HAOKAPHOK 41
41
Josephna Pharaohwui Mang Khalatkhami
1Kum khani peikahaiwui thili Pharaohna awui mangshong Nile kongpheili nganingsai, 2Nilewui eina asākakā kala nganaipat kahai mukkā shini shoklaga khawo phāshai. 3Kala athumwui thili khangatei kaothethek kala rurārsār kahai mukkā shini Nilewui eina shoka, kala mukkā kateibingwui ngalemli shoknganinga. 4Kaothethek kala rurārsār kahai mukkābing china asākakā kala nganaipat kahai mukkā chili shaihaowa. Chiwui thili Pharaohna thuimathuka. 5Ana pivaluishita kala kakhane mang rāshimana; kala yanglu, māmazān khamathā panglāk kahai shini mārong akhali matheisai. 6Chiwui thili zingshoshongwui masina phankhalanghaida shāt-kazanga tāham kahai māmazan shini shoka. 7Kala chibingna khamathā māmazan shini chili mayuisanghaowa. Chieina Pharaohna thuimathuka, kala mangshong ngasāsai. 8Chiwui vang ngathor kathui eina awui ning mamathānrarthuwa; ana Egyptli khalei mitrang kathem kala thangkhamei saikorali hokhui; kala Pharaohna awui mang chi athumli hāngchithei, kha mi akhanala Pharaohli chi makhalatmirarthuwa.
9Chieina tengkot singme china Pharaohli hānga, “Aja ina iwui khangui phaningunghaira. 10Pharaohna nawui raobingli malungkhavātwui vang khamui kasemawui akhavā inili kashina akhavāwui narkhavai shimli sangkahai tharān, 11kakhalat ngatatei kahai mang, thangngayākha inili shimana. 12Chili Hebrewnao akha kashinawui rao sāda ithum ngasopamsai; inina ali kahāng tharān mi ava̱va̱na kashiman mang chiwui kakhalat khalatmi. 13Kala ana inili khalatkhami chi tākam eina ungshunga, ili iwui otpamli khuisangluishita kala khamui kasemali phāshi sāhaowa.”
14Chieina Pharaohna Josephli ahokhui ngasakta, phātopwui eina katotsisi khuishoka, kala ana morhā silaga kachon shinkhuihailaga Pharaohwui mangāli vai. 15Pharaohna Josephli hānga, “Ili mang akha shimana, kha chi khalatmikashap mi khipākha maleithuwa; ina shai kaja nana mang akha kashā tharān chi khalatmishapa ji.” 16Josephna Pharaohli ngahānkai, “Theikashapā chi iwuili maleimana; Pharaohwui ningkachāng Varena ngahānkāmira.” 17Chieina Pharaohna Josephli hānga, “Yanglu, iwui mangshong I Nile kongpheili nganingsai; 18asākakā kala nganaipat kahai mukkā shini Nilewui eina shokta khawo shokphāshai; 19chiwui thili khangatei mukkā shini kaothethek rurārsār kahai, Egypt ngaleili ina matheilakrang kaji Nilewui eina shoka. 20Kaothethek kala rurārsār kahaibing china asākakā mukkā shini chi shaihaowa; 21kha athumna shaisang kahai thili khipānakha athumna shaisanghairada matheirarmara, kaja athum kharewui thāda kakao chishona. Chieina I thuimathukhaowa. 22Ina mangshongli theilui; kapanga khamathā māmazan shini arong akhali matheisai; 23kala zingshoshongwui masina phankhalangda shāt-kazanga yangfafa kahai māmazan shini shoklui, 24kala yangfafa kahai mābing china kapangabing chili mayuitahaowa. Hi ina mitrang kathemabinglila ngahānlaga khipānakha mahāngmirarthuwa.”
25Chieina Josephna Pharaohli hānga, “Pharaohwui mang chi akhamaya; Varena sāki kaji chi Pharaohli phongmihaira.” 26Asākakā mukkā shini chi kum shinina, kala kapanga māmazan shini chi kum shinina; mang chi akhamaya. 27Kaothethek kala rurārsār kahai mukkā shini kala zingshoshongwui masina phankhalangda shāt-kazanga yangfafa kahai māmazan shini chi zāt kasak kum shini papama. 28Ina Pharaohli hāngkahai thāda, Varena sāki kaji chi Pharaohli chitheihaira. 29Egyptwui ngalei saikorali mavātlak kaji kum shini rāra, 30kha chiwui thili kum shini zāt kasak rāra, kala Egypt ngaleili makhavāt kum chi malaihaora; zāt kasak china ngalei saikorali vāshungra, 31chiwui thili zāt kasak rāki kaji chi marnahaida khalei kashāng kaho matheilakmara. 32Pharaohli mang khani ngashomda kashiman hi Varena sālakra kaji kala thaklāk eina rāngasakhaora kajina. 33“Chiwui vang Pharaohna Egyptwui ngalei saikorali yangmi khavai ningkhamazing kala thangkhamei mi akha kapangkhuiranu. 34Pharaohna ngalei hiwui kashinabing phāsangda makhavāt kum shini Egypt ngaleiwui alungli samkaphang akhum kaphangā chi khuiranu. 35Kala rārāda khalei kaphā kum hili samkaphang saikora athumna kazipranu, kala māthei chi keinung saikorali Pharaohwui azingli kaziphairanu. 36Kashakazā chi kum shini zāt kasak Egyptli rāki kajiwui vang ngarānsangki kajina, chieina ngaleiwui mibingna zāt kasakwui eina mathimara.”
