Kata Lom 3

1Kama muñowu tay asuwif áhaŋummuu an alet asuwif? Jáliŋ buu katey búkut kubaje? 2Li wahawu feh, jáliŋayi yata katey búkut elulluuk. Kusuwifaku Ateemit ajandumuu akat Hulimahu hoola. 3Muñeˈe waa? Mantee min kukee li Kusuwifaku kul̥egenutumuu li káyinenaku kooliil, mo mommuu li múji Ateemit li ál̥egenaati li kulimaku kan alobumuu? 4Maayeet! Anoowan laate ahaas jak kaanaku Ateemit lakankaan Ateemit ata mal̥egenamu, ban ál̥ahukowan anoowan lakankaan ámalamiñ. Li mal̥egenamu, bakiicelabu bonsoon:

«Loote újokumi an acole

li balobelabu booli;

ban li ubaj bakooŋ awu batiibeli#Ukijenawu 51:6.»

5Bale nokoomuu loon mácolaatiyamu moololaal mommuu li múji macolamu mata Ateemit li muhaŋ majuki, fan oonaal buu? Inti Ateemit fan alako Ateemit acolut okila batekewolaal li etindihuuñayi yoola? (Lilollob loon an elobemuu.) 6Maayeet! Mata kaaneenumuu loon Ateemit mo laano, buu laate ayili atiib adunaayi?

7Nokoomuu loon émalimiñayi yúmbaam yóomi li éji mal̥egenamu mata Ateemit li muhaŋ majuki jak, ban boot li máyiineniyamu moola, wáa lí úji Ateemit li ajokom loon ahoofoola min atiibom? 8Muñeˈe wáa újiye let oonaal: «Kama ukaanaal majakut mantee majake li mubilum to?» Li mal̥egenamu, kukee li bukanabuku kúloboolewommuu koone kulimaku unku kúmbaam. Bukanabuku umbuku tootook min kutiibiilumuu.

Bajut an acole

9Kama waa, mantee alolaal aamaalumuu kusuwif luhaŋaale kaletumuu kusuwif? Maayeet! Li mal̥egenamu, líhihhiis kaanaku ulako asuwif li ulet asuwif, bukanabuku feh kumbuku li sembaasu sata kahoofoolaku. 10Loon Bakiicelabu bulobumuu:

«Bajut an acole,

maayeet ano!

11Bajut an ájallowe,

bajut an aŋese li Ateemit.

12Bukanabuku feh kubeebet

búsol Ateemit,

buko foofiil feh kújoseejoset.

Bajut an li buko akaane majake,

maayeet ano#Ukijenawu 14:1-3; 53:2-4; 1 Saŋ 1:8-10.

13Kugundakaku kooliil

kunokoonokoo li huyaak

háhimulowe,

kúlellufaku kooliil li koono to

boot naak jabunt bukan,

Kulimaku káfulumulemuu

li utumawu wooliil li kunokoo li

kuya kata enuukayila#Ukijenawu 5:10; 140:4.

14Utumawu wooliil li umeeŋ

kulim kajakut,

kulim kásuumut bajam maayeet#Ukijenawu 10:7.

15Li kuhi’ li etey boot jamuk

bukan.

16Tanootan tan kújowume

li kukajen wahawu feh,

ban li kukat to bukanabuku

sílaam.

17Kuhaasut bútinabu bata

kásuumaayaku#Esay 59:7-8; Kúlobuwaku 1:16.

18Boot li buko, kákoli Ateemit

kubajut jáliŋ#Ukijenawu 36:1.»

19Luhaasaale kaanaku wahawu wan eluwaayi#3:19 Eluwaayi: Unte eluwaayi yo yommuu kulimaku kabilummuu li Húfaalumahu Huhaanahu elobumuu, elollob wo boot li bukanabuku kammuu li kuŋenaku kata eluwaayi, jakum bil an ayili álobul to mukee mantee li ukooŋ, min ésukayi ehaas kaanaku adunaayi foof yo feh etilentilen hákil Ateemit. 20Wahawu unwu újimuu let baj an aŋale sembewool min akaan loon eluwaayi elobumuu, jow yok took min Ateemit ajokool an acole hákilool. Li mal̥egenamu, eluwaayi yoonosoono to bale boot kakaan bukanabuku min kuhaas mata kahoofoo.

Buu Ateemit afakenemuu an

21Muñeˈe Ateemit láhiisolaahiis buu lakaanewolaamuu ulakowaal bukan kacole hákilool, ban inti li búkaanum bata eluwaayi bulollob mo foof. 22Ateemit lajoojok bukanabuku feh káyinenumuu li Yéesu Kilisita bukan kacole hákilool, humum hata káyinenaku kooliil. Lakankaan mo boot li bukanabuku feh káyinenumuu, mata kúbutoolut. 23Li mal̥egenamu, bukanabuku feh kuhoofoohoofoo, ban mó lí múji lí kúfu’ li máyiineniyamu mata Ateemit. 24Bale Ateemit li akaaniil kulako bukan kacole hákilool montoŋ, humum hata kájiyaku koola, li min ájowummuu li Yéesu Kilisita min afakeniil. 25Ateemit li asen Yéesu Kilisita alako búsimen boot kayeelen etindihuuñayi yoola, mantee bukanabuku káyinenumuu li akila Yéesu, li kúbajum kabonket kata uhoofoolawu wooliil li eketayi yoola. Ateemit lakankaan loon muñaˈa min áhiis kaanaku lakankaan Ateemit acole. Naanaŋ lakaakat bo uhoofoolawu wan bukanabuku kukaan nomuu, 26nan alakomuu húmuñahu. Muñeˈe li taŋayi inye, Ateemit láhihhiis bukanabuku macolamu moola, min akila humumool akaan Ateemit acole, ban li akaan bukanabuku káyinenumuu li Yéesu Kilisita kulako bukan kacole.

27Muñeˈe waa wommuu li úji bukanabuku li kunaak kusaloolo? Bajut, maayeet wano! Mata wáa úji? Mantee bakaaneliil boote bújiyiil li kulako bukan kacole hákil eluwaayi? Maayeet, bale min kúyinenumuu, mó mújiye. 28Li mal̥egenamu, wahawu wan ujokaalumuu wo wommuu unwe: an káyinenool li Yéesu Kilisita kújiwoolumuu li alako an acole hákil Ateemit, bale let bakaanelool bacole bújiye. 29Bale waa, Ateemit laanosaano Ateemit ata kusuwifaku baleyiil? Inti laanosaano foof Ateemit ata bukanabuku kaletumuu kusuwif? Eéhe’, Ateemit laanosaano foof Ateemit ata bukanabuku kaletumuu kusuwif. 30Li mal̥egenamu, Ateemit ano bale abaje. Okila ammuu li akaan kusuwifaku kulako bukan kacole hákilool, humum hata káyinenaku kooliil, li akaan foof bukanabuku kaletumuu kusuwif kulako bukan kacole hákilool, humum hata káyinenaku kooliil. 31Muñeˈe waa, mantee boot min úfulenaal jáliŋayi yata eluwaayi humum hata káyinenaku? Maayeet, bale boot min usenaal eluwaayi jáliŋ yata mal̥egen.

Currently Selected:

Kata Lom 3: cskDBL

Highlight

Copy