1 Kata Tesalonik 3
3
1Mó mújimuu, emmuu áloli jibilut jiyili jikob fiyo, li jijok kaanaku jaajak min jilako li ésukayi yata Ateen bálewoli, 2ban li jíboñuluul átuyolaal Tímote ammuu li bulok li áloli boot li Ateemit, li kawaaleyaku kata Hulimahu Hásuumaahu hata Kilisita. Jiboñulooboñ boot min alitenuul ban li awankulenuul min jijooŋoo to li káyinenaku kan jibajumuu li Yéesu, 3jakum bil sílaamasu san jommuu li so síji an li bukuluul li áyeko. Bukuluul humumuul, jihaase kaanaku sílaamasu unsu lóomumaal tomuu. 4Li mal̥egenamu, nan jilakomuu booluul, jilobuulob jikat to joonuul fan kúlaamenolaal. Wahawu unwu ubajumuu foof, ban bukuluul jihaase. 5Wahawu unwu újimuu emmuu iyilaat ikob fiyo, li íboñul Tímote abil agel̥l̥en mata káyinenaku kooluul. Líkoliyenkoli min Sayitaane abuntuul, min bulokabu bóololi feh bulako kakaal̥o.
6Bale muñeˈe, Tímote álaañumulomuu booluul, lálobolilob kulim kásuume mata káyinenaku kooluul li húbooliyahu hooluul. Li amit áanoli kama jiloŋe li jíwayil̥owoli jak, ban jifañe min jíjukoli, loon óloli foof jifañumuu min jijukuul. 7Kutuyom, mó mújimuu maayeet min áloli jibajumuu buyinaabu umbu li sílaamasu unsu feh, káyinenaku kooluul kújiwolimuu li jibaj kawankulen. 8Muñeˈe áloli jilaañene jiloŋ, mata bukuluul jítuutuk lit li Amaaŋenawu. 9Li mal̥egenamu, jihaasut buu jóomi li jisal ŋáa’ Ateemit oololaal mata bukuluul jíji, mata ésuumansuumayi feh yan jíkaanolimuu hákilool. 10Alóli jumbuku min jihankenemuu min jil̥awool tihunak jiban ehuka mantee li ákatoli min jilaañen jijukuul, min jihabeluul wahawu wasaŋowuulumuu bahaas mantee káyinenaku kooluul li kuhaŋ malit.
11Jow Ateemit humumool ammuu Atuubawolaal, li Amaaŋenawu oololaal Yéesu, kúsenoli bútin min jibil booluul! 12Amaaŋenawu akaan min húbooliyahu han jíbooliwoomuu li han jíboolimuu bukanabuku feh huhaŋ maluuk huyinno bo, loon áloli foof jíbooliwuulumuu. 13Ateemit ajow aliten uyinumawu wooluul mantee li jilako bukan kanabe, li bukan kan Ateemit ammuu Atuubawolaal ajukut majakut manooman li buko, nan Amaaŋenawu oololaal Yéesu ammuu li abil li bukanabuku koola feh kanabaaku.
Currently Selected:
1 Kata Tesalonik 3: cskDBL
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
