1 Samúel 20
20
1Aur Dáúd Rámah ke Nayot se bhágá, aur Yúnatan ke pás jákar kahne lagá, ki Maiṉ ne kyá kiyá hai? merá kyá gunáh hai? maiṉ ne tere báp ke áge kaun sí taqsír kí hai jo wuh merí ján ká ḳhwáháṉ hai? 2Us ne us se kahá, ki Ḳhudá na kare! Tú márá nahíṉ jáegá; dekh, merá báp koí kám baṛá ho yá chhoṭá nahíṉ kartá, jab tak use mujh ko na batáe. Phir bhalá, merá báp is bát ko kyúṉ mujh se chhipáegá? aisá nahíṉ. 3Tab Dáúd ne qasam khákar kahá, ki Tere báp ko baḳhúbí ma‘lúm hai, ki mujh par tere karam kí nazar hai, so wuh sochtá hogá ki Yúnatan ko yih ma‘lúm na ho, nahíṉ to wuh ranjída hogá; par yaqínan Ḳhudáwand kí hayát aur terí ján kí qasam, ki mujh meṉ aur maut meṉ sirf ek hí qadam ká fásila hai. 4Tab Yúnatan ne Dáúd se kahá, ki Jo kuchh terá jí cháhtá ho, maiṉ tere liye wuhí karúṉgá. 5Dáúd ne Yúnatan se kahá, ki Dekh, kal nayá chánd hai, aur mujhe lázim hai, ki bádsháh ke sáth kháne baiṭhúṉ: par tú mujhe ijázat de, ki maiṉ parsoṉ shám tak maidán meṉ chhipá rahúṉ. 6Agar maiṉ tere báp ko yád áúṉ to kahná, ki Dáúd ne mujh se bajidd hokar ruḳhsat máṉgí, táki wuh apne shahr Baitlahm ko jáe; is liye ki waháṉ sáre gharáne kí taraf se sálána qurbání hai. 7Agar wuh kahe, ki Achchhá; to tere chákar kí salámatí hai: par agar wuh g̣usse se bhar jáe, to ján lená, ki us ne badí kí ṭhán lí hai. 8Pas tú apne ḳhádim ke sáth mihr se pesh á; kyúṉki tú ne apne ḳhádim ko apne sáth Ḳhudáwand ke ‘ahd meṉ dáḳhil kar liyá hai: par agar mujh meṉ kuchh badí ho, to tú áp hí mujhe qatl kar ḍál; tú mujhe apne báp ke pás kyúṉ pahuṉcháe? 9Yúnatan ne kahá, Aisí bát kabhí na hogí; agar mujhe ‘ilm hotá, ki mere báp ká iráda hai ki tujh se badí kare, to kyá maiṉ tujhe ḳhabar na kartá? 10Phir Dáúd ne Yúnatan se kahá, Agar terá báp tujhe saḳht jawáb de, to kaun mujhe batáegá? 11Yúnatan ne Dáúd se kahá, Chal, ham maidán ko nikal jáeṉ. Chunáṉchí wuh donoṉ maidán ko chale gaye.
12Tab Yúnatan Dáúd se kahne lagá, Ḳhudáwand Isráíl ká Ḳhudá, gawáh rahe, ki jab maiṉ kal yá parsoṉ ‘anqaríb isí waqt apne báp ká bhed lúṉ, aur dekhúṉ kí Dáúd ke liye bhaláí hai, to kyá maiṉ usí waqt tere pás kahlá na bhejúṉgá, aur tujhe ná batáúṉgá? 13Ḳhudáwand Yúnatan se aisá hí balki is se bhí ziyáda kare, agar mere báp kí yihí marzí ho, ki tujh se badí kare, aur maiṉ tujhe na batáúṉ, aur tujhe ruḳhsat na kar dúṉ, táki tú salámat chalá jáe; aur Ḳhudáwand tere sáth rahe, jaisá wuh mere báp ke sáth rahá. 14Aur sirf yihí nahíṉ, ki jab tak maiṉ jítá rahúṉ, tab hí tak tú mujh par Ḳhudáwand ká sá karam kare, táki maiṉ mar na jáúṉ: 15balki mere gharáne se bhí kabhí apne karam ko báz na rakhná: aur jab Ḳhudáwand tere dushmanoṉ meṉ se ek ek ko zamín par se nest o nábúd kar ḍále, tab bhí aisá hí karná. 16So Yúnatan ne Dáúd ke ḳhándán se ‘ahd kiyá, aur kahá, ki Ḳhudáwand Dáúd ke dushmanoṉ se intiqám le. 17Aur Yúnatan ne Dáúd ko us mahabbat ke sabab se jo us ko us se thí, dobára qasam khiláí; kyúṉki wuh us se apní ján ke barábar mahabbat rakhtá thá. 18Tab Yúnatan ne Dáúd se kahá, Kal nayá chánd hai, aur tú yád áegá, kyúṉki terí jagah ḳhálí rahegí. 19Aur apne tín din ṭhahrne ke ba‘d tú jald jákar us jagah á jáná, jaháṉ tú us kám ke din chhipá thá, aur us patthar ke nazdík rahná, jis ká nám Azal hai. 20Aur maiṉ us taraf tín tír is tarah chaláúṉgá, goyá nishána mártá húṉ. 21Aur dekh, maiṉ us waqt chhokre ko bhejúṉgá, ki Já, tíroṉ ko ḍhúṉḍh le á; so agar maiṉ chhokre se kahúṉ, ki Dekh, tír terí is taraf haiṉ; to tú un ko uṭhákar le áná, kyúṉki Ḳhudáwand kí hayát kí qasam tere liye salámatí hogí, na ki nuqsán. 22Par agar maiṉ chhokre se yúṉ kahúṉ, ki Dekh, tír terí us taraf hain; to tú apní ráh lená, kyúṉki Ḳhudáwand ne tujhe ruḳhsat kiyá hai. 23Rahá wuh mu‘ámala jis ká charchá tú ne aur maiṉ ne kiyá hai, so dekh, Ḳhudáwand abad tak mere aur tere bích meṉ rahe!
