1 Samúel 29
29
1Aur Filistí apne sáre lashkar ko Afíq meṉ jama‘ karne lage, aur Isráílí us chashme ke nazdík jo Yazra‘el meṉ hai ḳhaimazan húe. 2Aur Filistíoṉ ke umará, saikṛoṉ aur hazároṉ ke sáth áge áge chal rahe the, aur Dáúd apne logoṉ samet Akís ke sáth píchhe píchhe já rahá thá. 3Tab Filistí amíroṉ ne kahá, In ‘Ibráníoṉ ká yaháṉ kyá kám hai? Akís ne Filistí amíroṉ se kahá, Kyá yih Isráíl ke bádsháh Sáúl ká ḳhádim Dáúd nahíṉ, jo itne dinoṉ balki itne barasoṉ se mere sáth hai, aur maiṉ ne jab se wuh mere pás bhág áyá hai áj ke din tak us meṉ kuchh badí nahíṉ páí? 4Lekin Filistí umará us se náráz húe; aur Filistí umará ne us se kahá, Is shaḳhs ko lauṭá de, ki wuh apní jagah ko jo tú ne us ke liye ṭhahráí hai wápas jáe; use hamáre sáth jang par na jáne de, tá aisá na ho ki jang meṉ wuh hamárá muḳhálif ho, kyúṉki wuh apne áqá se kaise mel karegá? kyá in hí logoṉ ke siroṉ se nahíṉ? 5Kyá yih wuhí Dáúd nahíṉ, jis kí bábat unhoṉ ne náchte waqt gá gákar ek dúsre se kahá, ki
Sáúl ne to hazároṉ ko
Par Dáúd ne lákhoṉ ko márá?
6Tab Akís ne Dáúd ko bulákar us se kahá, Ḳhudáwand kí hayát kí qasam, ki tú rástkár hai, aur merí nazar meṉ terí ámad o raft mere sáth lashkar meṉ achchhí hai; kyúṉki maiṉ ne jis din se tú mere pás áyá áj ke din tak tujh meṉ kuchh badí nahíṉ páí: taubhí yih umará tujhe nahíṉ cháhte. 7So tú ab lauṭkar salámat chalá já, táki Filistí umará tujh se náráz na hoṉ. 8Dáúd ne Akís se kahá, Lekin maiṉ ne kyá kiyá hai? aur jab se maiṉ tere sámne húṉ, tab se áj ke din tak, mujh meṉ tú ne kyá bát páí, jo maiṉ apne málik bádsháh ke dushmanoṉ se jang karne ko na jáúṉ? 9Akís ne Dáúd ko jawáb diyá, Maiṉ jántá húṉ ki tú merí nazar meṉ Ḳhudá ke firishte kí mánind nek hai: taubhí Filistí umará ne kahá hai, ki Wuh hamáre sáth jang ke liye na jáe. 10So ab tú subh sawere apne áqá ke ḳhádimoṉ ko lekar jo tere sáth yaháṉ áe haiṉ uṭhná, aur jaise hí tum subh sawere uṭho, raushní hote hote rawána ho jáná. 11So Dáúd apne logoṉ samet taṛke uṭhá, táki subh ko rawána hokar Filistíoṉ ke mulk ko lauṭ jáe. Aur Filistí Yazra‘el ko chale gaye.
Currently Selected:
1 Samúel 29: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
