1 Samúel 26
26
1Aur Zífí Jibi‘ah meṉ Sáúl ke pás jákar kahne lage, Kyá Dáúd Hakílah ke paháṛ meṉ jo dasht ke sámne hai chhipá húá nahíṉ? 2Tab Sáúl uṭhá, aur tín hazár chune húe Isráílí jawán apne sáth lekar dasht i Zíf ko gayá, táki us dasht meṉ Dáúd ko talásh kare. 3Aur Sáúl Hakílah ke paháṛ meṉ jo dasht ke sámne hai ráste ke kanáre ḳhaimazan húá. Par Dáúd dasht meṉ rahá; aur us ne dekhá, ki Sáúl us ke píchhe dasht meṉ áyá hai. 4Pas Dáúd ne jásús bhejkar ma‘lúm kar liyá, ki Sáúl fi’lhaqíqat áyá hai. 5Tab Dáúd uṭhkar Sáúl kí ḳhaimagáh meṉ áyá; aur wuh jagah dekhí jaháṉ Sáúl, aur Naiyir ká beṭá Abinaiyir bhí jo us ke lashkar ká sardár thá árám kar rahe the; aur Sáúl gáṛiyoṉ kí jagah ke bích sotá thá, aur log us ke girdágird ḍere ḍále húe the. 6Tab Dáúd ne Hittí Aḳhímalik, aur Zarúyáh ke beṭe Abíshai se jo Yoáb ká bháí thá kahá, Kaun mere sáth Sáúl ke pás ḳhaimagáh meṉ chalegá? Abíshai ne kahá, Maiṉ tere sáth chalúṉgá. 7So Dáúd aur Abíshai rát ko lashkar meṉ ghuse; aur dekhá, ki Sáúl gáṛiyoṉ kí jagah ke bích meṉ paṛá so rahá hai, aur us ká neza us ke sirháne zamín meṉ gaṛá húá hai; aur Abinaiyir aur lashkar ke log us ke gird paṛe haiṉ. 8Tab Abíshai ne Dáúd se kahá, Ḳhudá ne áj ke din tere dushman ko tere háth meṉ kar diyá hai; so ab tú zará mujh ko ijázat de ki neze ke ek hí wár meṉ use zamín se paiwand kar dúṉ, aur maiṉ us par dúsrá wár karne ká bhí nahíṉ. 9Dáúd ne Abíshai se kahá, Use qatl na kar; kyúṉki kaun hai jo Ḳhudáwand ke mamsúh par háth uṭháe aur begunáh ṭhahre? 10Aur Dáúd ne yih bhí kahá, ki Ḳhudáwand kí hayát kí qasam Ḳhudáwand áp us ko máregá, yá us kí maut ká din áegá, yá wuh jang meṉ jákar mar jáegá: 11lekin Ḳhudáwand na kare, ki maiṉ Ḳhudáwand ke mamsúh par háth chaláúṉ: par zará us ke sirhane se yih neza aur pání kí suráhí uṭhá le; phir ham chale chaleṉ. 12So Dáúd ne neza aur pání kí suráhí Sáúl ke sirháne se uṭháí, aur wuh chal diye; aur na kisí ádmí ne yih dekhá, aur na kisí ko ḳhabar húí, aur na koí jágá; kyúṉki wuh sab ke sab sote the, is liye ki Ḳhudáwand kí taraf se un par gahrí níṉd áí húí thí. 13Phir Dáúd dúsrí taraf jákar us paháṛ kí choṭí par dúr khaṛá rahá; aur un ke darmiyán ek baṛá fásila thá. 14Aur Dáúd ne un logoṉ ko aur Naiyir ke beṭe Abinaiyir ko pukárkar kahá, ki Ai Abinaiyir, tú jawáb nahíṉ detá? Abinaiyir ne jawáb diyá, Tú kaun hai jo bádsháh ko pukártá hai? 15Dáúd ne Abinaiyir se kahá, Kyá tú baṛá bahádur nahíṉ, aur kaun baní Isráíl meṉ terá nazír hai? pas kis liye tú ne apne málik bádsháh kí nigahbání na kí? kyúṉki ek shaḳhs tere málik bádsháh ko qatl karne ko ghusá thá. 16Pas yih kám tú ne kuchh achchhá na kíyá. Ḳhudáwand kí hayát kí qasam, tum wájibu’l qatl ho, kyúṉki tum ne apne málik kí jo Ḳhudáwand ká mamsúh hai, nigahbání na kí. Ab zará dekh, ki bádsháh ká bhálá, aur pání kí suráhí jo us ke sirháne thí kaháṉ haiṉ. 17Tab Sáúl ne Dáúd kí áwáz pahchání, aur kahá, Ai mere beṭe Dáúd, kyá yih terí áwáz hai? Dáúd ne kahá, Ai mere málik bádsháh, yih merí hí áwáz hai. 18Aur us ne kahá, Merá málik kyúṉ apne ḳhádim ke píchhe paṛá hai? maiṉ ne kyá kiyá hai? aur mujh meṉ kyá badí hai? 19So ab zará merá málik bádsháh, apne bande kí báteṉ sune. Agar Ḳhudáwand ne tujh ko mere ḳhiláf ubhárá ho, to wuh koí hadya manzúr kare: aur agar ádmíoṉ ká kám ho, to wuh Ḳhudáwand ke áge mal‘ún hoṉ; kyúṉki unhoṉ ne áj ke din mujh ko ḳhárij kiyá hai, ki maiṉ Ḳhudáwand kí dí húí mírás meṉ shámil na rahúṉ, aur mujh se kahte haiṉ, Já, âur deotáoṉ kí ‘ibádat kar. 20So ab Ḳhudáwand kí huzúrí se alag merá ḳhún zamín par na bahe: kyúṉki baní Isráíl ká bádsháh ek pissú ḍhúṉḍhne ko is tarah niklá hai, jaise koí paháṛoṉ par títar ká shikár kartá ho. 21Tab Sáúl ne kahá, Maiṉ ne ḳhatá kí: ai mere beṭe Dáúd, lauṭ á; kyúṉki maiṉ phir tujhe nuqsán nahíṉ pahuṉcháúṉgá; is liye ki merí ján áj ke din terí nigáh meṉ qímatí ṭhahrí: dekh, maiṉ ne hamáqat kí, aur niháyat baṛí bhúl mujh se húí. 22Dáúd ne jawáb diyá, Ai bádsháh, is bhále ko dekh! so jawánoṉ meṉ se koí ákar ise le jáe. 23Aur Ḳhudáwand har shaḳhs ko us kí sadáqat aur diyánatdárí ke muwáfiq jazá degá, kyúṉki Ḳhudáwand ne áj tujhe mere háth meṉ kar diyá thá, par maiṉ ne na cháhá, ki Ḳhudáwand ke mamsúh par háth uṭháúṉ. 24Aur dekh, jis tarah terí zindagí áj merí nazar meṉ giráṉqadr ṭhahrí, isí tarah merí zindagí Ḳhudáwand kí nigáh meṉ giráṉqadr ho, aur wuh mujhe sab taklífoṉ se riháí baḳhshe. 25Tab Sáúl ne Dáúd se kahá, Ai mere beṭe Dáúd, tú mubárak ho! tú baṛe baṛe kám karegá, aur zarúr fathmand hogá. So Dáúd apní ráh chalá gayá, aur Sáúl apne makán ko lauṭá.
Currently Selected:
1 Samúel 26: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