24Pas Dáúd maidán meṉ já chhipá: aur jab nayá chánd húá, to bádsháh kháná kháne baiṭhá. 25Aur bádsháh apne dastúr ke muwáfiq apní masnad ya‘ní usí masnad par jo díwár ke barábar thí baithá; aur Yúnatan khaṛá húá aur Abinaiyir Sáúl ke pahlú meṉ baiṭhá, aur Dáúd kí jagah ḳhálí rahí. 26Lekin us roz Sáúl ne kuchh na kahá, kyúṉki us ne gumán kiyá, ki Use kuchh ho gayá hogá; wuh nápák hogá; wuh zarúr nápák hí hogá. 27Aur naye chánd ke ba‘d dúsre din Dáúd kí jagah phir ḳhálí rahí: tab Sáúl ne apne beṭe Yúnatan se kahá, ki Kyá sabab hai, ki Yassí ká beṭá na to kal kháne par áyá, na áj áyá hai? 28Tab Yúnatan ne Sáúl ko jawáb diyá, ki Dáúd ne mujh se bajidd hokar Baitlahm jáne ko ruḳhsat máṉgí: 29wuh kahne lagá, ki Maiṉ terí minnat kartá húṉ, mujhe jáne de, kyúṉki shahr meṉ hamáre gharáne ká zabíha hai, aur mere bháí ne mujhe hukm kiyá, ki házir rahúṉ; ab agar mujh par tere karam kí nazar hai, to mujhe jáne de, ki apne bháiyoṉ ko dekhúṉ. Isí liye wuh bádsháh ke dastarḳhwán par házir nahíṉ húá. 30Tab Sáúl ká g̣ussa Yúnatan par bhaṛká, aur us ne us se kahá, Ai kajraftár chanḍálin ke beṭe, kyá maiṉ nahíṉ jántá, ki tú ne apní sharmindagí aur apní máṉ kí barahnagí kí sharmindagí ke liye Yassí ke beṭe ko chun liyá hai? 31Kyúṉki jab tak Yassí ká yih beṭá rú e zamín par zinda hai, na to tujh ko qiyám hogá, na terí saltanat ko. Is liye abhí log bhejkar use mere pás lá; kyúṉki us ká marná zarúr hai. 32Tab Yúnatan ne apne báp Sáúl ko jawáb diyá, Wuh kyúṉ márá jáe? us ne kyá kiyá hai? 33Tab Sáúl ne bhálá pheṉká, ki use máre; is se Yúnatan ján gayá, ki us ke báp ne Dáúd ke qatl ká púrá iráda kiyá hai. 34So Yúnatan baṛe g̣usse meṉ dastarḳhwán par se uṭh gayá, aur mahíne ke us dúsre din kuchh kháná na kháyá; kyúṉki wuh Dáúd ke liye ranjída thá, is liye ki us ke báp ne use ruswá kiyá.
35Aur subh ko Yúnatan usí waqt jo Dáúd ke sáth ṭhahrá thá maidán ko gayá, aur ek chhokṛá us ke sáth thá. 36Aur us ne apne chhokre ko hukm kiyá, ki Dauṛ, aur yih tír jo maiṉ chalátá húṉ ḍhúṉḍh lá. Aur jab wuh laṛká dauṛá já rahá thá, to us ne aisá tír lagáyá jo us se áge gayá. 37Aur jab wuh chhokrá us tír kí jagah pahuṉchá jise Yúnatan ne chaláyá thá, to Yúnatan ne chhokre ke píchhe pukárkar kahá, Kyá wuh tír terí us taraf nahíṉ? 38Aur Yúnatan us chhokre ke píchhe chilláyá, Tez já! jaldí kar! ṭhahr mat! So Yúnatan ke chhokre ne tíroṉ ko jama‘ kiyá, aur apne áqá ke pás lauṭá. 39Par us chhokre ko kuchh ma‘lúm na húá; faqat Dáúd aur Yúnatan hí is ká bhed jánte the. 40Phir Yúnatan ne apne hathyár us chhokre ko diye, aur us se kahá, In ko shahr ko le já. 41Júṉhí wuh chhokrá chalá gayá, Dáúd junúb kí taraf se niklá, aur zamín par auṉdhá hokar tín bár sijda kiyá; aur unhoṉ ne ápas meṉ ek dúsre ko chúmá, aur báham roe, par Dáúd bahut royá. 42Aur Yúnatan ne Dáúd se kahá, ki Salámat chalá já, kyúṉki ham donoṉ ne Ḳhudáwand ke nám kí qasam khákar kahá hai, ki Ḳhudáwand mere aur tere darmiyán, aur merí aur terí nasl ke darmiyán abad tak rahe. So wuh uṭhkar rawána húá; aur Yúnatan shahr meṉ chalá gayá.
Currently Selected:
1 Samúel 20: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
