HAOKAPHOK 42
42
Josephwui Achinābingna Egyptli Zāt Phākhavā
1Egyptli kashakazā samphangdalei kaji kashā eina Jacobna anaomayarabingli hānga, “Khiwui vang nathum akha eina akha yangngaroklikhala?” 2#Ots 7.12. Kala ana hānga, “Yanglu, Egyptli kashakazā samphanga da ina shāhaira; ithum kakhum eina mathi khavai, ithumwui vang kashakazā talokhuilu.” 3Chiwui vang Josephwui achinā tharā china kashakazā lokhavai Egyptli tai. 4Kha Jacobna Josephwui agato Benjaminliva achināngarābingli mangasotā ngasakmana; kaja kalākashi shokpaishinada ngacheehaowa. 5#Ots 7.11. Chithāda sāda Israelwui naomayarabingna kashakazā tālo khavai khangateibingli ngasovai, kaja zāt kasak Canaan ngaleilila za̱haowa. 6Chitharān Josephna ngalei chiwui rammunga sāsai; ngalei chiwui mibingli ana yorsangkasāna. Josephwui achinā ngarāna awui mangāli vākashung eina ngakhumshām eina khayākashi mi. 7Josephna achinā ngarāli thei, kala athumli machuthaowa, kha athumli khami thāda sāda chanhān maunglakla ngahāna, “Nathum kachiwui eina kharākhala?” Athumna hānga, “Kashakazā lokhavai Canaanwui eina kharāna.” 8Josephna achinā ngarāna da theishingkhuihaowa, kha athumna ali matheimana. 9Kala athumwui pongli ali kashiman mang chi Josephna phaningunga; kala ana athumli hānga, “Nathum ra̱khayangbingna, apam hiwui khangazan yangkhui khavai kharāna.” 10Athumna ali hānga, “Maningmana, amei, kha naraobing kashakazā lokhavai kharāna. 11Ithum saikora mi akhawui naona, ithum ningkathara misera, ithum rāra̱khayanga mi maninglakmana.” 12Ana athumli hānga, “Maningmana, nathumna ngalei hiwui khavāt khangazan yangkhui khavai kharāna.” 13Athumna hānga, “Narao ithum Canaan ngaleili mi akhawui naosera, ishi chinao tharāda khanina; paisho ishāvāli ngasopamdalei, kha akhava maleithura.” 14Kha Josephna athumli hānga, “Ina nathumli kahāng thāda, nathum ra̱khayangasera. 15Hi eina nathumli theikhuipaira: Pharaohwui ming singda kahāngna, nagato paisho chi hili makhuirākha nathum hiwui eina mazatpaimara. 16Nathumwui ngachaili akhana paisholi unghokhuilu, kateibingna phātopli pamsāra. Pharaohwui ming singda kahāngna, nathum ra̱khayanga mi maningmana jiakha kala nathumwui tui chi mashungakha hi eina theikhuira.” 17Kala ana athum saikorali kathumthangwui vang phātopli sanghaowa.
18Kakathumathang Josephna athumli hānga, “I Vareli ngacheeya; chieina hithāda saakha nathum ringpaira: 19nathum ningkathar miakha, nathumwui achinā akha phātopli chipamsālu, kala kateibingna shimshong zākhavai kashakazā phungunghaolu. 20Kala agato paisho chi ili rāchitheilu; chieina nathumwui tui mashunga da theipaira, kala nathum mathimara.” Athumna chithāda sai. 21Chiwui thili athum eina athum hāngngaroka, “Igatowui pongli ithum nguihaira kaji hi khamashungna, ana ithumli kapo ithumna matheikhami chitharān awui malung kharing chi ithumna thei; chiwui vang malung kharing chi ithumwuitungli rātāhaira.” 22#Hao 37.21-22. Kala Reubenna athumli hānga, “Nao chili makaphā masālu da ina nathumli mahāngmala? Kha nathumna makhuisangthu. Chiwui vang ara awui asheewui athut hāngkasang atam rāhaira.” 23Josephna athumwui tui shai kaji athumna matheimana, kaja athumwui ngachaili khalatme leisai. 24Chiwui thili ana athumwui eina thuihaida chapa; kala athumwuishong latungda chān ungngazeka. Kala ana Simeonli khuilaga achinā ngarāwui miktāli khalaphaowa.
Josephwui Achinā ngarā Canaanli Latkhaung
25Chiwui thili athumwui khao chi kashakazā chipem ngasakta athum kachiva̱wui pheisā chi athumwui khaoli sangmiluihaolu da kasoi; kala athum shongfali zākhavai sangmilu kaji athishurda sangmi. 26Chiwui thili athumwui kashakazā gadhābingli shaksākhuilaga zathuwa. 27Kala athumwui shimzunpamli ungshungda achinā akhana gadhāli uikhavai akhao kasho eina chili awui pheisā zangkasā chi thei; 28Chieina ana achināngarāli hānga, “Iwui pheisā hanmiluihaira; khaowui khamorli zangdalei!” Chi shālaga athum ngacheelakhaowa, kala akha eina akha ngarei ngasunda kathirriri eina hāngngaroka, “Ithumli Varena khi sāmi kahaikhala?”
29Athumna Canaanli avāva̱ Jacobwuili ungkashung eina shokkahai saikora hithāda hānga, 30“Ngalei khamunga china ithumli chānhān maunglakla ngazeka, kala ithum ngalei chili ra̱yang khavai kachihona da khuihaowa. 31Kha ithumna ali hānga, ‘Ithuma ningkathar mina, ithum ra̱khayangabing maningmana; 32ithum avāva̱ akhawui chinaongarā tharāda khanina; akhavā maleithura, paishova Canaanli ishāvāwui ngalemli pamda lei.’ 33Chieina khangama akhavā china ithumli hānga, ‘Hina nathum ningkathara mina kaji ina theipaira: nachinā akha iwuili pamngasaksālu, kateibingna shimshong zākhavai kashakazā phungungulu. 34Nathumwui agato paisho chi khuirālu; chithakha nathum ra̱khayangbing maningmana, kha ningkathara mina da theira, kala nachināli nathumli hanmida nathum ngalei hili leih khayora sāpaira.’”
35Athumna akhao chi pheikhayang chitharān, yanglu, mi kachiva̱wui pheisārom khaoli zangsāsera; athum kala athumwui avāva̱na pheisārom chi theilaga ning saza̱lakhaowa. 36Avāva̱ Jacobna athumli hānga, “Inao ngarāwui vang nathumna ili wukkhanang ngasakhaira: Joseph maleithura, Simeonla maleithura, ara nathumna Benjaminli khuithuiluiki jihaira; saikora hi iwuitungli tāserhaira.”
37Chieina Reubenna avāva̱li hānga, “Ina Benjaminli mathānungakha iwui naomayara khaninili sāthathaolu; ipāngli sangmilu, ina nawuili ali thānungmiluira.”
38Kha avāva̱na hānga, “Inaomayarali mavā ngasakmara, kaja nagato thihaira amāngli notha kahaina. Nathumna vāki kaji shongzāli ali kalākashi rāza̱kha, nathumna ili asarlamshong wukkhanang ngasakta Kazeiramli vāngasakra.”
Currently Selected:
HAOKAPHOK 42: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.