Левийлилер 19

Азизлик ве адалетлик акъкъында къанунлар

1РАББИ Мусагъа бойле деди:

2 # Лев 11.44; Ехо 24.19; 1 Пётр 1.16 – Исраиль джемаатына бойле айт:

Азиз олунъыз, чюнки Мен, РАББИ, сизинъ Алланъыз – азизим.

3 # Чыкъ 20.8-12 Эр кес ана-бабасына сайгъы бильдирсин. Раатлыкъ куньлеримни тутунъыз. Мен – РАББИм, сизинъ Алланъыз.

4 # Чыкъ 20.3-5; Текр 5.8 Башкъа аллаларгъа барманъыз. Озюнъизге иритильген маденден путларны япманъыз. Мен – РАББИм, сизинъ Алланъыз.

5 # Лев 7.16-18 РАББИге аманлыкъ къурбаныны кетиргенде, о къабул этильсин деп, чалынъыз. 6Къурбан этини къурбан чалгъан куню ве келеджек куню ашамакъ мумкюн. Учюнджи кунюне къалгъан этни исе якъмакъ керек. 7Эгер бир адам оны учюнджи куню ашаса, о, пис шей олур. Бу къурбан къабул олунмаз. 8Оны ашагъан адам гуна къазаныр, чюнки о, РАББИнинъ азизлигини, адий шейни киби, бакъты. Шу адам халкънынъ арасындан ёкъ этильсин.

9 # Лев 23.22; Текр 24.19; Рут 2.1-2 Топрагъынъызда берекет джыйгъанда, тарланынъ кенарларыны орманъыз. Оракъ вакътында ерге тюшип къалгъан башакъларны джыйманъыз. 10#Рут 2.1, 15Багъынъызда эр бир юзюм салкъымыны джыйманъыз, ерге тюшкен юзюм данелерини топламанъыз. Буны фукъарелерге ве кельмешеклерге къалдырынъыз. Мен – РАББИм, сизинъ Алланъыз.

11 # Чыкъ 20.15; Лев 6.2-3; Эф 4.25; Кол 3.9 Хырсызламанъыз. Ялан айтманъыз. Бири-биринъизни алдатманъыз.

12 # Чыкъ 20.7; Текр 5.11; Мал 3.5 Ялангъа Меним Адымнен ант этменъиз. Алланъызнынъ Адына адий адгъа киби янашманъыз. Мен – РАББИм.

13 # Текр 24.14-15; Рим 13.8 Якъын адамнынъ джаныны агъыртманъыз, онынъ малы-мулькюни озюнъизге тартып алманъыз.

Ишчинънинъ къазанчыны сабагъа къадар къалдырманъыз.

14Сагъырны къаргъаманъыз. Кёр адамнынъ огюне, сюрюнсин деп, бир шей къойманъыз. Алланъыздан къоркъунъыз. Мен – РАББИм.

15 # Чыкъ 23.2-3; Текр 1.17 Адалетсиз суд этменъиз. Фукъаре адамгъа керексиз дикъкъат косьтерменъиз, буюк адамгъа да чокъ урьмет этменъиз. Якъын адамны адалетнен суд этинъиз.

16 # Чыкъ 23.1, 7; Текр 27.25; 3 Пад 21.1-11 Халкънынъ арасында ошекчи олып юрменъиз.

Якъын адамнынъ джанына зарар кетирменъиз. Мен – РАББИм.

17 # Мт 18.15; Лк 17.3 Юреклеринъизде агъа-къардашынъызгъа къаршы душманлыкъ этменъиз. Якъын адамнынъ гунасыны онъа айтынъыз, ве сонъра онынъ гунасына къошулмазсыз.

18 # Икм 20.22; 1 Пад 20.17; Мт 5.43; 19.19; 22.39; Мк 12.31; Лк 10.27; Якъ 2.8; Рим 13.9; Гал 5.14 Яманлыкъкъа къаршы яманлыкъ япманъыз, халкъынъыздан ич бир адамгъа къаршы да яман фикирлерни тутманъыз. Лякин якъын адамны озюнъизни киби севинъиз. Мен – РАББИм.

19 # Текр 22.9 Низамнамелеримни беджеринъиз.

