1 Samúel 24
24
1Jab Sáúl Filistíoṉ ká píchhá karke lauṭá, to use ḳhabar milí, ki Dáúd ‘Ain Jadí ke biyábán meṉ hai. 2So Sáúl sab Isráílíoṉ meṉ se tín hazár chída mard lekar janglí bakroṉ kí chaṭánoṉ par Dáúd aur us ke logoṉ kí talásh meṉ chalá. 3Aur wuh ráste meṉ bheṛsáloṉ ke pás pahuṉchá, jaháṉ ek g̣ár thá: aur Sáúl us g̣ár meṉ farágat karne ghusá: aur Dáúd apne logoṉ samet us g̣ár ke andarúní ḳhánoṉ meṉ baiṭhá thá. 4Aur Dáúd ke logoṉ ne us se kahá, Dekh, yih wuh din hai, jis kí bábat Ḳhudáwand ne tujh se kahá thá, ki Dekh, maiṉ tere dushman ko tere háth meṉ kar dúṉgá, aur jo terá jí cháhe so tú us se karná. So Dáúd uṭhkar Sáúl ke jubbe ká dáman chupke se káṭ le gayá. 5Aur us ke ba‘d aisá húá, ki Dáúd ká dil bechain húá, is liye ki us ne Sáúl ke jubbe ká dáman káṭ liyá thá. 6Aur us ne apne logoṉ se kahá, ki Ḳhudáwand na kare, ki maiṉ apne málik se jo Ḳhudáwand ká mamsúh hai aisá kám karúṉ ki apná háth us par chaláúṉ, is liye ki wuh Ḳhudáwand ká mamsúh hai. 7So Dáúd ne apne logoṉ ko yih báteṉ kahkar roká, aur un ko Sáúl par hamla karne na diyá. Aur Sáúl uṭhkar g̣ár se niklá, aur apní ráh lí. 8Aur ba‘d us ke Dáúd bhí uṭhá, aur us g̣ár meṉ se niklá, aur Sáúl ke píchhe pukárkar kahne lagá, Ai mere málik bádsháh! Jab Sáúl ne píchhe phirkar dekhá, to Dáúd ne auṉdhe muṉh girkar sijda kiyá. 9Aur Dáúd ne Sáúl se kahá, Tú kyúṉ aise logoṉ kí bátoṉ ko suntá hai jo kahte haiṉ ki Dáúd terí badí cháhtá hai? 10Dekh, áj ke din tú ne apní áṉkhoṉ se dekhá, ki Ḳhudáwand ne g̣ár meṉ áj hí tujhe mere háth meṉ kar diyá: aur ba‘zoṉ ne mujh se kahá bhí, ki tujhe már ḍálúṉ, par merí aṉkhoṉ ne terá liház kiyá, aur maiṉ ne kahá, ki Maiṉ apne málik par háth nahíṉ chaláúṉgá; kyúṉki wuh Ḳhudáwand ká mamsúh hai. 11Másiwá is ke, ai mere báp, dekh, yih bhí dekh, ki tere jubbe ká dáman mere háth meṉ hai: aur chúṉki maiṉ ne tere jubbe ká dáman káṭá, aur tujhe már nahíṉ ḍálá, so tú ján le, aur dekh le, ki mere háth meṉ kisí tarah kí badí yá buráí nahíṉ, aur maiṉ ne terá koí gunáh nahíṉ kiyá; go tú merí ján lene ke darpai hai. 12Ḳhudáwand mere aur tere darmiyán insáf kare, aur Ḳhudáwand tujh se merá intiqám le: par merá háth tujh par nahíṉ uṭhegá. 13Qadím logoṉ kí masal hai, ki Buroṉ se buráí hotí hai: par merá háth tujh par nahíṉ uṭhegá. 14Isráíl ká bádsháh kis ke píchhe niklá? tú kis ke píchhe paṛá hai? ek mare húe kutte ke píchhe, ek pissú ke píchhe? 15Pas, Ḳhudáwand hí munsif ho, aur mere aur tere darmiyán faisala kare, aur dekhe, aur merá muqaddama laṛe, aur tere háth se mujhe chhuṛáe. 16Aur aisá húá, ki jab Dáúd yih báteṉ Sáúl se kah chuká, to Sáúl ne kahá, Ai mere beṭe Dáúd, kyá yih terí áwáz hai? Aur Sáúl chillákar rone lagá. 17Aur us ne Dáúd se kahá, Tú mujh se ziyáda sádiq hai; is liye ki tú ne mere sáth bhaláí kí hai, háláṉki maiṉ ne tere sáth buráí kí. 18Aur tú ne áj ke din záhir kar diyá, ki tú ne mere sáth bhaláí kí hai; kyúṉki jab Ḳhudáwand ne mujhe tere háth meṉ kar diyá, to tú ne mujhe qatl na kiyá. 19Bhalá kyá koí apne dushman ko pákar use salámat jáne detá hai? So Ḳhudáwand us nekí ke ‘iwaz jo tú ne mujh se áj ke din kí, tujh ko nek jazá de. 20Aur ab, dekh, maiṉ ḳhúb jántá húṉ, ki tú yaqínan bádsháh hogá, aur Isráíl kí saltanat tere háth meṉ paṛkar qáim hogí. 21So ab mujh se Ḳhudáwand kí qasam khá, ki tú mere ba‘d merí nasl ko halák nahíṉ karegá, aur mere báp ke gharáne meṉ se mere nám ko miṭá nahíṉ ḍálegá. 22So Dáúd ne Sáúl se qasam kháí. Aur Sáúl ghar ko chalá gayá: par Dáúd aur us ke log us gaṛh meṉ já baiṭhe.
Currently Selected:
1 Samúel 24: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
