Kata Lom 4

Káyinenaku kata Abulaham

1Muñeˈe boot min uŋalaal bukittenoolum li Abulaham. Boot min oonaal buu mata Abulaham ammuu atuubawolaal ahaan? Waa labaje wabilumulo li akila humumool ammuu ál̥ahukowan? 2Nokoomuu loon Abulaham bakaanelool bújiye Ateemit li ajokool an acole, kama layilo asaloolo, bale inti hákil Ateemit. 3Li mal̥egenamu, Bakiicelabu bonsoon: «Abulaham láyinenyinen li Ateemit, káyinenaku koola li kúji Ateemit li ajokool an acole#Húkitumahu 15:6.» 4An alokumuu, fan ayab bacaamool. Bacaamabu umbu let bujoki loon káji, bale loon wah wan aate abaj. 5Bale an akaanutumuu bulok banooban, min áyinen bale kaanaku Ateemit lakaanekaan ahoofoola alako an acole, anawu ummu Ateemit fan ajokool an acole humum hata káyinenaku koola. 6Muñowu Ayíiyawu Dayit alobumuu mata kásuumaayaku kata an an Ateemit ajoke an acole, ban inti bakaanelool bújiye. Lansaan:

7«Awólo, bukanabuku kan

Ateemit abonketumuu bafetabu booliil,

kan ábujumuu uhoofoolawu wooliil.

8Awólo, anawu an Amaaŋenawu

ajokutumuu li uhoofoolawu woola#Ukijenawu 32:1-2.»

9Mantee kásuumaayaku unku li bukanabuku kateyumuu búkut bale kubaje, mantee kubabbaj foof li bukanabuku kateyutumuu búkut? Li mal̥egenamu loonaale: «Abulaham láyinenyinen li Ateemit, káyinenaku koola li kúji Ateemit li ajokool an acole.» 10Kama nay Ateemit ajokumuu Abulaham an acole? Mantee nan ateyumuu búkut aban, mantee akila bateyolut búkut? Let akila bateye búkut aban, bale akila bateyolut bo. 11Muñeˈe nan fú’ tómuu, Abulaham li atey búkut min lako búhiisenum. Búhiisenumabu umbu bo bommuu húlangumaaso háhiisumuu kaanaku Ateemit lajoojok Abulaham an acole humum hata káyinenaku koola, tówum atey búkut. Muñowu Abulaham áamummuu atuubaawu ata bukanabuku feh káyinenumuu li Ateemit buko bateyut búkut, ban li ajokiil bukan kacole. 12Abulaham li áami foof atuubaawu ata bukanabuku kateyumuu búkut, kátijutumuu bale li min kuteyimuu búkut, bale li min kunabumuu li kootaku kata atuubawolaal Abulaham áyinenumuu tówum atey búkut.

Wahawu wan Ateemit alobumuu kasen bukanabuku káyinenumuu

13Ateemit lansaan fan asen Abulaham li bubukoolumabu boola, adunaayi kutowo. Min Ateemit alobumuu kasen Abulaham adunaayi, lakowut mata lakankaan loon eluwaayi elobumuu, bale lakolako mata Ateemit lajokoojok an acole humum hata káyinenaku koola. 14Nokoomuu loon bukanabuku kammuu li kuŋenaku kata eluwaayi, buko bale kóomi li kuyab wahawu wan Ateemit alobumuu kasen, kama káyinenaku hin kakaal̥o, ban wahawu unwu wan Ateemit alobumuu kasen ubajut jáliŋ. 15Li mal̥egenamu, eluwaayi éjiyemuu Ateemit li awuñet bukanabuku. Tan eluwa ebajut, káhoogul eluwa foof let kubaj to.

16Mó mújimuu, wahawu wan Ateemit alobumuu kasen an, fan uyab wo humum hata káyinenaku koola, bájum wahawu unwu li ulako káji kata Ateemit. Kájiyaku unku kulakolako boot li bubukoolumabu feh bata Abulaham. Let mantee boot li bukanabuku bale kammuu li kuŋenaku kata eluwaayi, bale boot foof li bukanabuku feh káyinenumuu loon Abulaham áyinenumuu. Abulaham atuubawolaal laam foofolaal feh, 17loon Ateemit aloboolumuu li Bakiicelabu kaanaku: «Likaanikaan ulako atuuba ahaan ata sihet sameeŋe.»#Húkitumahu 17:5 Abulaham laanosaano atuubawolaal hákil Ateemit an áyinenumuu li akila. Ateemit okila asenemuu buloŋ kaketumuu ban li akaan wah wabajut min ubaj. 18Abulaham li áyinen ban li abaj kákangum tan uhaase oon kákangum kanookan kulet to. Wahawu unwu újimuu «li alako atuuba ahaan ata sihet sameeŋe,» loon Ateemit aloboolumuu aanool: «Muñowu bubukoolumabu buya bommuu li bule#Húkitumahu 15:5.» 19Káyinenaku kata Abulaham li kulako to malite, maayeet min akite abajumuu ebat simit soono téemeel. Li ahaas foof aan eniilayi yoola ebat ekeeket, ban aseekool Saala ayilaat abaj añiil. 20Abajut káwanwangoo kanookan li wahawu wan Ateemit alobumuu kasenool, bale li alit li káyinenaku koola min ásalum tó Ateemit. 21Láyinenyinen li mal̥egenool kaanaku Ateemit layilo akaan wahawu wan alobumuu kakaan. 22Káyinenaku koola kújimuu «Ateemit li ajokool an acole hákilool#Húkitumahu 15:6» 23Bale kulimaku unke kakiicimuu kaanumuu: «Ateemit li ajokool an acole hákilool», kukiicuti boot li akila balewool. 24Kukiicikiic foof boot li alolaal áatiyaalumuu ujokaali bukan kacole hákil Ateemit, alolaal áyinenaamuu li Ateemit ayitenumulomuu Amaaŋenawu oololaal Yéesu Kilisita li eketayi. 25Ateemit labeebet Yéesu Kilisita li eket humum hata uhoofoolawu woololaal, ban li ayitenumulool li eketayi min akaanolaal ulakowaal bukan kacole hákilool.

Currently Selected:

Kata Lom 4: cskDBL

Highlight

Copy