1 Samúel 27
27
1Aur Dáúd ne apne dil meṉ kahá, ki Ab maiṉ kisí na kisí din Sáúl ke háth se halák húṉgá: pas, mere liye is se bihtar âur kuchh nahíṉ, ki maiṉ Filistíoṉ kí sarzamín ko bhág jáúṉ, aur Sáúl mujh se náummed hokar baní Isráíl kí sarhaddoṉ meṉ phir mujhe nahíṉ ḍhúṉḍhegá: yúṉ maiṉ us ke háth se bach jáúṉgá. 2So Dáúd uṭhá, aur apne sáth ke chha sau jawánoṉ ko lekar Ját ke bádsháh Ma‘ok ke beṭe Akís ke pás gayá. 3Aur Dáúd aur us ke log Ját meṉ Akís ke sáth apne apne ḳhándán samet rahne lage, aur Dáúd ke sáth bhí us kí donoṉ bíwiyáṉ, ya‘ní Yazra‘elí Aḳhinú‘am, aur Nábál kí bíwí Karmilí Abíjel thíṉ. 4Aur Sáúl ko ḳhabar milí, ki Dáúd Ját ko bhág gayá: tab us ne phir kabhí us kí talásh na kí.
5Aur Dáúd ne Akís se kahá, ki Agar mujh par tere karam kí nazar hai, to mujhe is mulk ke shahroṉ meṉ kahíṉ jagah dilá de, táki maiṉ waháṉ basúṉ: terá ḳhádim tere sáth dáru’s saltanat meṉ kyúṉ rahe? 6So Akís ne us din shahr i Siqláj use diyá: is liye Siqláj áj ke din tak Yahúdáh ke bádsháhoṉ ká hai.
7Aur Dáúd Filistíoṉ kí sarzamín meṉ kull ek baras aur chár mahíne tak rahá. 8Aur Dáúd aur us ke logoṉ ne jákar Jasoríoṉ, aur Jazaríoṉ, aur ‘Amálíqíoṉ par hamla kiyá: kyúṉki wuh Shor kí ráh se Misr kí hadd tak us sarzamín ke qadímí báshinde the. 9Aur Dáúd ne us sarzamín ko tabáh kar ḍálá, aur ‘aurat mard kisí ko jítá na chhoṛá, aur un kí bheṛ bakriyáṉ, aur bail, aur gadhe, aur úṉṭ, aur kapṛe lekar lúṭá, aur Akís ke pás gayá. 10Akís ne púchhá, ki Áj tum ne kidhar lúṭ már kí? Dáúd ne kahá, Yahúdáh ke junúb aur Yarahmíelíoṉ ke junúb, aur Qíníoṉ ke junúb. 11Aur Dáúd un meṉ se ek mard yá ‘aurat ko bhí jítá bachákar Ját meṉ nahíṉ látá thá, aur kahtá thá, ki Kahíṉ wuh hamárí qala‘í na khol deṉ, aur kah deṉ, ki Dáúd ne aisá aisá kiyá, aur jab se wuh Filistíoṉ kí mamlukat meṉ basá hai, tab se us ká yihí taríqa rahá hai. 12Aur Akís ne Dáúd ká yaqín karke kahá, ki Us ne apní qaum Isráíl ko apní taraf se kamál nafrat dilá dí hai, so ab hamesha yih merá ḳhádim rahegá.
Currently Selected:
1 Samúel 27: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
