1 Samúel 30
30
1Aur aisá húá, ki jab Dáúd aur us ke log tísre din Siqláj meṉ pahuṉche, to dekhá, ki ‘Amálíqíoṉ ne junúbí hisse aur Siqláj par chaṛháí karke Siqláj ko márá, aur ág se phúṉk diyá. 2Aur ‘auratoṉ ko aur jitne chhoṭe baṛe waháṉ the, sab ko asír kar liyá hai; unhoṉ ne kisí ko qatl nahíṉ kiyá, balki un ko lekar chal diye the. 3So jab Dáúd aur us ke log shahr meṉ pahuṉche, to dekhá, ki shahr ág se jalá paṛá hai: aur un kí bíwiyáṉ aur beṭe aur beṭiyáṉ, asír ho gayí haiṉ. 4Tab Dáúd aur us ke sáth ke log chillá chillákar rone lage, yaháṉ tak ki un meṉ rone kí táqat na rahí. 5Aur Dáúd kí donoṉ bíwiyáṉ Yazra‘elí Aḳhinú‘am aur Karmilí Nábál kí bíwí Abíjel asír ho gayí thíṉ. 6Aur Dáúd baṛe shikanje meṉ thá; kyúṉki log use saṉgsár karne ko kahte the, is liye ki logoṉ ke dil apne beṭoṉ aur beṭiyoṉ ke liye niháyat g̣amgín the; par Dáúd ne Ḳhudáwand apne Ḳhudá meṉ apne áp ko mazbút kiyá.
7Aur Dáúd ne Aḳhímalik ke beṭe Abíyátar káhin se kahá, ki Zará afod ko yaháṉ mere pás le á. So Abíyátar afod ko Dáúd ke pás le áyá. 8Aur Dáúd ne Ḳhudáwand se púchhá, ki Agar maiṉ us fauj ká píchhá karúṉ, to kyá maiṉ un ko já lúṉgá? Us ne us se kahá, ki Píchhá kar; kyúṉki tú yaqínan un ko já legá, aur zarúr sab kuchh chhuṛá láegá. 9So Dáúd aur wuh chha sau ádmí jo us ke sáth the chale, aur Basor kí nadí par pahuṉche, jaháṉ wuh log jo píchhe chhoṛe gaye ṭhahre rahe. 10Par Dáúd aur chár sau ádmí píchhá kiye chale gaye; kyúṉki do sau jo aise thak gaye the ki Basor kí nadí ke pár na já sake, píchhe rah gaye. 11Aur un ko maidán meṉ ek Misrí mil gayá; use wuh Dáúd ke pás le áe, aur use roṭí dí, so us ne kháí; aur use pine ko pání diyá. 12Aur unhoṉ ne anjír kí ṭikkiyá ká ek ṭukṛá, aur kishmish ke do ḳhoshe use diye: jab wuh khá chuká, to us kí ján meṉ ján áí, kyúṉki us ne tín din aur tín rát se na roṭí kháí thí, na pání piyá thá. 13Tab Dáúd ne púchhá, Tú kis ká ádmí hai? aur tú kaháṉ ká hai? Us ne kahá, Maiṉ ek Misrí jawán, aur ek ‘Amálíqí ká naukar húṉ; aur merá áqá mujh ko chhoṛ gayá, kyúṉki tín din húe ki maiṉ bímár paṛ gayá thá. 14Ham ne Karetíoṉ ke junúb meṉ aur Yahúdáh ke mulk meṉ, aur Kálib ke junúb meṉ lúṭ már kí, aur Siqláj ko ág se phúṉk diyá. 15Dáúd ne us se kahá, Kyá tú mujhe us fauj tak pahuṉchá degá? Us ne kahá, ki Tú mujh se Ḳhudá kí qasam khá, ki na to mujhe qatl karegá aur na mujhe mere áqá ke hawále karegá, to maiṉ tujh ko us fauj tak pahuṉchá dúṉgá. 