1 Kata Tesalonik 4

Buloŋabu ban Ateemit afañumuu min bukanabuku kuloŋ

1Mo emmuu, bukuluul kutuyom, li áloli jiliikenummuu buu jommuu li jiloŋ min súum Ateemit. Ban li mal̥egen, mo foof jommuu li buloŋ. Bale muñeˈe jil̥awuul ban li jiyaakooluul li kajawaku kata Amaaŋenawu Yéesu: jiloŋ haŋ majak min jilobuulumuu. 2Li mal̥egenamu, bukuluul humumuul jihaase kulimaku kan jisenuuluumuu li kajawaku kata Amaaŋenawu Yéesu. 3Wahawu wan Ateemit afañumuu wo wommuu min jilako bukan kanabe, ban jakum jihinto li an an jiyabowut#4:3 Jakum jihinto li an an jiyabowut: Ateemit afañut min bukanabuku káfulowe bomuu muñaˈa li bukan kan kuyabowut, yo yommuu toute immoralité. 4Anoowan li bukuluul laate ayili ajok eniilayi yoola jak min aloŋ buloŋ banabe ban li busali#4:4 Hulimahu unhe muñeˈe kutiiw ho kukaan li sibiibul sakee: Anoowan li bukuluul laate ahaas buu laate ayab aseekool min kuloŋ buloŋ banabe ban li kusuuwoo. 5Ban jakum jikat min kásiibo kajakut kuhaŋuul sembe loon bukanabuku kahaasutumuu Ateemit kukaanemuu. 6Mo emmuu, jakum an abunt atuyool, jakum foof ágecool li wahoowah. Loon jilobuul nomuu ban li jilaañen jilobuul mo, Amaaŋenawu fan atek bukanabuku feh kakaanemuu loon muñaˈa. 7Mata Ateemit ahooñutolaal boot min unaak uloŋaal buloŋ bajakut, bale min uloŋaal buloŋ banabe. 8Mó mújimuu, an ahoyumuu kulimaku unku, inti an lahoye, bale Ateemit lahoye, asenuulumuu Buyinumabu boola Banabaabu.

9Muñeˈe tookut min an akiiculuul mata húbooliwoo hata batuyaay, mata Ateemit lalobuulob kaanaku joote jíbooliwoo. 10Ban fiimaa bukuluul mo foof jommuu li kakaan li kutuyuul feh kata Maseduwaan. Bale, kutuyom, áloli jumbuku li kal̥awuul min jikaan haŋ to. 11Jiŋes min jiloŋ li kásuumaay. Jakum jinoken dán utumuul ulet. Jítuk li kuŋenuul min jilok min jiloŋ, loon jifinumuu min jilobuul. 12Jikaan momuu, bukanabuku káyinenutumuu li Yéesu fan kuluukenuul, ban let jíloŋum li kuŋen bukan.

Ebilayi yata Amaaŋenawu

13Kutuyom, jifañut min bukuluul jilako to loon muñaˈa bahaasut mata bukanabuku kaketemuu, jakum bil jíyiyenoo loon bukan kaabuku kan emmuu buko kubajut húkangum. 14Li mal̥egen, emmuu lúyinenaayinen kaanaku Yéesu lakeeket ban li ayitowumul li eketayi, lootaale foof úyinenaal kaanaku bukanabuku káyinenumuu li akila ban li kuket, Ateemit fan ayitenumuliil li eketayi li Yéesu ló.

15Li mal̥egenamu, hulimahu unhe Amaaŋenawu alobumuu ban ho foof áloli jommuu li jilobuul: bukan li ololaal kammuu li kulako li buloŋ nan Amaaŋenawu ammuu li abil, let kuyab kayooŋ bukanabuku kaketumuu kuban. 16Mata Amaaŋenawu fan alob butiya, min Anahaanawu ata kumalakaaku al̥ok kasiinaku kata Ateemit. Muñeˈe no unnu, Amaaŋenawu humumool fan áwalowumul li emitayi. Bukanabuku káyinenumuu li Kilisita ban li kuket, buko kommuu kujand kuyitowumul li eketayi. 17Muñeˈe fúlum tómuu, bukanabuku kammuu kulako no li buloŋ, fan kuŋalooli li mano li buko min kújowum li ufaalawu min kujow kufam li Amaaŋenawu haatiya. Muñowu lóotumaalumuu ulakowaal li Amaaŋenawu boot nanoonan. 18Mó mújimuu joote jítintimbenoolum li kulimaku unku.

Currently Selected:

1 Kata Tesalonik 4: cskDBL

Highlight

Copy

Compare