1 Samúel 23
23
1Aur unhoṉ ne Dáúd ko ḳhabar dí, ki Dekh, Filistí Qa‘ílah se laṛ rahe haiṉ, aur khalíhánoṉ ko lúṭ rahe haiṉ. 2Tab Dáúd ne Ḳhudáwand se púchhá, ki Kyá maiṉ jáúṉ, aur un Filistíoṉ ko márúṉ? Ḳhudáwand ne Dáúd ko farmáyá, Já, Filistíoṉ ko már, aur Qa‘ílah ko bachá. 3Aur Dáúd ke logoṉ ne us se kahá, ki Dekh, ham to yahíṉ Yahúdáh meṉ ḍarte haiṉ: pas, ham Qa‘ílah ko jákar Filistí lashkaroṉ ká sámná kareṉ, to kitná ziyáda na ḍar lagegá? 4Tab Dáúd ne Ḳhudáwand se phir suwál kiyá. Ḳhudáwand ne jawáb diyá, ki Uṭh, Qa‘ílah ko já; kyúṉki maiṉ Filistíoṉ ko tere háth meṉ kar dúṉgá. 5So Dáúd aur us ke log Qa‘ílah ko gaye, aur Filistíoṉ se laṛe, aur un kí mawáshí le áe, aur un ko baṛí ḳhúnrezí ke sáth qatl kiyá. Yúṉ Dáúd ne Qa‘ílíoṉ ko bacháyá.
6Jab Aḳhímalik ká beṭá Abíyátar Dáúd ke pás Qa‘ílah ko bhágá, to us ke háth meṉ ek afod thá jise wuh sáth le gayá thá. 7Aur Sáúl ko ḳhabar húí, kí Dáúd Qa‘ílah meṉ áyá hai. So Sáúl kahne lagá, ki Ḳhudá ne use mere háth meṉ kar diyá; kyúṉki wuh jo aise shahr meṉ ghusá hai, jis meṉ pháṭak aur aṛbange haiṉ, to qaid ho gayá hai. 8Aur Sáúl ne jang ke liye apne sáre lashkar ko bulá liyá, táki Qa‘ílah meṉ jákar Dáúd aur us ke logoṉ ko gher le. 9Aur Dáúd ko ma‘lúm ho gayá, ki Sáúl us ke ḳhiláf badí kí tadbíreṉ kar rahá hai; so us ne Abíyátar káhin se kahá, ki Afod yaháṉ le á. 10Aur Dáúd ne kahá, Ai Ḳhudáwand, Isráíl ke Ḳhudá, tere bande ne yih qata‘í suná hai, ki Sáúl Qa‘ílah ko áná cháhtá hai, táki mere sabab se shahr ko gárat kar de. 11So kyá Qa‘ílah ke log mujh ko us ke hawále kar deṉge? kyá Sáúl, jaisá tere bande ne suná hai, áegá? Ai Ḳhudáwand, Isráíl ke Ḳhudá, maiṉ terí minnat kartá húṉ, ki tú apne bande ko batá de. Ḳhudáwand ne kahá, Wuh áegá. 12Tab Dáúd ne kahá, ki Kyá Qa‘ílah ke log mujhe aur mere logoṉ ko Sáúl ke hawále kar deṉge? Ḳhudáwand ne kahá, Wuh tujhe hawále kar deṉge. 13Tab Dáúd aur us ke log jo qaríban chha sau the uṭhkar Qa‘ílah se nikal gaye, aur jaháṉ kahíṉ já sake chal diye. Aur Sáúl ko ḳhabar milí ki Dáúd Qa‘ílah se nikal gayá; pas wuh jáne se báz rahá.
