1 Samúel 21
21
1Aur Dáúd Nob meṉ Aḳhímalik káhin ke pás áyá: aur Aḳhímalik Dáúd se milne ko káṉptá húá áyá, aur us se kahá, Tú kyúṉ akelá hai, aur tere sáth koí ádmí nahíṉ? 2Dáúd ne Aḳhímalik káhin se kahá, ki Bádsháh ne mujhe ek kám ká hukm karke kahá hai, ki Jis kám par maiṉ tujhe bhejtá húṉ, aur jo hukm maiṉ ne tujhe diyá hai, wuh kisí shaḳhs par záhir na ho: so maiṉ ne jawánoṉ ko fulání fulání jagah biṭhá diyá hai. 3Pas ab tere háṉ kyá hai? mere háth meṉ roṭiyoṉ ke páṉch girde, yá jo kuchh maujúd ho, de. 4Káhin ne Dáúd ko jawáb diyá, Mere háṉ ‘ámm roṭiyáṉ to nahíṉ, par muqaddas roṭiyáṉ haiṉ, basharte ki wuh jawán ‘auratoṉ se alag rahe hoṉ. 5Dáúd ne káhin ko jawáb diyá, Sach to yih hai, ki tín din se ‘aurateṉ ham se alag rahí haiṉ, aur agarchi yih ma‘múlí safar hai, taubhí jab maiṉ chalá thá, tab in jawánoṉ ke bartan pák the, to áj to zarúr hí wuh bartan pák hoṉge. 6Tab káhin ne muqaddas roṭí us ko dí; kyúṉki âur roṭí waháṉ nahíṉ thí, faqat nazr kí roṭí thí jo Ḳhudáwand ke áge se uṭháí gayí thí táki us ke ‘iwaz us din jab wuh uṭháí jáe garm roṭí rakkhí jáe. 7Aur waháṉ us din Sáúl ke ḳhádimoṉ meṉ se ek shaḳhs Ḳhudáwand ke áge ruká húá thá; us ká nám Adomí Doeg thá; yih Sáúl ke charwáhoṉ ká sardár thá. 8Phir Dáúd ne Aḳhímalik se púchhá, Kyá yaháṉ tere pás koí neza yá talwár nahíṉ? kyúṉki maiṉ apní talwár aur apne hathyár apne sáth nahíṉ láyá, kyúṉki bádsháh ke kám kí jaldí thí. 9Us káhin ne kahá, ki Filistí Joliyat kí talwár jise tú ne Ailáh kí wádí meṉ qatl kiyá, kapṛe meṉ lipṭí húí afod ke píchhe rakkhí hai: agar tú use lená cháhtá hai, to le; us ke siwá yaháṉ koí âur nahíṉ hai. Dáúd ne kahá, Waisí to koí hai hí nahíṉ; wuhí mujhe de.
10Aur Dáúd uṭhá, aur Sáúl ke ḳhauf se usí din bhágá, aur Ját ke bádsháh Akís ke pás chalá gayá. 11Aur Akís ke mulázimoṉ ne us se kahá, Kyá yihí us mulk ká bádsháh Dáúd nahíṉ? Kyá isí ke báre meṉ náchte waqt gá gákar unhoṉ ne ápas meṉ nahíṉ kahá thá, ki
Sáúl ne to hazároṉ ko,
Par Dáúd ne lákhoṉ ko márá?
12Dáúd ne yih báteṉ apne dil meṉ rakkhíṉ, aur Ját ke bádsháh Akís se niháyat ḍará. 13So wuh un ke áge dúsrí chál chalá, aur un ke háth paṛkar apne ko díwána sá baná liyá, aur pháṭak ke kiwáṛoṉ par lakíreṉ kheṉchne, aur apne thúk ko apní dáṛhí par baháne lagá. 14Tab Akís ne apne naukaroṉ se kahá, Lo, yih ádmí to siṛí hai: tum use mere pás kyúṉ láe? 15Kyá mujhe siṛiyoṉ kí zarúrat hai jo tum us ko mere pás láe ho ki mere sámne siṛípan kare? kyá aisá ádmí mere ghar meṉ áne páegá?
Currently Selected:
1 Samúel 21: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
