír aur názim bádsháh ke huzúr jama‘ húe, aur us se yúṉ kahne lage, ki Ai Dárá bádsháh, abad tak jítá rah. 7Mamlukat ke tamám wazíroṉ, aur hákimoṉ, aur názimoṉ, aur mushíroṉ, aur sardároṉ ne báham mashwarat kí hai, ki ek ḳhusrawána áín muqarrar kareṉ, aur ek imtiná‘í farmán járí kareṉ, táki, ai bádsháh, tís roz tak jo koí tere siwá kisí ma‘búd yá ádmí se koí darḳhwást kare, sheroṉ kí mánd meṉ ḍál diyá jáe. 8Ab, ai bádsháh, is farmán ko qáim kar, aur nawishte par dastḳhatt kar, táki tabdíl na ho, jaise Mádíoṉ aur Fársíoṉ ke áín, jo tabdíl nahíṉ hote. 9Pas Dárá bádsháh ne us nawishte aur farmán par dastḳhatt kar diye. 10Aur jab Dáníel ne ma‘lúm kiyá ki us nawishte par dastḳhatt ho gaye, to apne ghar meṉ áyá, aur apní koṭhrí ká darícha, jo Yarúshalem kí taraf thá, kholkar din meṉ tín martaba hasb i ma‘múl ghuṭne ṭekkar Ḳhudá ke huzúr du‘á aur us kí shukrguzárí kartá rahá. 11Tab yih log jama‘ húe, aur dekhá ki Dáníel apne Ḳhudá ke huzúr du‘á aur iltimás kar rahá hai. 12Pas unhoṉ ne bádsháh ke pás ákar us ke huzúr us ke farmán ká yúṉ zikr kiyá, ki Ai bádsháh, kyá tú ne is farmán par dastḳhatt nahíṉ kiye, ki tís roz tak jo koí tere siwá kisí ma‘búd yá ádmí se koí darḳhwást kare, sheroṉ kí mánd meṉ ḍál diyá jáegá? Bádsháh ne jawáb diyá, ki Mádíoṉ aur Fársíoṉ ke látabdíl áín ke mutábiq yih bát sach hai. 13Tab unhoṉ ne bádsháh ke huzúr ‘arz kí, ki Ai bádsháh, yih Dáníel, jo Yahúdáh ke asíroṉ meṉ se hai, na terí parwá kartá hai, aur na us imtiná‘í farmán ko jis par tú ne dastḳhatt kiyá hai, ḳhátir meṉ látá hai, balki har roz tín bár du‘á kartá hai. 14Jab bádsháh ne yih báteṉ suníṉ, to niháyat ranjída húá, aur us ne dil meṉ cháhá ki Dáníel ko chhuṛáe, aur súraj ḍúbne tak us ke chhuṛáne meṉ koshish kartá rahá. 15Phir yih log bádsháh ke huzúr faráham húe, aur bádsháh se kahne lage, ki Ai bádsháh, tú samajh le, ki Mádíoṉ aur Fársíoṉ ká áín yúṉ hai, ki jo farmán aur qánún bádsháh muqarrar kare kabhí nahíṉ badaltá. 16Tab bádsháh ne hukm diyá aur wuh Dáníel ko láe, aur sheroṉ kí mánd meṉ ḍál diyá: par bádsháh ne Dáníel se kahá, Terá Ḳhudá, jis kí tú hamesha ‘ibádat kartá hai, tujhe chhuṛáegá. 17Aur ek patthar lákar us mánd ke muṉh par rakh diyá gayá, aur bádsháh ne apní aur apne amíroṉ kí muhr us par kar dí, táki wuh bát jo Dáníel ke haqq meṉ ṭhahráí gayí thí tabdíl na ho. 18Tab bádsháh apne qasr meṉ gayá, aur us ne sárí rát fáqa kiyá, aur musíqí ke sáz us ke sámne na láe, aur us kí níṉd játí rahí. 19Aur bádsháh subh bahut sawere uṭhá, aur jaldí se sheroṉ kí mánd kí taraf chalá. 20Aur jab mánd par pahuṉchá, to g̣amnák áwáz se Dáníel ko pukárá: bádsháh ne Dáníel ko ḳhitáb karke kahá, Ai Dáníel, zinda Ḳhudá ke bande, kyá terá Ḳhudá, jis kí tú hamesha ‘ibádat kartá hai, qádir húá ki tujhe sheroṉ se chhuṛáe? 21Tab Dáníel ne bádsháh se kahá, Ai bádsháh, abad tak jítá rah. 22Mere Ḳhudá ne apne firishte ko bhejá, aur sheroṉ ke muṉh band kar diye, aur unhoṉ ne mujhe zarar nahíṉ pahuṉcháyá, kyúṉki maiṉ us ke huzúr begunáh sábit húá; aur tere huzúr bhí, ai bádsháh, maiṉ ne ḳhatá nahíṉ kí. 23Pas bádsháh niháyat shádmán húá, aur hukm diyá ki Dáníel ko us mánd se nikáleṉ. Pas Dáníel us mánd se nikálá gayá, aur ma‘lúm húá, ki use kuchh zarar nahíṉ pahuṉchá, kyúṉki us ne apne Ḳhudá par tawakkul kiyá thá. 24Aur bádsháh ne hukm diyá, aur wuh un shaḳhsoṉ ko, jinhoṉ ne Dáníel kí shikáyat kí thí, láe, aur un ke bachchoṉ aur bíwiyoṉ samet un ko sheroṉ kí mánd meṉ ḍál diyá, aur sher un par gálib áe, aur is se peshtar ke mánd kí tah tak pahuṉcheṉ sheroṉ ne un kí sab haḍḍiyáṉ toṛ ḍálíṉ.
25Tab Dárá bádsháh ne sab logoṉ aur qaumoṉ aur ahl i lug̣at ko, jo rú e zamíṉ par baste the, náma likhá; Tumhárí salámatí afzún ho. 26Maiṉ yih farmán járí kartá húṉ, ki merí mamlukat ke har ek súbe ke log Dáníel ke Ḳhudá ke huzúr tarsán o larzán hoṉ; kyúṉki wuhí zinda Ḳhudá hai, aur hamesha qáim hai, aur us kí saltanat lázawál hai, aur us kí mamlukat abad tak rahegí. 27Wuhí chhuṛátá aur bachátá hai, aur ásmán aur zamín meṉ wuhí nishán aur ‘ajáib dikhátá hai. Usí ne Dáníel ko sheroṉ ke panjoṉ se chhuṛáyá hai. 28Pas yih Dáníel Dárá kí saltanat aur Ḳhoras Fársí kí saltanat meṉ kámyáb rahá.
Currently Selected:
Dáníel 6: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