Чешит сой олгъан айванларны чифтлештирменъиз.

Тарланъызгъа эки тюрлю урлукъ сачманъыз.

Эки тюрлю йиптен, юнь ве кетенден токъулгъан урба кийменъиз.

20Бир акъай къадыннен яткъанда ве урлугъыны йибергенде, къадын исе къул олып, башкъа адамгъа нишанлы олса, амма даа азатлыкъкъа сатын алынмагъан олса, я да о даа азатлыкъкъа йиберильмеген олса, экисини джезаламакъ керек, амма ольдюрмемек, чюнки къадын азат дегиль. 21Акъай РАББИге, Корюшюв Чадырынынъ киришине къабаат ичюн къурбан оларакъ къабаат къочкъарыны кетирсин. 22Руханий РАББИнинъ огюнде къабаат къочкъарынынъ ярдымынен акъай ве онынъ япкъан гунасы ичюн одеме этсин. Сонъ о адам япкъан гуна багъышланыр.

23Сизге бериледжек топракъкъа кельгенинъизде ве анда чешит тюрлю мейва тереклерини сачкъанынъызда, тереклернинъ мейваларыны ашамагъа олмагъан киби сайынъыз. Учь йыл девамында оларны ашамагъа олмагъан киби сайынъыз. Оларны ашамагъа олмаз. 24Дёртюнджи йылы эписи мейваларыны азиз макътав бахшышы оларакъ РАББИге багъышламакъ керек. 25Бешинджи йылы мейваларыны ашанъыз. Бойле этсенъиз, сизинъ берекетинъиз чокълашыр. Мен – РАББИм, сизинъ Алланъыз.

26 # Баш 9.4; Лев 3.17; 7.26; 17.10; Текр 12.23-24; 18.10; Фаал 15.20, 29 Къаннен олгъан ашны ашаманъыз.

Ырым этменъиз, фал бакъманъыз.

27 # Лев 21.5 Башынъызнынъ чевресиндеки сачларны кесменъиз, сакъалынъызнынъ кенарларыны бозманъыз.

28 # Лев 21.5; Текр 14.1 Олюлер ичюн тенинъизде яра япманъыз, устюнъизге ине санчып бир тюрлю язы язманъыз. Мен – РАББИм.

29 # Текр 23.17 Къызынъны ороспулыкъ ёлуна къойып, оны арамлама. Ёкъса ороспулыкъ даркъалыр ве ер юзю ахлякъсызлыкъкъа толып ташар.

30 # Лев 26.2 Раатлыкъ куньлеримни тутунъыз. Меним Азиз Ериме урьмет косьтеринъиз. Мен – РАББИм.

31 # Чыкъ 22.18; Текр 18.11; 1 Пад 28.7 Рухларнен лаф эткенлерге барманъыз, джинлерни чагъыргъанларны къыдырманъыз. Ёкъса сиз арам олурсыз. Мен – РАББИм, сизинъ Алланъыз.

32 # Икм 20.29 Чал адамнынъ огюнде аякъкъа турунъыз, къартларны урьмет этинъиз ве Алланъыздан къоркъунъыз. Мен – РАББИм.

33 # Чыкъ 22.21 Топрагъынъызда ерлешкен кельмешекни хорламанъыз. 34#Чыкъ 12.49; Лев 24.22; Сай 15.16; Текр 10.19Аранъызда яшамакъ ичюн ерлешкен кельмешек сизлер ичюн ерли адам киби олсун, оны озюнъизни киби севинъиз. Сизлер де Мысыр топрагъында кельмешек эдинъиз. Мен – РАББИм, сизинъ Алланъыз.

35Адалетсиз суд этменъиз. Ольчюде, теразеде, микъдарда алдатманъыз. 36#Текр 25.13; Икм 11.1; 20.10; Ехез 45.10Сизинъ теразенъиз, теразе ташларынъыз, ашлыкънынъ ольчюси эфа ве ичерликнинъ ольчюси хин догъру олсун. Мен – РАББИм, сизни Мысырдан чыкъаргъан Алланъыз.

37Эписи низамнамелеримни ве къарарларымны тутунъыз ве беджеринъиз. Мен – РАББИм.

Currently Selected:

Левийлилер 19: CTB

Highlight

Copy

Compare