Josephna Egypt Ngaleiwui Rammunga Khangasā
37Hāngkahai chi Pharaoh kala awui raobingna phālakhairada theikhui. 38#Ots 7.10. Kala Pharaohna awui raobingli hānga, “Varewui manglāna ngasokhami hikathā mi hili samphangrala?” 39Chiwui vang Pharaohna Josephli hānga, “Varena nali saikora hi chitheihaokada, nakathā, ningkhamazing kala thangkhamei maleiluimara; 40nana iwui shimwui akhavā sāra, kala iwui mi kachiva̱na nawui kakaso athishurda sāra; wungpamkhong himāngna ina nali reimeira.” 41Kala Pharaohahna Josephli hānga, “Yanglu, Egypt ngalei saikorawuitungli ina nali chipamhaira.” 42Chiwui thili Pharaohna apāngwui eina mahor namkhavai khutop chi khuida Josephwui pāngli sangmi, kala khamanaka khamathā kachon ngavaimida awui akahungli sināchā ngachāmi; 43kala awui thichangli kazang siguigari tongngasakta, “Khuktida khayashilu” da athumna vaowa. Chithāda sāda Egyptwui ngalei saikorawuitungli ali chipama. 44Chili lāngda Pharaohna Josephli hānga, “I Pharaohna, kha nawui khamayā mazangla Egyptwui ngaleili mi khipākha pāng, lah phei makhāngpaimara.” 45Kala Pharaohna Josephwui ming Zaphenath-paneah phokmi; kala Josephli Onwui pāngmon Potipherawui naongalāva̱ Asenathli ngakum ngasaka.
Chiwui thili Josephna Egypt ngalei saikora yaovai. 46Josephna Egypt awunga Pharaohwui otram ngatha̱kaphok tharān a kum thumra kāshunghairasai. Kala Josephna Pharaohwui eina shokta Egypt ngalei saikorali vai. 47Zingkum kapha shiniwui alungli heiun sorngasaida unga, 48kala ana Egypt ngaleili kum shiniwui alungli sorngasaida heiun khaung chitharān keinungli kashakazā kazipsanga; ana keinung kachiva̱wui kuimareida khalei luiramwui eina kashakazā kaziphai. 49Hithāda sāda Josephna mā kachungkha kazipkhui, kongwui situiyakkha kazipkhui, chungnāhaida khaonla maonrarthuwa.
50Zāt kasak marāranglakha On pāngmon Potipherawui naongalāva̱ Asenathna Josephli mayarnao khani pharāmihairasai. 51Josephwui naochizai naomayarali Manasseh hoi, kaja ana hānga, “Kaja iwui sipkasā kala ishāvāwui shimkhur saikora Varena malai ngasakhaowa.” 52Kakhaneli Ephraim hoi, “Kaja kakhanang ramli Varena ili athei mathei ngasaka.”
53Egypt ngaleili heiun khaung kum shini chi peihaowa; 54#Ots 7.11. kala Josephna hāngkahai thāda zāt kasak kum shini rāshunghaowa. Apam kachiva̱li zāt sakhaowa; kha Egypt ngalei kachiva̱li kashakazā samphanga. 55#Joh 2.5. Egypt ngaleili kachām chitharān mibingna Pharaohli zāt rapoi; kala Pharaohna Egyptnaobingli hānga, “Josephli vālu, ana nathumli kahāng chi sālu.” 56Chieina zāt kasak chi apam kachida vāshung kahai tharān, Josephna zātchum saikora sholaga Egyptnaobingli yorsanga; kaja Egyptli zāt kasak kateokhamāng maningmana. 57Chili lāngda okathui saikorawui eina Egyptli Josephwuili mā lokhavai rai, kaja okathui saikorali zāt sakhaowa.
Currently Selected:
HAOKAPHOK 41: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.