2 Salátín 7
7
1Tab Ilísha‘ ne kahá, Tum Ḳhudáwand kí bát suno; Ḳhudáwand yúṉ farmátá hai, ki Kal isí waqt ke qaríb Sámariya ke pháṭak par ek misqál meṉ ek paimána maida, aur ek hí misqál meṉ do paimáne jau bikegá. 2Tab us sardár ne, jis ke háth par bádsháh takya kartá thá, mard i Ḳhudá ko jawáb diyá, Dekh, agar Ḳhudáwand ásmán meṉ khiṛkiyáṉ bhí lagá de, taubhí kyá yih bát ho saktí hai? Us ne kahá, Sun, tú ise apní áṉkhoṉ se dekhegá, par us meṉ se kháne na páegá.
3Aur us jagah jaháṉ se pháṭak meṉ daḳhil hote the, chár koṛhí the: unhoṉ ne ek dúsre se kahá, Ham yaháṉ baiṭhe baiṭhe kyúṉ mareṉ? 4Agar ham kaheṉ, ki Shahr ke andar jáeṉge, to shahr meṉ kál hai, aur ham waháṉ mar jáeṉge; aur agar yahíṉ baiṭhe raheṉ, taubhí mareṉge. So áo, ham Arámí lashkar meṉ jáeṉ: agar wuh ham ko jítá chhoṛeṉ, to ham jíte raheṉge; aur agar wuh ham ko már ḍáleṉ, to ham ko marná hí to hai. 5Pas wuh shám ke waqt uṭhe ki Arámíoṉ kí lashkargáh ko jáeṉ: aur jab wuh Arámíoṉ kí lashkargáh kí báhar kí hadd par pahuṉche, to dekhá ki waháṉ koí ádmí nahíṉ hai. 6Kyúṉki Ḳhudáwand ne rathoṉ kí áwáz, aur ghoṛoṉ kí áwáz, balki ek baṛí fauj kí áwáz Arámíoṉ ke lashkar ko sunwáí: so wuh ápas meṉ kahne lage, ki Dekho, sháh i Isráíl ne Hittíoṉ ke bádsháhoṉ aur Misríoṉ ke bádsháhoṉ ko hamáre ḳhiláf ujrat par buláyá hai, táki wuh ham par chaṛh áeṉ. 7Is liye wuh uṭhe aur shám ko bhág nikle, aur apne ḍere, aur apne ghoṛe, aur apne gadhe, balki sárí lashkargáh jaisí kí taisí chhoṛ dí, aur apní ján lekar bháge. 8Chunáṉchi jab yih koṛhí lashkargáh kí báhar kí hadd par pahuṉche, to ek ḍere meṉ jákar unhoṉ ne kháyá piyá, aur chándí, aur soná, aur libás waháṉ se le jákar chhipá diyá; aur lauṭkar áe, aur dúsre ḍere meṉ dáḳhil hokar waháṉ se bhí le gaye, aur jákar chhipá diyá. 9Phir wuh ek dúsre se kahne lage, Ham achchhá nahíṉ karte: áj ká din ḳhushḳhabarí ká din hai: aur ham ḳhámosh haiṉ; agar ham subh kí raushní tak ṭhahre raheṉ, to sazá páeṉge: pas, áo, ham jákar bádsháh ke gharáne ko ḳhabar deṉ. 10So unhoṉ ne ákar shahr ke darbán ko buláyá, aur un ko batáyá, ki Ham Arámíoṉ kí lashkargáh meṉ gaye, aur dekho, waháṉ na ádmí hai, na ádmí kí áwáz, sirf ghoṛe bandhe húe, aur gadhe bandhe húe, aur ḳhaime júṉ ke túṉ haiṉ. 11So us ne âur darbánoṉ ko buláyá; aur unhoṉ ne andar bádsháh ke gharáne ko ḳhabar kí. 12Tab bádsháh rát hí ko uṭhá, aur apne ḳhádimoṉ se kahá, ki Maiṉ tum ko batátá húṉ Arámíoṉ ne ham se kyá kiyá hai. Wuh ḳhúb jánte haiṉ ki ham bhúke haiṉ; so wuh maidán meṉ chhipne ke liye lashkargáh se nikal gaye haiṉ, aur sochá hai, ki jab ham shahr se nikleṉ, to wuh ham ko jítá pakaṛ leṉ, aur shahr meṉ dáḳhil ho jáeṉ. 13Aur us ke ḳhádimoṉ meṉ se ek ne jawáb diyá, ki Zará koí un bache húe ghoṛoṉ meṉ se jo shahr meṉ báqí haiṉ páṉch ghoṛe le, (wuh to Isráílíoṉ kí sárí jamá‘at kí mánind haiṉ jo báqí rah gayí hai; balki wuh us sárí Isráílí jamá‘at kí mánind haiṉ jo faná ho gayí:) aur ham un ko bhejkar dekheṉ. 14So unhoṉ ne do rath ghoṛoṉ samet liye; aur bádsháh ne un ko Arámíoṉ ke lashkar ke píchhe bhejá ki jákar dekheṉ. 15Aur wuh un ke píchhe Yardan tak chale gaye; aur dekho, sárá rásta kapṛoṉ, aur bartanoṉ se bhará paṛá thá, jin ko Arámíoṉ ne jaldí meṉ pheṉk diyá thá. So qásidoṉ ne lauṭkar bádsháh ko ḳhabar dí. 16Tab logoṉ ne nikalkar Arámíoṉ kí lashkargáh ko lúṭá. So ek misqál meṉ ek paimána maida, aur ek hí misqál meṉ do paimáne jau, Ḳhudáwand ke kalám ke mutábiq biká. 17Aur bádsháh ne usí sardár ko jis ke háth par takya kartá thá, pháṭak par muqarrar kiyá: aur wuh pháṭak meṉ logoṉ ke páṉwoṉ ke níche dabkar mar gayá, jaisá mard i Ḳhudá ne farmáyá thá, jis ne yih us waqt kahá thá jab bádsháh us ke pás áyá thá. 18Aur mard i Ḳhudá ne jaisá bádsháh se kahá thá, ki Kal isí waqt ke qaríb ek misqál meṉ do paimáne jau, aur ek hí misqál meṉ ek paimána maida Sámariya ke pháṭak par milegá, waisá hí húá: 19aur us sardár ne mard i Ḳhudá ko jawáb diyá thá, ki Dekh, agar Ḳhudáwand ásmán meṉ khiṛkiyáṉ bhí lagá de, taubhí kyá aisí bát ho saktí hai? Aur is ne kahá thá, ki Tú apní áṉkhoṉ se dekhegá, par us meṉ se kháne na páegá. 20So us ke sáth ṭhík aisá hí húá; kyúṉki wuh pháṭak meṉ logoṉ ke páṉwoṉ ke níche dabkar mar gayá.
Currently Selected:
2 Salátín 7: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