14Aur Dáúd ne biyábán ke qil‘oṉ meṉ sukúnat kí, aur dasht i Zíf ke kohistání mulk meṉ rahá. Aur Sáúl har roz us kí talásh meṉ rahá, par Ḳhudá ne us ko us ke háth meṉ hawále na kiyá. 15Aur Dáúd ne dekhá, ki Sáúl us kí ján lene ko niklá hai; us waqt Dáúd dasht i Zíf ke ban meṉ thá. 16Aur Sáúl ká beṭá Yúnatan uṭhkar Dáúd ke pás ban meṉ gayá, aur Ḳhudá meṉ us ká háth mazbút kiyá. 17Us ne us se kahá, Tú mat ḍar; kyúṉki tú mere báp Sáúl ke háth meṉ nahíṉ paṛegá, aur tú Isráíl ká bádsháh hogá, aur maiṉ tujh se dúsre darje par húṉgá; yih mere báp Sáúl ko bhí ma‘lúm hai. 18Aur un donoṉ ne Ḳhudáwand ke áge ‘ahd o paimán kiyá. Aur Dáúd ban meṉ ṭhahrá rahá, aur Yúnatan apne ghar ko gayá. 19Tab Zíf ke log Jibi‘ah meṉ Sáúl ke pás jákar kahne lage, Kyá Dáúd hamáre darmiyán koh i Hakílah ke ban ke qil‘oṉ meṉ dasht ke junúb kí taraf chhipá nahíṉ hai? 20So ab, ai bádsháh, tere dil ko jo baṛí árzú áne kí hai us ke mutábiq á, aur us ko bádsháh ke háth meṉ hawála karná hamárá zimma rahá. 21Tab Sáúl ne kahá, Ḳhudáwand kí taraf se tum mubárak ho; kyúṉki tum ne mujh par rahm kiyá. 22So ab zará jákar sab kuchh âur pakká kar lo, aur us kí jagah ko dekhkar ján lo ki us ká ṭhikáná kaháṉ hai, aur kis ne use waháṉ dekhá hai: kyúṉki mujh se kahá gayá hai, ki wuh baṛí chálákí se kám kartá hai. 23So tum dekh bhálkar, jaháṉ jaháṉ wuh chhipá kartá hai, un ṭhikánoṉ ká patá lagákar zarúr mere pás phir áo, aur maiṉ tumháre sáth chalúṉgá; aur agar wuh is mulk meṉ kahíṉ bhí ho, to maiṉ use Yahúdáh ke hazároṉ hazár meṉ se ḍhúṉḍh nikálúṉgá. 24So wuh uṭhe, aur Sáúl se peshtar Zíf ko gaye. Lekin Dáúd aur us ke log Ma‘ún ke biyábán meṉ the jo dasht ke junúb kí taraf maidán meṉ thá. 25Aur Sáúl aur us ke log us kí talásh meṉ nikle. Aur Dáúd ko ḳhabar pahuṉchí: so wuh chaṭán par se utar áyá, aur Ma‘ún ke biyábán meṉ rahne lagá; aur Sáúl ne yih sunkar Ma‘ún ke biyábán meṉ Dáúd ká píchhá kiyá. 26Aur Sáúl paháṛ kí is taraf, aur Dáúd aur us ke log paháṛ kí us taraf chal rahe the; aur Dáúd Sáúl ke ḳhauf se nikal jáne kí jaldí kar rahá thá, is liye ki Sáúl aur us ke logoṉ ne Dáúd ko aur us ke logoṉ ko pakaṛne ke liye gher liyá thá. 27Lekin ek qásid ne ákar Sáúl se kahá, ki Jaldí chal, kyúṉki Filistíoṉ ne mulk par hamla kiyá hai. 28So Sáúl Dáúd ká píchhá chhoṛkar Filistíoṉ ká muqábala karne ko gayá, is liye unhoṉ ne us jagah ká nám Sila‘ Hammaḳhlaqot rakkhá. 29Aur Dáúd waháṉ se chalá gayá, aur ‘Ain Jadí ke qil‘oṉ meṉ rahne lagá.
Currently Selected:
1 Samúel 23: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
