HAOKAPHOK 37
37
Joseph eina Achinā ngarā
1Avāva̱ Jacobna kha̱mi thada somkasā Canaan ngaleili Jacobna apāna. 2Hi Jacobshi shimkhurwui thotchānna.
Josephna kum tharāda shini kāshunguda achinā ngarāli ngasoda yao homa; avāva̱wui apreiva̱̱ Bilhah eina Zilpahwui naomayarabingli ngachona; kala Josephna achinā ngarāwui makaphā chanpao avāva̱li unghānga. 3Asārlam kapharāwui vang Israelna Josephli leishimeithuiya kala phahon katum apāng kasang akha khopmi. 4Kha awui amangarāli lāngda avāva̱na Josephli leishimei kaji kathei tharān ali yangkharinghaowa kala ali mathāda mangazekngaimana.
5Chitharān Josephna mang akha shimana, kala ana chi achinā ngarāli kahāng eina athumna ali mataimeida yangkharinghaowa. 6Ana athumli hānga, “Ina mang kashiman hi nganāmilu: 7ithumna luili māmazān atansai, kashuirak eina iwui māmazān chi thuinganingshinghaowa; kala yanglu, nathumwui mamazānbing china kuimareida rākaziplaga iwui māmazān chili rākhoruma.” 8Achinangarāna ali hānga, “Nana ithumli mungra kajila? Maningakha ithumli nana singyuira kajikhala?” Athumna awui mang kala tuimatui chiwui vang yangkharingmeiluihaowa. 9Chiwui thili ali mang khangatei akha shimanda chi achinā ngarāli hānglui, “Yanglu, ili mang akha shimanluiya; kaja zimik, kachāng, kala sirā tharāda akhana ili khorumsai.” 10Kha ana avāva̱ kala achināngarāli kahāng tharān avāva̱na khararda hānga, “Nali kashiman mang hi khimangkhala? Nashava̱ ini kala nachinābingna nawui mangāli ngaleili ngakhumshāmsangda nali khayāshiserra kajila?” 11#Ots 7.9. Chieina achinā ngarāna ali yuishihaowa, kha mang chi avāva̱na awui ningli haihai.
Joseph Egyptli Yorsangkahai
12Chitharān achinā ngarā Shechem ngalemli avāva̱wui sei ahompamhaowa. 13Israelna Josephli hānga, “Nachinā ngarā Shechemli sei homda khalei maningmala? Ralu, ina nali athumwuili chihovara.” Ana hānga, “I hili leili.”
14Chieina avāva̱na hānga, “Vālaga nachinā ngarā kala sei ashangva̱ kathalikhala kaji ili pao unghāngluishitlu.”
Chieina ali Hebron tampākwui eina chihoda ana Shechemli vāshunga. 15Ana luili ma̱zatlakha mi akhana ali samphangda ngahāna, “Na khi phāzatlikhala?” 16“I ichinā ngarāli phākazatna, athum sei kali hompamlikhala, ili kahāngmilu.” da ana hānga, 17Mi china hānga, “Athum thuihaira, kaja athumna ‘Dothanli vausa’ da kahāng ina shai.” Chieina achinā ngarāwui thi shurvāda Josephna athumli Dothanli samphanga. 18Athumna ali katāvawui eina thei, kala athumli marānganairanglakha ali sāthat khavai mithit khalen sāhaowa. 19Athum akha eina akha ngazek ngaroka, “Mang kashimanpa chi rārāli. 20Rālu, ithumna ali shaothathailaga khorchop akhali horsanghaosa, laga ali ramsāna shaikahaina jihaosa, awui mang chi khi shoknikhala yangkhuisa.” 21Kha Reubenna tui chi kashā chitharān ana athumwui pāng eina kankhui khavai hānga, “Ithumna awui manglā makhuiasa.” 22Reubenna athumli hānga, “Ashee matā ngasaklu; lamhāng hiwui khorchop akhali horsanghaolu, kha awuitungli pāng masāza̱lu”; kaja athumwui pāng eina kankhuida ali avāva̱wuili khuiungmiluira da phaningsai. 23Chieina Josephna awui achinā ngarāwuili vākashung tharān, athumna awui phahon katuma pāngkasānga chi raimihailaga 24ali khorchop akhali horsanghaowa. Khorchop chi tara̱ mazangla katheng eina leisai.
25Chiwui thili athumna phazā khavai pamzanga; athumna yangkhavā chitharān Gilead eina Ishmaelnaobing gum, khaneithei, myrrh phungda Egyptli phungtākida athumwui ut thānphungda rārāsai. 26Chieina Judahna achināngarāli hānga, “Ithumna ithumwui achināli sāthatlaga awui ashee thumhaida khi kānkhanā leikhala? 27Yanglu, ali Ishmaelnaobingli yorsanghaosa, ithumwui pāng masāza̱asa, kaja a hi ithumwui achinā kala ithumwui asālaka.” Achinā ngarāna awui tui khui. 28#Ots 7.9. Midiawui leihkhalonbingna athumli rākakān eina athumna khorjopwui eina Josephli khāngshokkhuilaga Ishmaelnaobingli lupāsā shekel maga̱ eina yorhaowa; kala athumna Josephli Egyptshong khuivāhaowa.
29Reubenna khorchop chili ungkhayang chitharān Joseph maleikasa eina awui kachon serkhākta, 30achināngarāwuili latungda hānga, “Nao chi maleithura, I kathāurakhala?” 31Chiwui thili athumna Josephwui phahon chi khuilaga me sāthatlaga chiwui asheeli rura; 32kala athumna phahon katuma apāng kasānga chi khuiphungda avāva̱li khuiungchitheida hānga, “Hi ithumli leisai; yanglu hi nanaowui phahonka maningmakhala?” 33Avāva̱na machuthaoda hānga, “Hi inaomayarawui phahonna; ramsāna shaikahaira; Josephli serkazamlakhaira.” 34Chieina Jacobna awui kachon serkhaklaga borashi shanneilaga zimiksho sha̱rākhathang Josephwui vang chapngachai. 35Anaomayara kala naongalāva̱ ngarāna ali suikaphanep chi mamayāmada hānga “Maningmana, I sifada Kathewui ramli inaowuili vaura.” Chithāda avāva̱na awui vang chapa. 36Lākhashong Midianaobing Josephli Egypt ngaleili Pharaohwui raimi akhavā Potiphar kaho chili yorsanghaowa.
Currently Selected:
HAOKAPHOK 37: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.