16Jab us ne use waháṉ pahuṉchá diyá, to dekhá ki wuh log us sárí zamín par phaile húe the, aur us bahut se mál ke sabab se jo unhoṉ ne Filistíoṉ ke mulk aur Yahúdáh ke mulk se lúṭá thá kháte píte aur ziyáfateṉ uṛá rahe the. 17So Dáúd rát ke pahle pahar se lekar dúsre din kí shám tak un ko mártá rahá, aur un meṉ se ek bhí na bachá, siwá chár sau jawánoṉ ke jo úṉṭoṉ par chaṛhkar bhág gaye. 18Aur Dáúd ne sab kuchh jo ‘Amálíqí le gaye the chhuṛá liyá: aur apní donoṉ bíwiyoṉ ko bhí Dáúd ne chhuṛáyá. 19Aur un kí koí chíz gum na húí, na chhoṭí na baṛí, na laṛke, na laṛkiyáṉ, na lúṭ ká mál, na âur koí chíz jo unhoṉ ne lí thí; Dáúd sab ká sab lauṭá láyá. 20Aur Dáúd ne sab bheṛ bakriyáṉ, aur gáe bail le liye, aur wuh un ko báqí mawáshí ke áge yih kahte húe háṉk láe, ki Yih Dáúd kí lúṭ hai. 21Aur Dáúd un do sau jawánoṉ ke pás áyá jo aise thak gaye the ki Dáúd ke píchhe píchhe na já sake, aur jin ko unhoṉ ne Basor kí nadí par ṭhahrá diyá thá: wuh Dáúd aur us ke sáth ke logoṉ se milne ko nikle: aur jab Dáúd un logoṉ ke nazdík pahuṉchá, to us ne un se ḳhair o ‘áfiyat púchhí. 22Tab un logoṉ meṉ se jo Dáúd ke sáth gaye the, sab badzát aur ḳhabís logoṉ ne kahá, Chúṉki yih hamáre sáth na gaye, is liye ham in ko us mál meṉ se jo ham ne chhuṛáyá hai koí hissa nahíṉ deṉge, siwá har shaḳhs kí bíwí aur bál bachchoṉ ke táki wuh un ko lekar chale jáeṉ. 23Tab Dáúd ne kahá, Ai mere bháiyo, tum is mál ke sáth jo Ḳhudáwand ne ham ko diyá hai, aisá nahíṉ karne páoge; kyúṉki usí ne ham ko bacháyá, aur us fauj ko jis ne ham par chaṛháí kí hamáre háth meṉ kar diyá. 24Aur is amr meṉ tumhárí mánegá kaun? kyúṉki jaisá us ká hissa hai jo laṛáí meṉ játá hai, waisá hí us ká hissa hogá, jo sámán ke pás ṭhahrtá hai; donoṉ barábar hissa páeṉge. 25Aur us din se áge ko aisá hí rahá, ki us ne Isráíl ke liye yihí qánún aur áín muqarrar kiyá jo áj tak hai.
26Aur jab Dáúd Siqláj meṉ áyá, to us ne lúṭ ke mál meṉ se Yahúdáh ke buzurgoṉ ke pás jo us ke dost the kuchh kuchh bhejá, aur kahá, ki Dekho, Ḳhudáwand ke dushmanoṉ ke mál meṉ se yih tumháre liye hadya hai; 27yih un ke pás jo Baitel meṉ, aur un ke pás jo Rámátu’l junúb meṉ, aur un ke pás jo Yatír meṉ, 28aur un ke pás jo ‘Aro‘ír meṉ, aur un ke pás jo Sifmot meṉ, aur un ke pás jo Istimú‘a meṉ, 29aur un ke pás jo Rakal meṉ, aur un ke pás jo Yarahmíelíoṉ ke shahroṉ meṉ, aur un ke pás jo Qíníoṉ ke shahroṉ meṉ, 30aur un ke pás jo Hurmah meṉ, aur un ke pás jo Kor‘ásán meṉ, aur un ke pás jo ‘Aták meṉ, 31aur un ke pás jo Habrún meṉ the, aur un sab jagahoṉ meṉ, jaháṉ jaháṉ Dáúd aur us ke log phirá karte the, bhejá.
Currently Selected:
1 Samúel 30: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
